କଟକ ଅଫିସ, ୨୭ା୧୦: ଲଘୁଚାପଜନିତ ବର୍ଷା ପରେ ଗତ ଦୁଇଦିନ ହେଲା କଟକ ସହରର ବାଣ ଷ୍ଟଲ୍ଗୁଡ଼ିକରେ ଗ୍ରାହକଙ୍କ ଭିଡ଼ ଦେଖିବାକୁ ମିଳିଛି। ତେବେ ବାଣ ଦର ଜାଣିବା ପରେ ଗ୍ରାହକଙ୍କ ମୁହଁରେ ଚିନ୍ତା ଛାଇଯାଉଛି। ଗତବର୍ଷ ତୁଳନାରେ ଚଳିତ ବର୍ଷ ବାଣ ଦର ପ୍ରାୟ ଦୁଇଗୁଣ ବଢ଼ିଛି। ଗ୍ରାହକମାନେ ଶବ୍ଦ ସୃଷ୍ଟିକାରୀ ବାଣ ଅପେକ୍ଷା ଆଲୋକ ସୃଷ୍ଟିକାରୀ ବାଣକୁ ଅଧିକ ପସନ୍ଦ କରୁଛନ୍ତି। ସ୍ଥାନୀୟ ଅଞ୍ଚଳରେ ବାଣ ତିଆରି ପ୍ରାୟ ବନ୍ଦ ହୋଇ ଯାଇଥିବାବେଳେ ବଜାରରେ ରାଜ୍ୟ ବାହାରର ବାଣ ଭରପୂର ହୋଇଯାଇଛି। ବିଶେଷ କରି ଶିବକାଶୀ ବାଣର ଚାହିଦା ସର୍ବାଧିକ ରହିଛି। ଚଳିତ ବର୍ଷ ୧୦ରୁ ୬୦ ଟଙ୍କା ପର୍ଯ୍ୟନ୍ତ ପ୍ରତି ଅନାର ବାଣ ଉପଲବ୍ଧ ହେଉଥିବାବେଳେ ସ୍ଥାନୀୟ ଅଞ୍ଚଳରେ ତିଆରି ଅନାରର ମୂଲ୍ୟ ୨୦ରୁ ୩୦ ଟଙ୍କା ରହିଛି। ସେହିପରି ତାଳ ଫୋଟ୍କାର ମୂଲ୍ୟ ୨୦୦ରୁ ୨୫୦ ଟଙ୍କା ଥିବାବେଳେ ଫୁଲ୍ଝରି ପ୍ୟାକେଟ୍ ପିଛା ୩୦ରୁ ୪୦୦ ଟଙ୍କାରେ ବିକ୍ରି ହେଉଛି। ଆକାଶ ଦୀପର ମୂଲ୍ୟ ୩୦ରୁ ୫୦ ଟଙ୍କା, ଚକ୍ରିର ମୂଲ୍ୟ ପ୍ୟାକେଟ୍ ପିଚ୍ଛା ୧୫ରୁ ୨୦୦ ଟଙ୍କା, ଶଟ୍ର ମୂଲ୍ୟ ୩୦୦ରୁ ୫୨୦୦ ଟଙ୍କା ଏବଂ ମହତାବ ବାଣର ମୂଲ୍ୟ ୧୦୦ଟି ପ୍ରତି ୨୫୦ରୁ ୫୦୦ ଟଙ୍କା ପର୍ଯ୍ୟନ୍ତ ରହିଛି। ଅନ୍ୟପକ୍ଷରେ ଭଲ ବ୍ୟବସାୟ ହେବା ନେଇ ବ୍ୟବସାୟୀମାନେ ଆଶା ବାନ୍ଧିଛନ୍ତି।
