ବରଗଡ଼,୬ା୪(ପ୍ରେମାନନ୍ଦ ଖମାରୀ):ବରଗଡ଼ ଓ ବଲାଙ୍ଗୀର ଜିଲା ରେଳ ଉପଭୋକ୍ତା ସଂଘର ମିଳିତ କାର୍ଯ୍ୟାନୁଷ୍ଠାନ କମିଟିର ଏକ ଗୁରୁତ୍ୱପୂର୍ଣ୍ଣ ବୈଠକ ରବିବାଋ ବରଗଡ଼ ଅଗ୍ରଗାମୀ ଯୁବକ ସଂଘ ସଭାକକ୍ଷରେ ଅନୁଷ୍ଠିତ ହୋଇଛି। ସମାନ ସମସ୍ୟା ଦେଇ ଗତି କରୁଥିବା ଉଭୟ ଅଞ୍ଚଳର ଜନସାଧାରଣ ଅନ୍ୟ ସମସ୍ତରୀୟ ଷ୍ଟେଶନ ଗୁଡ଼ିକ ତୁଳନାରେ ସାଧାରଣ ରେଳସେବା ପାଉନଥିବାରୁ ରେଳବାଇର ବିଷମ ନୀତିକୁ ଏହି ବୈଠକରେ ସମାଲୋଚନା କରାଯାଇଥିଲା। ଦୀର୍ଘଦିନ ଧରି ଏ ଅଞ୍ଚଳରୁ ଭୁବନେଶ୍ୱରକୁ ଏକ ସକାଳୁଆ ଇଣ୍ଟରସିଟି ଏବଂ ଦିଲ୍ଲୀ ଓ ପ୍ରୟାଗରାଜ ପାଇଁ ରେଳ ସଂଯୋଗ ପାଇଁ ବିଭିନ୍ନ ଫୋରମରେ ଦାବି କରାଯାଉଛି। ମାତ୍ର ନାନା ଦେଖାଇ ରେଳବିଭାଗ ଅଗ୍ରାହ୍ୟ କରି ଦେଉଥିବାରୁ ବୈଠକରେ ଉଦ୍ବେଗ ପ୍ରକାଶ ପାଇଥିଲା। ବରଗଡ଼ ଓ ବଲାଙ୍ଗୀରର ନିର୍ବାଚିତ ଜନ ପ୍ରତିନିଧିମାନେ ମଧ୍ୟ ତାକୁ ଗୁରୁତ୍ୱ ଦେଉ ନଥିବାରୁ ଜନ ପ୍ରତିନିଧିଙ୍କ ଉପରେ ବିଷୋଦଗାର ପ୍ରକାଶ ପାଇଥିଲା। ଅନ୍ୟପକ୍ଷରେ ଉପରୋକ୍ତ ଦାବି ନେଇ ରେଳ ଉପଭୋକ୍ତା ସଂଘର ସଦସ୍ୟମାନେ ଆନ୍ଦୋଳନକୁ ଓହ୍ଲାଇବାକୁ ନିଷ୍ପତ୍ତି ନେଇଛନ୍ତି। ପୂର୍ବରୁ ମଧ୍ୟ ବରଗଡ଼ରେ ପୁରୀ-ଗାନ୍ଧିଧାମ ଟ୍ରେନ୍ର ରହଣୀ ଓ ବରଗଡ଼କୁ ଡି-ଗ୍ରେଡରୁ ବି-ଗ୍ରେଡକୁ ଉନ୍ନୀତ କରିବାକୁ ବିରାଟ ଜନଆନ୍ଦୋଳନ ହୋଇଥିଲା ଏବଂ ସେଥିରେ ଶେଷରେ ଜନତାର ବିଜୟ ହୋଇଥିଲା। ଏବେ ପୁଣି ଥରେ ସେଇ ପରୀକ୍ଷାରେ ଉପନୀତ ହେବାର ସମୟ ଆସିଛି ବୋଲି ବୈଠକରେ ମତପ୍ରକାଶ ପାଇଥିଲା । ଜିଲା ଯୋଜନା କମିଟିର ଅଧ୍ୟକ୍ଷ ନିଯୁକ୍ତ ହୋଇଥିବା ଯୋଗୁ ବୈଠକରେ ସମ୍ବର୍ଦ୍ଧିତ କରାଯାଇଥିଲା। ବିଧାୟକ ଷଡ଼ଙ୍ଗୀ ତାଙ୍କର ଏହି ଦାୟିତ୍ୱକୁ ଏକ ଆହ୍ବାନ ରୂପେ ଗ୍ରହଣ କରି ବରଗଡ଼ ଜିଲାର ବିକାଶ ପାଇଁ ଆବଶ୍ୟକ ଯୋଜନା ପ୍ରସ୍ତୁତ କରାଯିବ ବୋଲି ସୂଚନା ଦେଇଥିଲେ। ବୈଠକରେ ବରଗଡ଼ ସଂଘ ତରଫରୁ ସଭାପତି ପ୍ରଦୀପ ଦେବତା, କାର୍ଯ୍ୟକାରୀ ସଭାପତି କୃଷ୍ଣ ଚନ୍ଦ୍ର ପଣ୍ଡା, ଉପସଭାପତି ପ୍ରିତମ ସିଂହ, ନିର୍ମଳ କର ଓ ଇନ୍ଦିରା ମହାନ୍ତି, ସମ୍ପାଦକ କମଳ ଯୋଶୀ, କୋଷାଧକ୍ଷ ଗୋପାଳ ଚନ୍ଦ୍ର ଦାଶ ଏବଂ ବଲାଙ୍ଗୀର ସଂଘ ତରଫରୁ ସଭାପତି ତରୁଣ କୁମାର ମିଶ୍ର, ସମ୍ପାଦକ ବିମଳ ଚକ୍ରବର୍ତ୍ତୀ ଉପସ୍ଥିତ ଥିଲେ।
Dharitri – Odisha’s No.1 Odia Daily
