ଭୁବନେଶ୍ୱର,୨୬।୪(ବ୍ୟୁରୋ): ଆଜି ଅକ୍ଷୟ ତୃତୀୟା। ଏହିଦିନଠାରୁ ସୁନା କିଣିବାକୁ ହିନ୍ଦୁ ପରମ୍ପରା ଅନୁଯାୟୀ ଶୁଭ ବୋଲି ବିବେଚନା କରାଯାଏ। ସୁନା କିଣି ଘରକୁ ଆଣିଲେ ଲକ୍ଷ୍ମୀ ଆସନ୍ତି ବୋଲି ବିଶ୍ୱାସ ରହିଛି। ଏଥିପାଇଁ ଲୋକେ ପ୍ରତିବର୍ଷ ଅକ୍ଷୟ ତୃତୀୟାରେ କିଛିନା କିଛି ସୁନା କିଣିବାକୁ ମନସ୍ଥ କରିଥାନ୍ତି। ସେହିଭଳି ଭଲ ବେପାର ପାଇଁ ସୁନା ବ୍ୟବସାୟୀ ମଧ୍ୟ ଆଶା ରଖି ଗ୍ରାହକଙ୍କ ପାଇଁ ଆକର୍ଷଣୀୟ ଅଫର ରଖିବା ସହ ଏହିଦିନକୁ ଅପେକ୍ଷା କରନ୍ତି। ହେଲେ କରୋନା ପାଇଁ ଏସବୁ ସ୍ବପ୍ନ ଅଧୁରା ରହିଯିବ ବୋଲି ଆଶା କରାଯାଉଛି। ଲକ୍ଡାଉନ୍ ଯୋଗୁ ସମସ୍ତ ସୁନା ଦୋକାନ ଓ ଶୋ’ରୁମ୍ ବନ୍ଦ ରହିଥିବାରୁ ଉଭୟ ବ୍ୟବସାୟୀ ଏବଂ ଗ୍ରାହକ ନିରାଶ ହୋଇଛନ୍ତି।
ଫନୀ ପରେ ଭାରି ପଡ଼ିଲା କରୋନା
ଗତବର୍ଷ ମେ’ ୭ ରେ ଅକ୍ଷୟ ତୃତୀୟା ପଡ଼ିଥିବାବେଳେ ଏହା ପୂର୍ବରୁ ଅର୍ଥାତ୍ ମେ’ ୩ରେ ବାତ୍ୟା ଫନୀ ଯୋଗୁ ଧ୍ୱସ୍ତବିଧ୍ୱସ୍ତ ହୋଇଯାଇଥିଲା ଭୁବନେଶ୍ୱର ସମେତ ରାଜ୍ୟର ବହୁ ଅଞ୍ଚଳ। ଏଥିଯୋଗୁ ଅକ୍ଷୟ ତୃତୀୟରେ ସୁନା ବିକ୍ରି ଗଭୀରଭାବେ ପ୍ରଭାବିତ ହୋଇଥିଲା। ଗତବର୍ଷ ହାତବାନ୍ଧି ବସିଥିବା ସୁନା ଦୋକାନୀ ଏବର୍ଷ ଭଲ ବେପାର କରିବାକୁ ଆଶା ରଖିଥିଲେ। ହେଲେ କରୋନା ପାଇଁ ରାଜ୍ୟର ସୁନା ବ୍ୟବସାୟୀଙ୍କୁ ସର୍ବାଧିକ କ୍ଷତି ସହିବାକୁ ପଡିଛି। ଏଭଳି ଅନେକ କାରଣ ପାଇଁ ୨୦୧୬ରୁ ଘରୋଇ ବଜାରରେ ଅକ୍ଷୟ ତୃତୀୟା ସମୟରେ ସୁନା କିଣାବିକା ଗଭୀର ଭାବେ ବାଧାପ୍ରାପ୍ତ ହେଉଥିବା ଜଣାପଡିଛି।
ଅନ୍ଲାଇନ୍ରେ ସୁନା କିଣା
ଦୋକାନ ବଜାର ବନ୍ଦ ଥିଲେ ମଧ୍ୟ ଘରକୁ ସୁନା ଆଣିବାକୁ ଚାହୁଁଥିବା ଲୋକ ଏହି ଅକ୍ଷୟ ତୃତୀୟାରେ ସୁନା କିଣିପାରିବେ। କୋଭିଡ୍-୧୯ ଲକ୍ଡାଉନ୍କୁ ଦୃଷ୍ଟିରେ ରଖି ଅଧିକାଂଶ ଜୁଏଲାରି ଏବଂ ବଡ଼ ବଡ଼ ସୁନା ଫ୍ରାଞ୍ଚାଇଜ୍ ଚଳିତବର୍ଷ ଶୋ’ ରୁମ୍ ପରିବର୍ତ୍ତେ ଅନ୍ଲାଇନ୍ ସେଲ୍ ଆରମ୍ଭ କରିଛନ୍ତି। ଗତ କିଛିଦିନ ହେଲା ଲୋକେ ଅନ୍ଲାଇନ୍ରେ ସୁନା କିଣୁଥିବାବେଳେ ଅଳଙ୍କାର ଓ କଏନ୍ କିଣୁଥିବା ଲୋକ ଲକ୍ଡାଉନ୍ ଉଠିବା ପରେ ହୋମ୍ ଡେଲିଭରି ପାଇବେ। ସେହିଭଳି ଇ-ଗୋଲ୍ଡରେ ଇନ୍ଭେଷ୍ଟ କରୁଥିବା ଗ୍ରାହକ ପେଟିଏମ୍, ଗୋଲ୍ଡରସ୍ ସହ ବିଭିନ୍ନ ବ୍ୟାଙ୍କିଙ୍ଗ୍ ଆପ୍ଲିକେଶନରେ ଇ-ଗୋଲ୍ଡ କିଣିବାର ଅପସନ୍ ପାଇପାରୁଛନ୍ତି। ତେବେ ଏହା କିଣିବା ପୂର୍ବରୁ ସୁନାର ବଜାର ଦର ଠିକ୍ଭାବେ ବୁଝିବା ସହ ସାବଧାନତା ଅବଲମ୍ବନ କରିବାର ଆବଶ୍ୟକତା ରହିଛି।
