ମେଲବୋର୍ନ, ୨୩ା୫ (ପି.ଟି.):ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଏକ ଅର୍ଥ ଉପାର୍ଜନକାରୀ ଇଭେଣ୍ଟ। ଚଳିତବର୍ଷ ହେବାକୁ ଥିବା ଟି୨୦ ବିଶ୍ୱକପ୍ ଅପେକ୍ଷା ଏହି ଟୁର୍ନାମେଣ୍ଟକୁ ପ୍ରାଥମିକତା ଦିଆଯିବା ଉଚିତ୍ ନୁହେଁ ବୋଲି କହିଛନ୍ତି ଅଷ୍ଟ୍ରେଲିଆର ପୂର୍ବତନ ଅଧିନାୟକ ଆଲାନ ବର୍ଡର। କୋଭିଡ୍-୧୯ ମହାମାରୀ ଯୋଗୁ ଆଇପିଏଲ୍ର ୧୩ତମ ସଂସ୍କରଣକୁ ଅନିର୍ଦ୍ଦିଷ୍ଟକାଳ ପର୍ଯ୍ୟନ୍ତ ସସ୍ପେଣ୍ଡ କରାଯାଇଛି। ଯଦି ଅଷ୍ଟ୍ରେଲିଆରେ ହେବାକୁଥିବା ଟି୨୦ ବିଶ୍ୱକପ୍କୁ ସ୍ଥଗିତ ରଖାଯାଏ ତେବେ ଏହାକୁ ଅକ୍ଟୋବର-ନଭେମ୍ବରରେ ଆୟୋଜନ କରିବା ନେଇ କଳ୍ପନାଜଳ୍ପନା ପ୍ରକାଶ ପାଇଛି। ମୁଁ ଏଥିରେ ଆଦୌ ଖୁସି ନୁହେଁ। ବିଶ୍ୱକ୍ରୀଡ଼ା ତୁଳନାରେ ଆଞ୍ଚଳିକ ପ୍ରତିଯୋଗିତାକୁ ପ୍ରାଥମିକତା ଦେବା ଉଚିତ୍ ନୁହେଁ। ଟି୨୦ ବିଶ୍ୱକପ୍ ଯଦି ଆଗକୁ ନ ଯାଏ ତେବେ ଆଇପିଏଲ ଆଗେଇ ପାରିବ ନାହିଁ। ଯଦି ଏଥର ଆଇପିଏଲ୍କୁ ପ୍ରାଥମିକତା ଦିଆଯାଏ ତେବେ ବିଭିନ୍ନ ଦେଶର କ୍ରିକେଟ ବୋର୍ଡଗୁଡ଼ିକ ସେମାନଙ୍କ ଖେଳାଳିମାନଙ୍କୁ ଆଇପିଏଲ୍ରେ ଭାଗ ନେବାଲାଗି ଅନୁମତି ଦେବା ଉଚିତ୍ ନୁହେଁ। ଅଷ୍ଟ୍ରେଲିଆର ପ୍ୟାଟ୍ କୁମିନ୍ସ ଏହି ଲିଗ୍ରେ ସବୁଠାରୁ ଦାମୀ ବିଦେଶୀ ଖେଳାଳି ବିବେଚିତ ହୋଇଛନ୍ତି। ସେ ୩.୧୭ ଅଷ୍ଟ୍ରେଲୀୟ ଡଲାର (ଭାରତୀୟ ମୁଦ୍ରାରେ ୧୫.୫୦ କୋଟି ଟଙ୍କା)ରେ ବିକ୍ରି ହୋଇଛନ୍ତି। ଗ୍ଲେନ ମାକ୍ସଓ୍ବେଲ ଓ ଡେଭିଡ୍ ଓ୍ବାର୍ନରଙ୍କ ଭଳି ଖେଳାଳିଙ୍କୁ ସେମାନଙ୍କ ଫ୍ରାଞ୍ଚାଇଜ୍ ବହୁ ମୂଲ୍ୟରେ କ୍ରୟ କରିଛନ୍ତି। ଇଣ୍ଟରନ୍ୟାଶନାଲ କ୍ରିକେଟ କାଉନ୍ସିଲ(ଆଇସିସି) ରାଜସ୍ବରେ ଭାରତର ଅବଦାନ ସବୁଠାରୁ ଅଧିକ ବୋଲିଏହାସତ୍ତ୍ୱେ ଟି୨୦ ବିଶ୍ୱକପ୍ ତୁଳନାରେ ଆଇପିଏଲକୁ ପ୍ରାଥମିକତା ଦେବା ଅର୍ଥ ଭୁଲ୍ ରାସ୍ତାରେ ଯିବା।
