ପୁରୀ ଅଫିସ,୧୦।୫: ଜୁନ୍ ୨୩ରେ ରଥଯାତ୍ରା। ତେଣୁ ରଥଖଖଳାରେ ଚାଲିଛି ତିନିରଥ ନିର୍ମାଣ। ବର୍ତ୍ତମାନ ମହାମାରୀ କରୋନା ଯେଉଁଭଳି ଭାବେ ରାଜ୍ୟରେ ମାଡ଼ୁଛି ତାହାକୁ ଦୃଷ୍ଟିରେ ରଖି ରଥ ନିର୍ମାଣରେ ଯେପରି ସାମାନ୍ୟତମ ଅସୁବିଧା ନ ହୁଏ ସେଥିଲାଗି ମନ୍ଦିର ପ୍ରଶାସନ ପକ୍ଷରୁ ବିଭିନ୍ନ ପଦକ୍ଷେପ ନିଆଯାଇଛି। ରବିବାରଠାରୁ ରଥ ନିର୍ମାଣକାରୀ ସେବକମାନେ ସଙ୍ଗରୋଧରେ ରହିବେ। ସେମାନଙ୍କ ଲାଗି ଆବଶ୍ୟକ ରୁମ୍ ନିଆଯାଇଥିବା ବେଳେ ଅନ୍ୟାନ୍ୟ ଆନୁଷଙ୍ଗିକ ବ୍ୟବସ୍ଥା କରାଯାଇଥିବା ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ କୁମାର ଜେନା କହିଛନ୍ତି।
ଉନ୍ନୟନ ପ୍ରଶାସକଙ୍କ ସୂଚନା ମୁତାବକ, ରଥ ନିର୍ମାଣରେ ସମ୍ପୃକ୍ତ ଭୋଇ, ମହାରଣାଙ୍କ ସମେତ ଅନ୍ୟ ସେବକମାନଙ୍କୁ କ୍ବାରାଣ୍ଟାଇନ (ସଙ୍ଗରୋଧ)ରେ ରଖାଯିବ। ଏଥିପାଇଁ ସମସ୍ତ ପ୍ରକାର ବ୍ୟବସ୍ଥା କରାଯାଇଛି। ନୀଳାଦ୍ରି ଭକ୍ତ ନିବାସରେ ୧୦୧ରୁମ୍, ଗୁଣ୍ଡିଚା ମନ୍ଦିର ଭକ୍ତ ନିବାସରେ ୭୦ ଏବଂ ନୀଳାଚଳ ଭକ୍ତ ନିବାସରେ ୩୫ଟି ରୁମ୍ ରଖାଯାଇଛି। ଯଦି ଆବଶ୍ୟକ ପଡ଼େ ତେବେ ଦୁଦୁୱାଲା ଧର୍ମଶାଳାରେ ମଧ୍ୟ ରହିବା ବ୍ୟବସ୍ଥା କରାଯିବ। ସେମାନଙ୍କ ଖାଦ୍ୟପେୟ ସହ ଅନ୍ୟାନ୍ୟ ଆନୁଷଙ୍ଗିକ ବ୍ୟବସ୍ଥା କରାଯାଇଛି ବୋଲି ଉନ୍ନୟନ ପ୍ରଶାସକ କହିଛନ୍ତି। ସେହିପରି କୋଭିଡ୍-୧୯ ଗାଇଡ୍ଲାଇନକୁ ନଜରରେ ରଖି ରଥ ନିର୍ମାଣକାରୀ ଏବଂ ସେମାନଙ୍କ ପରିବାର ସଦସ୍ୟଙ୍କ ସ୍ବାସ୍ଥ୍ୟ ଯାଞ୍ଚ ଲାଗି ୪ଟି ସ୍ବତନ୍ତ୍ର ଟିମ୍ ଗଠନ କରାଯାଇଛି। ଭକ୍ତ ନିବାସରେ ରହୁଥିବା ସେବକଙ୍କ ଲାଗି ଗୋଟିଏ ଟିମ୍, ରଥଖଳା ପାଇଁ ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟରେ ଗୋଟିଏ ଟିମ୍, ଜରୁରିକାଳୀନ ସେବା ପାଇଁ ଗୋଟିଏ ଏବଂ ସେବକ ପରିବାର ସଦସ୍ୟଙ୍କ ନିମନ୍ତେ ଗୋଟିଏ ଟିମ୍ ପ୍ରସ୍ତୁତ କରାଯାଇଛି। ମହାପ୍ରଭୁ ଶ୍ରୀଜଗନ୍ନାଥଙ୍କ କୃପାରୁ ପୁରୀର ସ୍ଥିତି ଭଲ ଅଛି। ତଥାପି କୌଣସି ରଥ ନିର୍ମାଣକାରୀ ସେବକଙ୍କ ସ୍ବାସ୍ଥ୍ୟ ସମସ୍ୟା କିମ୍ବା କୋଭିଡ ଲକ୍ଷଣ ଦେଖାଦେଲେ ତାଙ୍କୁ ପୃଥକବାସରେ ରଖାଯିବ। କାମକୁ ଛଡ଼ାଯିବ ନାହିଁ ବୋଲି ସିଡିଏମ୍ଓ ଡା. ନୀଳକଣ୍ଠ ମିଶ୍ର କହିଛନ୍ତି।
ଏ ସମ୍ପର୍କରେ ଉନ୍ନୟନ ପ୍ରଶାସକ ଜେନା କହିଛନ୍ତି, ରଥ ନିର୍ମାଣରେ ନିୟୋଜିତ ସେବାୟତଙ୍କୁ ସଙ୍ଗରୋଧରେ ରଖାଯିବା ନେଇ ସୂଚନା ଦିଆଯାଇଛି। ରବିବାର ସେମାନେ ପ୍ରସ୍ତୁତ ହୋଇଆସିବେ। ରଥଖଳାରେ କାମ କରିସାରିବା ପରେ ରାତିରେ ଭକ୍ତ ନିବାସରେ ରହିବେ।
