ଦୁବାଇ, ୩।୩ (ପି.ଟି.)- ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) ପକ୍ଷରୁ ସଦ୍ୟ ପ୍ରକାଶିତ ଟେଷ୍ଟ ର଼୍ୟାଙ୍କିଙ୍ଗ୍ରେ ଭାରତୀୟ ଦଳ ଶୀର୍ଷ ସ୍ଥାନ ବଜାୟ ରଖିଛି। ମୋଟ୍ ୧୧୬ ରେଟିଂ ପଏଣ୍ଟ ସହ ଭାରତ ପୂର୍ବଭଳି ପ୍ରଥମ ସ୍ଥାନରେ ସୁରକ୍ଷିତ ରହିଛି। ସେହିଭଳି ଭାରତ ବିପକ୍ଷରେ ଟେଷ୍ଟ ସିରିଜ କ୍ଲିନ ସୁଇପ୍ କରିଥିବା ନ୍ୟୁଜିଲାଣ୍ଡ ୧୧୦ ପଏଣ୍ଟ ସହ ୨ୟ ସ୍ଥାନ ହାସଲ କରିଛି। ଅଷ୍ଟ୍ରେଲିଆ (୧୦୮ ପଏଣ୍ଟ) ତାଲିକାର ୩ୟ ସ୍ଥାନରେ ରହିଛି। ଚଳିତ ବିଶ୍ୱ ଟେଷ୍ଟ ଚାମ୍ପିୟନଶିପ୍ରେ ଭାରତ ପ୍ରଥମଥର ଲାଗି ଟେଷ୍ଟ ସିରିଜ ହାରିଛି।
ବ୍ୟାଟିଂ ତାଲିକାରେ ଭାରତୀୟ ଅଧିନାୟକ ବିରାଟ କୋହଲି ପୂର୍ବବତ୍ ମାନ୍ୟତାର ୨ୟ ସ୍ଥାନରେ ରହିଛନ୍ତି। ଅଷ୍ଟ୍ରେଲିଆର ଷ୍ଟିଭ ସ୍ମିଥ୍ ଏକ ନମ୍ବର ସ୍ଥାନ ବଜାୟ ରଖିଛନ୍ତି। ନ୍ୟୁଜିଲାଣ୍ଡ ବିପକ୍ଷ ସିରିଜ କୋହଲିଙ୍କ ପାଇଁ ଅତ୍ୟନ୍ତ ନୈରାଶ୍ୟଜନକ ରହିଥିଲା। ଦୁଇ ଟେଷ୍ଟ ମ୍ୟାଚ୍ର ୪ ଇନିଂସରେ ସେ ମୋଟ୍ ୩୮ ରନ୍ ସଂଗ୍ରହ କରିଥିଲେ। ଭାରତୀୟ ବ୍ୟାଟ୍ସମ୍ୟାନଙ୍କ ମଧ୍ୟରେ ପୃଥ୍ବୀ ଶ’ ୧୭ଟି ପାହାଚ ଉପରକୁ ଉଠି ୭୬ତମ ସ୍ଥାନରେ ରହିଛନ୍ତି। ନ୍ୟୁଜିଲାଣ୍ଡର ଓପନର୍ ଟମ୍ ବ୍ଲଣ୍ଡେଲ ୭୩ରୁ ୪୬ତମ ସ୍ଥାନକୁ ଲମ୍ଫ ପ୍ରଦାନ କରିଛନ୍ତି। ବୋଲିଂରେ ନ୍ୟୁଜିଲାଣ୍ଡର ଟିମ୍ ସୌଦୀ ୨ଟି ପାହାଚ ଉପରକୁ ଉଠି ୪ର୍ଥ ସ୍ଥାନ ପାଇଛନ୍ତି। ଶ୍ରେଷ୍ଠ ଭାରତୀୟ ବୋଲର ଭାବେ ଯଶପ୍ରୀତ୍ ବୁମ୍ରା ୭ମ ସ୍ଥାନରେ ରହିଛନ୍ତି। ନ୍ୟୁଜିଲାଣ୍ଡର ସବୁଠାରୁ ଡେଙ୍ଗା କ୍ରିକେଟର୍ ବିବେଚିତ ହୋଇଥିବା କାଏଲ୍ ଜେମିସନ ୮୦ରୁ ୪୩ତମ ସ୍ଥାନକୁ ଉଠିଛନ୍ତି।
