ଅତାବିରା, ୩।୮ (ଡି.ଏନ୍.ଏ):
ବରଗଡ଼ ଜିଲା ଅତାବିରା ବ୍ଲକ ବୁଗବୁଗା ପଁଚେତ୍ କର୍ମୀଟିକ୍ରାର ଗୁଟେ ଅସାହା ପରିବାର ଘର ଅଭାବୁ ପରହର ଘରେ ଆଶ୍ରେ ନେଇଛନ୍। ଏନ୍ତାଥି ପରିବାରଟା ସରକାରୀ ଯୋଜନାରେ ଘରଖଁଡ଼େ ପାଏବାର ଲାଗି ପଁଚେତ୍ରେ ଗୁହାରି କରି ନିରାଶ ହେଇଥିବାର ଜନାଯାଇଛେ।
ସୂଚନା ଅନ୍ସାରେ କର୍ମୀଟିକ୍ରାର ବିଧବା ମହିଲା ବିଲାସିନୀ ମେହେର। ଆପ୍ନେ ନରୋତ୍ତମ ମେହେର ୨୦୦୯ରୁ ଆରପାରକେ ଚାଲିଯାଇଛନ୍। ଏହେଦେ ଦୁଇ ପୁଓ ଶୁଭମ, କୁନୁ ଆର ଦୁଇ ଝି’ ଗୀତା, ସସ୍ମିତାକୁଁ ନେଇ ବିଲାସିନୀକଁର ପରିବାର। ସଁପତି, ଜମିବାଡ଼ି ବଲି କିଛି ନାଇଁ। ଦୁଖ୍ସୁଖ, ଧାରଉଧାର କରି ବିଲାସିନୀ ଦୁଇ ଝି’କେ ବିହାଚୁରା କରିଛନ୍। ପରିବାରଟା ଅଭାବ ଅନାଟନ ଭିତରେ ପେଶି ହେଉଥିଲାବେଲେ ୩ ବଛର ତଲେ ବରଷା ପାଏନ୍ରେ ତାକର ଝାଟିମାଟି ଘରଟା ଭାଂଗି ଯାଇଛେ। ଏନ୍ତାଥି ବିଲାସିନୀ ଉପେ ଶୂଇନ୍ ହେଇ ଦୁଇ ପୁଓକୁ ଧରି ନିଜର ଦେଢ଼ଶୁର ଲଲିତ ମେହେରକଁର ଘରେ ଆଶ୍ରେ ନେଇଛନ୍। ଆପ୍ନେ ନରୋତ୍ତମ ବହୁତ ବଛର ହେଲା ଆରପାରକେ ଚାଲିଯାଇଥିଲେ ବି ବିଲାସିନୀ ବିଧବା ଭତା ପାଏବାରୁ ବଁଚିତ୍ ହେଇ ରହିଛନ୍। ଇଆଡ଼େ ପରିବାରଟା ପ୍ରଧାନମନ୍ତ୍ରୀ ଆବାସ ଯୋଜନା ତାଲିକାରେ ୧୧୬ ନମ୍ବରରେ ରହିଥିଲେ ବି ପକାଘର ଖଁଡ଼େ ପାଏବାରୁ ବଁଚିତ୍ ହେଇଛନ୍। ସେନ୍ତା ବିଲାସିନୀ ବିଧବା ଭତାର ଲାଗି ବାରବାର ପଁଚେତ୍ରେ ଗୁହାରି କଲେ ବି କେହି ନାଇଁ ଶୁନୁଥିବାର ତାକର ପୁଓ ଶୁଭମ କହିଛନ୍। ଇ ବାବ୍ଦେ ସରପଁଚ୍ ପୁଷ୍ପକାନ୍ତି ସେଟକୁଁ ପଚରାଲାରୁ ଘଟନାର ତଦଁତ୍ କରି ପଦକ୍ଷେପ ନିଆଯିବା ବଲି କହିଥିଲେ। ସେନ୍ତା ଘଟନା ବାବ୍ଦେ ବିଡିଓ ପ୍ରଣବ କୁମାର ଚାନ୍ଦକୁଁ ପଚରାଲାରୁ ଯଦି ପରିବାରଟା ହକ୍ଦାର ହେଇଥିବେ ନିହାତି ତାହାକୁ ଆବାସ ଯୋଜନାରେ ଘର ଯୁଗେଇ ଦିଆଯିବା ବଲି ସେ କହିଥିଲେ।
