ମୁମ୍ବାଇ,୧୭।୭- ଲଣ୍ଡନଠାରେ ଚାଲିଥିବା ଆଇସିସି ବୈଠକରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର କୌଣସି ସଦସ୍ୟ ଯୋଗଦେଇ ପାରିବେ ନାହିଁ। ବିସିସିଆଇର କାର୍ଯ୍ୟକାରୀ ସମ୍ପାଦକ ଅମିତାଭ ଚୌଧାରୀଙ୍କୁ ଆଇସିସି ବୈଠକରେ ଯୋଗଦେବା ଲାଗି ମନୋନୀତ କରାଯାଇଥିଲା। ହେଲେ ତାଙ୍କ ବିରୋଧରେ ଥିବା ପୁରୁଣା ମାମଲାର ତଦନ୍ତ ଜାରି ରହିଥିବାରୁ ତାଙ୍କୁ ରାଞ୍ଚତ୍ ଛାଡ଼ିବାକୁ ଝାଡ଼ଖଣ୍ଡ ହାଇକୋର୍ଟ ମନା କରିଛନ୍ତି। ଚୌଧାରୀ ଅଗ୍ରିମ ଜାମିନ ଲାଗି ଆବେଦନ କରିଥିଲେ, ଯାହାକୁ ହାଇକୋର୍ଟ ଖାରଜ କରିବା ସହ ରାଜ୍ୟର ରାଜଧାନୀରେ ରହିବାକୁ ନିର୍ଦ୍ଦେଶ ଦେଇଛନ୍ତି। ତାଙ୍କ ବିରୋଧରେ ୨୦୧୪ ଲୋକ ସଭା ନିର୍ବାଚନରେ ଇଭିଏମ୍ ସମ୍ପର୍କିତ ମାମଲା ଦାୟର ହୋଇଥିଲା। ଏହାର ଏବେ ତଦନ୍ତ ଚାଲିଛି। ଆଇସିସି ବୈଠକରେ ବିଶ୍ୱର ବିଭିନ୍ନ ଟି୨୦ ଲିଗ୍ ଯାଞ୍ଚ କରାଯିବା ଓ ଭାରତରେ ହେବାକୁ ଥିବା ବିଶ୍ୱକପ୍ ଟ୍ୟାକ୍ସ ଛାଡ଼ ସମ୍ପର୍କରେ ଆଲୋଚନା କରାଯିବ। ଆଇସିସି ବୈଠକ ଚଳିତ ସପ୍ତାହରେ ଶେଷ ହେବାକୁ ଥିବାବେଳେ ବିସିସିଆଇ ପରିଚାଳନା ଦାୟିତ୍ୱରେ ଥିବା ପ୍ରଶାସକ କମିଟି (ସିଓଏ)କୁ ଚୌଧାରୀଙ୍କ ଅନୁପସ୍ଥିତିରେ କିଏ ଯୋଗଦେବେ ଏପର୍ଯ୍ୟନ୍ତ ନିଷ୍ପତ୍ତି ହୋଇନାହିଁ।
