କରାଚି, ୨୨।୭ (ପି.ଟି.)- ଶେଷ ହୋଇଥିବା ଆଇସିସି ବିଶ୍ୱକପ୍ରେ ନୈରାଶ୍ୟଜନକ ପ୍ରଦର୍ଶନ ପରେ ପାକିସ୍ତାନ କ୍ରିକେଟ୍ ବୋର୍ଡ (ପିସିବି) ଉଭୟ ଦିନିକିଆ ଓ ଟେଷ୍ଟ ଫର୍ମାଟ୍ ପାଇଁ ଭିନ୍ନ ଭିନ୍ନ ଅଧିନାୟକ ଓ କୋଚ୍ ନିଯୁକ୍ତ କରିବା ସପକ୍ଷରେ ରହିଛି। ପିସିବିର ଜୈନିକ ଅଧିକାରୀଙ୍କ ସୂଚନା ଅନୁଯାୟୀ ଚଳିତ ମାସ ଅନ୍ତିମ ଭାଗରେ କ୍ରିକେଟ୍ କମିଟି ବୈଠକ ଅନୁଷ୍ଠିତ ହେବ। ଏଥିରେ ଭିନ୍ନ ଫର୍ମାଟ୍ ଲାଗି ଅଲଗା ଅଧିନାୟକ ଓ କୋଚ୍ ରଖିବା ପାଇଁ ପ୍ରସ୍ତାବ ଦିଆଯିବ ଏବଂ ଏହା ଉପରେ ଆଲୋଚନା କରାଯିବ ବୋଲି ଏହି ଅଧିକାରୀଜଣଙ୍କ ସୂଚନା ଦେଇଛନ୍ତି। ‘ଆସନ୍ତା ବର୍ଷ ହେବାକୁ ଥିବା ଟି୨୦ ବିଶ୍ୱକପ୍ ପୂର୍ବରୁ ପାକିସ୍ତାନ ଟେଷ୍ଟ ଚାମ୍ପିୟନଶିପ୍ରେ ଶ୍ରୀଲଙ୍କା, ଅଷ୍ଟ୍ରେଲିଆ, ବାଂଲାଦେଶ ଓ ଇଂଲଣ୍ଡ ବିପକ୍ଷରେ ୮ ଟେଷ୍ଟ ମ୍ୟାଚ୍ ଖେଳିବାର କାର୍ଯ୍ୟସୂଚୀ ରହିଛି। ତେଣୁ ଟେଷ୍ଟରେ କିପରି ଉନ୍ନତ ପ୍ରଦର୍ଶନ କରିହେବ ପିସିବି ଏହା ଉପରେ ଧ୍ୟାନ ଦେଉଛି। କିନ୍ତୁ ବୋର୍ଡ ବର୍ତ୍ତମାନ ଟେଷ୍ଟ ଓ ଦିନିକିଆ ପାଇଁ ଅଲଗା ଅଲଗା ଅଧିନାୟକ ଓ କୋଚ୍ ନିଯୁକ୍ତ କରିବାକୁ ଚିନ୍ତା କରୁଛି’ ବୋଲି ପିସିବିର ଏହି ଅଧିକାରୀ କହିଛନ୍ତି। ପିସିବି ମ୍ୟାନେଜିଂ ଡିରେକ୍ଟର ଓ୍ବାସିମ ଖାଁ ଓ କ୍ରିକେଟ୍ କମିଟିର ସଦସ୍ୟ ତଥା ପୂର୍ବତନ ଦ୍ରୁତ ବୋଲର ଓ୍ବାସିମ ଆକ୍ରମ ଚଳିତ ମାସ ପ୍ରାରମ୍ଭରେ ଲଣ୍ଡନରେ ପରସ୍ପରକୁ ଭେଟିଥିଲେ। ଏଥିରେ ଅଧିନାୟକ ସର୍ଫରାଜ ଅହମ୍ମଦ ଓ କୋଚ୍ ମିକି ଆର୍ଥରଙ୍କୁ ଆସନ୍ତାବର୍ଷ ହେବାକୁ ଥିବା ଟି୨୦ ବିଶ୍ୱକପ୍ ପର୍ଯ୍ୟନ୍ତ ସୀମିତ ଓଭର କ୍ରିକେଟ୍ରେ ସେମାନଙ୍କ ପଦ ବଜାୟ ରଖିବାକୁ ଆକ୍ରମ ପରାମର୍ଶ ଦେଇଥିଲେ। ପାକିସ୍ତାନ ବର୍ତ୍ତମାନ ଆଇସିସି ଦିନିକିଆ ର଼୍ୟାଙ୍କିଙ୍ଗ୍ରେ ୬ଷ୍ଠ ଓ ଟି୨୦ରେ ଏକ ନମ୍ବର ସ୍ଥାନ ବଜାୟ ରଖିଛି। କିନ୍ତୁ ଟେଷ୍ଟ ମାନ୍ୟତାରେ ସର୍ଫରାଜ ଓ ଆର୍ଥର ଗତ ଅଢ଼େଇ ବର୍ଷ ମଧ୍ୟରେ ପ୍ରଭାବୀ ପ୍ରଦର୍ଶନ କରିପାରିନାହାନ୍ତି। ଆଇସିସି ଟେଷ୍ଟ ମାନ୍ୟତାରେ ପାକିସ୍ତାନ ବର୍ତ୍ତମାନ ୭ମ ସ୍ଥାନରେ ରହିଛି। େfତଣୁ ଧଳା ଓ ଲାଲ୍ ବଲ କ୍ରିକେଟ୍ରେ କୋଚ୍ ଓ ଅଧିନାୟକ ଅଲଗା ଅଲଗା ନିଯୁକ୍ତ କରିବାକୁ ପିସିସି ଚିନ୍ତା କରୁଛି।
