ନୂଆଦିଲ୍ଲୀ, ୧୩ା୫ (ପି.ଟି.): ସର୍ବଭାରତୀୟ ଫୁଟ୍ବଲ ମହାସଂଘ (ଏଆଇଏଫ୍ଏଫ୍) ଚଳିତ ବର୍ଷର ଅର୍ଜୁନ ପୁରସ୍କାର ପାଇଁ ଜାତୀୟ ଦଳର ସେଣ୍ଟ୍ରାଲ ଡିଫେଣ୍ଡର ସନ୍ଦେଶ ଝିଙ୍ଗାନ୍ ଏବଂ ମହିଳା ଦଳର ଷ୍ଟ୍ରାଇକର ଏନ୍. ବାଲା ଦେବୀଙ୍କ ନାମ ସୁପାରିସ କରିଛି। ଚଳିତ ବର୍ଷର କ୍ରୀଡ଼ା ପୁରସ୍କାର ପାଇଁ ପ୍ରାର୍ଥୀଙ୍କ ନାମ ଅନ୍ଲାଇନ୍ରେ ସୁପାରିସ କରିବା ଲାଗି କ୍ରୀଡ଼ା ମନ୍ତ୍ରଣାଳୟ ପକ୍ଷରୁ ନିକଟରେ ନିର୍ଦ୍ଦେଶାନାମା ପ୍ରକାଶ ପାଇଥିଲା। କିଛିବର୍ଷ ହେଲା ଏହିି ଖେଳାଳି ଦ୍ୱୟ ସ୍ଥିର ପ୍ରଦର୍ଶନ କରି ଆସୁଥିବାରୁ ପ୍ରାର୍ଥୀ ଚୟନରେ କୌଣସି ଅସୁବିଧା ହୋଇ ନ ଥିଲା ବୋଲି ଏଆଇଏଫ୍ଏଫ୍ ସାଧାରଣ ସମ୍ପାଦକ କୁଶାଲ ଦାସ ପ୍ରକାଶ କରିଛନ୍ତି। ୨୬ବର୍ଷୀୟ ଝିଙ୍ଗାନ୍ ସିକ୍କିମ ୟୁନାଇଟେଡ୍ ଦଳରେ ବାଇଚୁଙ୍ଗ୍ ଭୂତିଆ ଏବଂ ରିନେଡୀ ସିଂଙ୍କ ଭଳି ଷ୍ଟାର ଖେଳାଳିଙ୍କ ସହ ଖେଳି ସୁନୀଲ ଛେତ୍ରୀଙ୍କ ପଛକୁ ନିଜକୁ ଭାରତୀୟ ଦଳର ଅନ୍ୟତମ ଶ୍ରେଷ୍ଠ ଖେଳାଳି ଭାବେ ପ୍ରତିଷ୍ଠିତ କରିପାରିଛନ୍ତି। ୨୦୧୫ ଫିଫା ବିଶ୍ୱକପ୍ କ୍ୱାଲିଫାୟରରେ ଭାରତ ତରଫରୁ ସେ ତାଙ୍କ ପଦାର୍ପଣ ମ୍ୟାଚ ଖେଳିଥିଲେ। ଇଣ୍ଡିନ୍ ସୁପର ଲିଗ୍ ଟିମ୍ କେରଳ ବ୍ଲାଷ୍ଟର୍ସର ମଧ୍ୟ ସେ ଜଣେ ପ୍ରମୁଖ ଖେଳାଳି ବିବେଚିତ ହେଉଛନ୍ତି। ଝିଙ୍ଗାନ୍୍ଙ୍କ ଦକ୍ଷତା ଓ ପରିପକ୍ୱତା ଉପରେ ପୂର୍ବତନ ଜାତୀୟ ଦଳର କୋଚ୍ ଷ୍ଟିଫେନ୍ କନଷ୍ଟାଣ୍ଟିନ ପ୍ରଗାଢ଼ ଆସ୍ଥା ରହିଥିଲା। ଫଳରେ ଛେତ୍ରୀଙ୍କ ଇଞ୍ଜୁରୀ ସମୟରେ ସେ ଝିଙ୍ଗାନ୍୍ଙ୍କୁ ଅଧିନାୟକ ଦାୟିତ୍ୱ ଦେଇଥାନ୍ତି। ଇଣ୍ଡିଆନ ସୁପର ଲିଗ୍ରେ ସେ ଅନେକଥର ରାଇଟ୍ ବ୍ୟାକ୍ ଦାୟିତ୍ୱ ତୁଲାଇଛନ୍ତି। ସବୁବେଳେ ସ୍ଥିର ପ୍ରଦର୍ଶନ କରିଆସୁଥିବା ଝିଙ୍ଗାନ୍୍ଙ୍କର ଏପର୍ଯ୍ୟନ୍ତ ଶ୍ରେଷ୍ଠ ପ୍ରଦର୍ଶନ ୨୦୧୯ ଏଏଫ୍ସି ଏସିଆନ୍ କପ୍ରେ ଦେଖିବାକୁ ମିଳିଥିଲା। ବର୍ତ୍ତମାନ ଭାରତୀୟ ମହିଳା ଦଳର ଅନ୍ୟତମ ଶ୍ରେଷ୍ଠ ଖେଳାଳି ହେଲେ ମଣିପୁରର ୩୦ ବର୍ଷୀୟା ବାଲା ଦେବୀ। ସ୍କଟିଶ ମହିଳା ପ୍ରିମିୟର ଲିଗ୍ ଦଳ ରେଞ୍ଜର୍ସ ଏଫ୍ସି ସହିତ ସେ ୧୮ ମାସିଆ ଚୁକ୍ତି କରିଛନ୍ତି। ଜଣେ ପ୍ରଫେସନାଲ ଖେଳାଳି ଭାବେ ଦେଶ ବାହାରେ ଖେଳିବାରେ ସେ ପ୍ରଥମ ଭାରତୀୟ ମହିଳା। କରୋନା ଭାଇରସ୍ ଉପରେ ଜନ ସଚେତନତା ସୃଷ୍ଟି ପାଇଁ ଏସିଆନ ଫୁଟ୍ବଲ କନଫେଡେରେଶନ ଦ୍ୱାରା‘# ବ୍ରେକ୍ ଦ ଚେନ୍’ ଭିଡିଓ ପ୍ରସ୍ତୁତ କରାଯାଇଛି। ଏଥିରେ ମହାଦେଶର ଯେଉଁ କେତେଜଣ ଖେଳାଳି ସ୍ଥାନ ପାଇଛନ୍ତି ସେମାନଙ୍କ ମଧ୍ୟରେ ବାଲା ଦେବୀ ରହିଛନ୍ତି।
