ଆଡିଲେଡ୍, ୧୬ା୧୨- ଅଷ୍ଟ୍ରେଲିଆ ବିପକ୍ଷରେ ଏଠାରେ ଖେଳାଯିବାକୁ ଥିବା ପ୍ରଥମ ତଥା ଦିବାରାତ୍ର ଟେଷ୍ଟ ଲାଗି ବିସିସିଆଇ ଚୂଡ଼ାନ୍ତ ଭାରତୀୟ ଦଳ ଘୋଷଣା କରିଛି। ଆସନ୍ତା ୧୭ ତାରିଖରୁ ଆରମ୍ଭ ହେବାକୁ ଥିବା ଟେଷ୍ଟ ମ୍ୟାଚ୍ ନିମନ୍ତେ ଘୋଷିତ ଭାରତୀୟ ଦଳରେ ଓପନର ପୃଥ୍ବୀ ଶ, ରିଦ୍ଧିମାନ ଶାହା, ଉମେଶ ଯାଦବଙ୍କୁ ମିଳିଛି ସ୍ଥାନ।
ନିକଟରେ ଶେଷ ହୋଇଥିବା ଆଇପିଏଲରେ ସମ୍ପୂର୍ଣ୍ଣ ବିଫଳ ହୋଇଥିବା ପୃଥ୍ବୀଙ୍କୁ ଦଳରେ ସ୍ଥାନ ମିଳିବା ସଭିଙ୍କୁ ଚକିତ କରିଛି। ଉଇକେଟ କିପିଂ ବିଭାଗରେ ରିଷଭ ପନ୍ତଙ୍କ ବଦଳରେ ଅଭିଜ୍ଞ ରିଦ୍ଧିମାନ ଶାହା ସୁଯୋଗ ପାଇଛନ୍ତି। ଦଳରେ ତୃତୀୟ ପେସର ଭାବେ ସ୍ଥାନ ହାସଲ କରିଛନ୍ତି ଉମେଶ । ଆଶା ଅନୁଯାୟୀ ସ୍ପିନ ବୋଲିଂ ବିଭାଗରେ ବରିଷ୍ଠ ସ୍ପିନର ରବିଚନ୍ଦ୍ରନ ଅଶ୍ୱିନୀଙ୍କୁ ହିଁ ଯାଗା ମିଳିଛି।
ଆଡିଲେଡ୍ ଟେଷ୍ଟ ପାଇଁ ଘୋଷିତ ଭାରତୀୟ ଦଳ : ମୟଙ୍କ ଅଗ୍ରଓ୍ବାଲ, ପୃଥ୍ବୀ ଶ, ଚେତେଶ୍ୱର ପୂଜାରା, ଅଧିନାୟକ ବିରାଟ କୋହଲି, ଅଜିଙ୍କ୍ୟ ରାହାନେ, ହନୁମା ବିହାରି, ରିଦ୍ଧିମାନ ଶାହା, ରବିଚନ୍ଦ୍ରନ ଅଶ୍ୱିନ, ଉମେଶ ଯାଦବ, ମହମ୍ମଦ ଶାମି ଓ ଯଶପ୍ରୀତ ବୁମରା।
