ଭୁବନେଶ୍ୱର, ୩।୬(କ୍ରୀଡ଼ା ପ୍ରତିନିଧି): ଏସ୍ଆର୍ ଚେସ୍ ସେଣ୍ଟର ଆନୁକୂଲ୍ୟରେ ଆୟୋଜିତ ୫ମ ଅନ୍ଲାଇନ୍ ଚେସ୍ ଟୁର୍ନାମେଣ୍ଟରେ ଶୁଭମ୍ଜ୍ୟୋତି ସାହୁ ଚାମ୍ପିୟନ ହୋଇଛନ୍ତି। ୬ ରାଉଣ୍ଡ ବିଶିଷ୍ଟ ପ୍ରତିଯୋଗିତାରେ ଶୁଭମ୍ ୫ ପଏଣ୍ଟ ପାଇଥିଲେ। ଶିବାଂଶ ମିଶ୍ର, ପ୍ରତୀକ ଚୌରାସିଆ ଓ ତନ୍ମୟ ତ୍ରିପାଠୀ ମଧ୍ୟ ୫ ପଏଣ୍ଟ ଲେଖାଏ ପାଇଥିଲେ ହେଁ ଯଥାକ୍ରମେ ଦ୍ୱିତୀୟ, ତୃତୀୟ ଓ ୪ର୍ଥ ସ୍ଥାନ ଅଧିକାର କରିଛନ୍ତି। ୪ ପଏଣ୍ଟ ସହ ଜୀବନ ଜ୍ୟୋତି ୫ମ ସ୍ଥାନରେ ରହିଛନ୍ତି। ପ୍ରତିଯୋଗିତାରେ ଓଡ଼ିଶା ଏବଂ ବାହାର ରାଜ୍ୟର ମୋଟ ୪୭ ପ୍ରତିଯୋଗୀ ଭାଗ ନେଇଥିଲେ। ୯ ବର୍ଷରୁ କମ୍ ବିଭାଗରେ ପ୍ରତ୍ୟାଶା ଜେନା, ଶ୍ରେୟାଂସୀ ନାୟକ, ଶୁଭମ୍ ପ୍ରତୀକ ମିଶ୍ର ଏବଂ ୧୧ ବର୍ଷରୁ କମ୍ ବିଭାଗରେ ସାଇ ଅମ୍ୟତ ପରିଜା, ଆଦିତ୍ୟ ନାରାୟଣ ମହାନ୍ତି ଓ ଶ୍ରୀନିବାସ ରଥ ପ୍ରଭାବୀ ପ୍ରଦର୍ଶନ ପାଇଁ ପୁରସ୍କୃତ ହୋଇଥିଲେ। ବାଳିକା କାଟେଗୋରିରେ ଅନନ୍ତୋୟା ଚାଟାର୍ଜୀ ଏବଂ ସାଇ ସମ୍ପ୍ରଦା ମହାନ୍ତିଙ୍କୁ ପୁରସ୍କାର ପ୍ରଦାନ କରାଯାଇଥିଲା। ଅନ୍ତର୍ଜାତୀୟ ଫିଡେ ଇନ୍ଷ୍ଟ୍ରକ୍ଟର ତଥା ଏସ୍ଆର୍ ଚେସ୍ ସେଣ୍ଟରର ନିର୍ଦ୍ଦେଶକ ସତ୍ୟରଞ୍ଜନ ପଟ୍ଟନାୟକ, ଡାକ୍ତର ମାନସ ରଞ୍ଜନ ମିଶ୍ର ଓ ସତ୍ୟଜିତ ପଟ୍ଟନାୟକ ଟୁର୍ନାମେଣ୍ଟ ପରିଚାଳନା କରିଥିଲେ। କରୋନା ଭାଇରସ ସଂକ୍ରମଣ ଜନିତ ଲକ୍ଡାଉନ୍ ସ୍ଥିତିରେ ଏହା ପୂର୍ବରୁ ସେଣ୍ଟର ପକ୍ଷରୁ ୪ଟି ଅନ୍ଲାଇନ୍ ଟୁର୍ନାମେଣ୍ଟ ଅନୁଷ୍ଠିତ ହୋଇ ଯାଇଛି।
