ବାଙ୍ଗାଲୋର,୨୪।୮: କ୍ରୀଷ୍ଣପା ଗୌଥମ ଶୁକ୍ରବାର ବୋଧହୁଏ କ୍ରିକେଟ ଇତିହାସରେ ଶ୍ରେଷ୍ଠ ଅଲରାଉଣ୍ଡର ପ୍ରଦର୍ଶନ କରିଛନ୍ତି। କର୍ନାଟକ ପ୍ରିମିୟର ଲିଗ୍(କେପିଏଲ)ରେ ବଲାରି ଟସ୍କର୍ସ ପାଇଁ ଖେଳୁଥିବା ଡାହାଣହାତୀ ବ୍ୟାଟ୍ସମ୍ୟାନ ୩୯ ବଲରୁ ଶତକ ଲଗାଇଛନ୍ତି। ମୋଟ ଉପରେ ୫୬ ବଲ ଖେଳି ୧୩୪ ରନ୍ କରି ନଟ୍ଆଉଟ୍ ଥିଲେ। ତାଙ୍କ ଇନିଂସରେ ୧୩ ଛକା ଓ ୭ ଚୌକା ସାମିଲ ଥିଲା। ଏଥିସହ ସେ କେପିଏଲ ଗୋଟିଏ ଇନିଂସରେ ସର୍ବାଧିକ ଛକା ଲଗାଇବାର ରେକର୍ଡର ଅଧିକାରୀ ହୋଇଛନ୍ତି। ଏହାପରେ ବୋଲିଂରେ ସେ ଟି୨୦ ଇତିହାସର ଶ୍ରେଷ୍ଠ ସ୍ପେଲ ପକାଇଛନ୍ତି। ୪ ଓଭର ବୋଲିଂ କରିି ୧୫ ରନ୍ ବିନିମୟରେ ୮ ଉଇକେଟ ନେଇଥିଲେ। ତାଙ୍କର ଏଭଳି ଅଲରାଉଣ୍ଡିଂ ଶୋ ଯୋଗୁ ଶିବମୋଗା ଲାୟନ୍ସ ୭୦ ରନ୍ରେ ପରାଜୟ ବରଣ କରିଥିଲା। ଚଳିତ ମାସରେ ଭିଟାଲିଟି ବ୍ଲାଷ୍ଟ ମ୍ୟାଚ୍ରେ କଲିନ ଆକରମାନ୍ନ (୭/୧୮)ଙ୍କ ସ୍ପେଲଠାରୁ ଗୌଥମଙ୍କ ବୋଲିଂ ସ୍ପେଲ ଉନ୍ନତର। ହେଲେ ଏହାକୁ ଅଫିସିଆଲ ରେକର୍ଡ ବୁକ୍ରେ ସାମିଲ କରାଯିବ ନାହିଁ। କାରଣ ରାଜ୍ୟ ଟି୨୦ ଲିଗ୍କୁ ଏପର୍ଯ୍ୟନ୍ତ ଅଫିସିଆଲ ଟି୨୦ ମାନ୍ୟତା ମିଳି ନାହିଁ। ତେବେ ଗୌଥମଙ୍କ ପ୍ରଦର୍ଶନରେ କ୍ରିକେଟ ଜଗତ ଟୁଇଟର ଜରିଆରେ ଖୁସି ପ୍ରକାଶ କରିଛନ୍ତି।
