ଭୁବନେଶ୍ୱର, ୩୦।୫(କ୍ରୀଡ଼ା ପ୍ରତିନିଧି): ଓଡ଼ିଶା ଜିମ୍ନାଷ୍ଟିକ୍ ଆସୋସିଏଶନ(ଓଜିଏ) ସମ୍ପାଦକ ଅଶୋକ ସାହୁ ଜିମ୍ନାଷ୍ଟିକ୍ସ ଫେଡେରେଶନ ଅଫ୍ ଇଣ୍ଡିଆ( ଜିଏଫଆଇ) ଚୟନ କମିଟି ଅଧ୍ୟକ୍ଷଭାବେ ନିଯୁକ୍ତ ହୋଇଛନ୍ତି। ସେ ୪ ବର୍ଷ ପାଇଁ ଏହି ପଦବୀରେ ରହିବେ। ଅନ୍ୟ ୬ ସଦସ୍ୟଙ୍କ ସହ ମିଶି ସେ ଏଣିକି ଜାତୀୟ ଦଳ ଚୟନ କରିବେ। ରାଜ୍ୟରେ କୌଣସି ବ୍ୟକ୍ତି ଏପରି ଏକ ପଦବୀରେ ଅବସ୍ଥାପିତ ହେବା ପ୍ରଥମ ଘଟଣା। ତେଣୁ ଏହି ଖବର ରାଜ୍ୟ କ୍ରୀଡ଼ା ମହଲରେ ଖୁସି ଆଣିଦେଇଛି। କଟକରେ ଜନ୍ମିତ ଅଶୋକ ଜଣେ ଜିମ୍ନାଷ୍ଟିକ ଖେଳାଳି ମଧ୍ୟ । ସେ ରାଜ୍ୟ ପକ୍ଷରୁ ବିଭିନ୍ନ ଜାତୀୟ ସ୍ତରୀୟ ଟୁର୍ନାମେଣ୍ଟରେ ପ୍ରତିନିଧିତ୍ୱ କରିଛନ୍ତି । ସେ ପୂର୍ବରୁ ଜିଏଫଆଇର ଯୁଗ୍ମ ସମ୍ପାଦକ ଏବଂ ଉପସଭାପତି ଦାୟିତ୍ୱ ତୁଲାଇଥିଲେ। ଅନେକ ଅନ୍ତର୍ଜାତୀୟ ପ୍ରତିଯୋଗିତା ସମୟରେ ସେ ଭାରତୀୟ ଦଳର ମ୍ୟାନେଜର ଦାୟିତ୍ୱ ମଧ୍ୟ ସଫଳତାର ସହ ତୁଲାଇ ଆସିଛନ୍ତି। ଏହା ମଧ୍ୟରେ ରହିଛି ୨୦୧୦ ଟୋକିଓ ଅନ୍ତର୍ଜାତୀୟ ଜୁନିୟର ଜିମ୍ନାଷ୍ଟିକ୍ସ ଚାମ୍ପିୟନଶିପ୍, ୨୦୧୦ ନୂଆଦିଲ୍ଲୀ ରାଜ୍ୟଗୋଷ୍ଠୀ କ୍ରୀଡ଼ା, ୨୦୧୧ ଟୋକିଓ ବିଶ୍ୱ ଜିମ୍ନାଷ୍ଟିକ୍ସ ଚାମ୍ପିୟନଶିପ୍ ଏବଂ ୨୦୧୪ ଇଞ୍ଚତ୍ଅନ (ଦକ୍ଷିଣ କୋରିଆ) ଏସିଆନ ଗେମ୍ସ। ଓଡ଼ିଶା ଆଥଲେଟିକ୍ ଆସୋସିଏଶନ ସମ୍ପାଦକ ଆଶୀର୍ବାଦ ବେହେରା, ଓଜିଏ ସଭାପତି ସମୀର ଦେ, ଓଡ଼ିଶା କ୍ରିକେଟ ଆସୋସିଏଶନ ସମ୍ପାଦକ ସଞ୍ଜୟ ବେହେରା, ଓଡ଼ିଶା ଅଲିମ୍ପିକ ଆସୋସିଏଶନ ସଭାପତି ଅଭିଜିତ ପାଲ ପ୍ରମୁଖ ଅଶୋକଙ୍କୁ ଅଭିନନ୍ଦନ ଜଣାଇଥିବା ରାଜ୍ୟ ଜିମ୍ନାଷ୍ଟିକ ଆସୋସିଏଶନ ସୂତ୍ରରୁ ପ୍ରକାଶ।
