ଅନୁଗୋଳ ଅଫିସ୍, ୧୪।୩
ଏକ ଡକାୟତି ମାମଲାର ବିଚାର କରି ଅନୁଗୋଳ ଆସିଷ୍ଟାଣ୍ଟ ସେସନ୍ସ ଜଜ୍ କମ୍ ସିଜେଏମ୍ କୋର୍ଟ ଅଭିଯୁକ୍ତ ଜରାସିଂହାର କାଳିଆ ଓରଫ ପ୍ରଦୀପ ବେହେରା(୨୮)ଙ୍କୁ ଦୋଷୀ ସାବ୍ୟସ୍ତ କରିବା ସହ ୭ ବର୍ଷ କାରାଦଣ୍ଡାଦେଶ ପ୍ରଦାନ କରିଛନ୍ତି। ଏଥିସହ ୫ ହଜାର ଟଙ୍କା ଜରିମାନା ଦେବାକୁ ବିଚାରପତି ସି.ଏଚ. ବାସୁଦେବ ପାତ୍ର ନିର୍ଦ୍ଦେଶ ଦେଇଛନ୍ତି। ଜରିମାନା ଅନାଦାୟସ୍ଥଳେ ଅଧିକ ୧ ବର୍ଷ କାରାଦଣ୍ଡ ଭୋଗିବାକୁ କୋର୍ଟ ରାୟରେ ଉଲ୍ଲେଖ କରିଛନ୍ତି।
ମାମଲାର ବିବରଣୀରୁ ପ୍ରକାଶ ଯେ, ୨୦୧୪ ଅଗଷ୍ଟ ୯ରେ କୁମଣ୍ଡ (ଭଣ୍ଡୁବର) ଗ୍ରାମର ପ୍ରିୟବ୍ରତ ଦେହୁରୀଙ୍କ ଘରେ ସଶସ୍ତ୍ର ଡକାୟତି ହୋଇଥିଲା। ସନ୍ଧ୍ୟା ୮ଟାରେ କେତେଜଣ ଦୁର୍ବୃତ୍ତ ବନ୍ଧୁକ ଓ ଭୁଜାଲି ଦେଖାଇ ପ୍ରିୟବ୍ରତଙ୍କ ବାପା ପ୍ରସନ୍ନ କୁମାର ଦେହୁରୀଙ୍କୁ ମାଡ଼ ମାରିଥିଲେ। ବିରୋଧ କରିବାରୁ ପ୍ରିୟବ୍ରତଙ୍କ ହାତ ଗୋଡ଼ ବାନ୍ଧି ଦେଇଥିଲେ। ପରେ ତାଙ୍କ ଜେଜେ ମା’ ଓ ଜେଜେ ବାପାଙ୍କୁ ଗୋଟିଏ ଘରେ ଭର୍ତ୍ତି କରିବା ସହ ମା ଓ ଭଉଣୀଙ୍କୁ ମାଡ଼ ମାରି ଚେନ୍, କାନ ଫୁଲ, ମୁଦି ଓ ଆଲମାରିରେ ଥିବା ୩୦ ହଜାର ଟଙ୍କା, ୫ଟି ମୋବାଇଲ ଏବଂ ଲାପଟପ ନେଇ ଚମ୍ପଟ ମାରିଥିଲେ। ଅଭିଯୋଗ ପାଇ ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରି ପ୍ରଦୀପ ବେହେରାଙ୍କ ସହ କେତେଜଣଙ୍କୁ କାବୁ କରିଥିଲା। ଇତିମଧ୍ୟରେ ପ୍ରଦୀପଙ୍କ ଶୁଣାଣି ଶେଷ ହୋଇଥିବାବେଳେ ଅନ୍ୟମାନଙ୍କ ବିଚାର ପ୍ରକ୍ରିୟା ଜାରି ରହିଛି ବୋଲି କୋର୍ଟ ପକ୍ଷରୁ ସୂଚନା ମିଳିଛି। ସରକାରଙ୍କ ପକ୍ଷରୁ ଏପିପି ଧ୍ରୁବ ଚରଣ ସାହୁ ମାମଲା ପରିଚାଳନା କରିଥିଲେ।
