ଭୁବନେଶ୍ୱର, ୩୦ା୧(ବ୍ୟୁରୋ): ସହରାଞ୍ଚଳରେ ବାସ କରୁଥିବା ଲୋକେ ସେମାନଙ୍କ ସମ୍ପତ୍ତି (ହୋଲ୍ଡିଂ) ଟିକସ ଦେବାକୁ ଏନ୍ଏସି, ମ୍ୟୁନିସିପାଲିଟି କିମ୍ବା ମହାନଗର ନିଗମ କାର୍ଯ୍ୟାଳୟକୁ ଦୌଡିବାକୁ ପଡିବ ନାହିଁ। ଘରେ ବସି ଅନ୍ଲାଇନ ଜରିଆରେ ଟିକସ ପଇଠ କରିପାରିବେ। ରାଜ୍ୟର ୧୧୪ ସହରାଞ୍ଚଳରେ ଏହି ବ୍ୟବସ୍ଥା ଲାଗୁ କରାଯାଇଥିବାବେଳେ ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ସହରର ୪ ସ୍ଥାନରେ ହେଲ୍ପଡେସ୍କ ଖୋଲାଯାଇଛି। ବୁଧବାର ଏନେଇ ନିର୍ଦ୍ଦେଶନାମା ପ୍ରକାଶ ପାଇଥିବାବେଳେ ବିଏମ୍ସି ମୁଖ୍ୟାଳୟ, ବିଏମ୍ସି ଦକ୍ଷିଣ ପଶ୍ଚିମ ଜୋନ୍ ଅନ୍ତର୍ଗତ ବରମୁଣ୍ଡା ରେଣ୍ଟାଲ କଲୋନୀସ୍ଥିତ କମ୍ୟୁନିଟି ସେଣ୍ଟର, ଦକ୍ଷିଣ ପୂର୍ବ ଜୋନର ସାମନ୍ତରାପୁରସ୍ଥିତ ଭୁଆଶୁଣି ମନ୍ଦିର ନିକଟ କାର୍ଯ୍ୟାଳୟ ଓ ଉତ୍ତର ଜୋନ୍ର ସାମନ୍ତବିହାରସ୍ଥିତ କାର୍ଯ୍ୟାଳୟରେ ଏହି ହେଲ୍ପଡେକ୍ସ ଖୋଲାଯାଇଛି।
ଲୋକଙ୍କୁ ସବୁପ୍ରକାର ସହାୟତା ଓ ପରାମର୍ଶ ଯୋଗାଇଦେବାକୁ ବିଏମ୍ସି ଡେପୁଟି କମିଶନରଙ୍କ ପି.ଏ. ସନ୍ତୋଷ କୁମାର ରାଉତରାୟ, ଦକ୍ଷିଣ ପଶ୍ଚିମ ଜୋନ୍ର ଓ୍ବାର୍ଡ ସୁପରଭାଇଜର ଭୁବନାନନ୍ଦ ପାଢ଼ୀ, ଦକ୍ଷିଣ ପୂର୍ବ ଜୋନ୍ର ଓ୍ବାର୍ଡ ସୁପରଭାଇଜର ଦେବୀପ୍ରସାଦ ଦାସ ଓ ଉତ୍ତର ଜୋନ୍ର ଓ୍ବାର୍ଡ ସୁପରଭାଇଜର ପ୍ରତାପ କୁମାର ବରାଡ଼ଙ୍କୁ ଦାୟିତ୍ୱ ଦିଆଯାଇଛି। ଦିନ ୧୦ଟାରୁ ଅପରାହ୍ନ ୫ଟା ଯାଏ ଲୋକେ ହୋଲ୍ଡିଂ ଟିକସ ପୈଠ ନେଇ କୌଣସି ସମସ୍ୟା ଉପୁଜିଲେ ସେମାନଙ୍କୁ ଯୋଗାଯୋଗ କରିପାରିବେ ବୋଲି ନିର୍ଦ୍ଦେଶନାମାରେ ଉଲ୍ଲେଖ କରାଯାଇଛି।
ଉଲ୍ଲେଖଯୋଗ୍ୟ, ଗତ ୨୦ ତାରିଖରେ ଲୋକସେବା ଭବନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସମ୍ପତ୍ତି ଟିକସ ମଡ୍ୟୁଲ ଏବଂ ମ୍ୟୁନିସିପାଲ ପ୍ରିମିୟର ଲିଗ୍(ଏମ୍ପିଏଲ୍)ର ଶୁଭାରମ୍ଭ କରିଥିଲେ। ଏହି ଅନ୍ଲାଇନ୍ ବ୍ୟବସ୍ଥା ଦ୍ୱାରା ୧୧୪ ସହରାଞ୍ଚଳର ପ୍ରାୟ ୭୦ ଲକ୍ଷ ଟିକସଦାତା କୌଣସି କାର୍ଯ୍ୟାଳୟକୁ ନ ଯାଇ ଟିକସ ପଇଠ କରିପାରିବେ। ୧୧୩ ସହରାଞ୍ଚଳର ହୋଲ୍ଡିଂ ଟିକସଦାତା ନିଜର ସ୍ମାର୍ଟଫୋନ କିମ୍ବା କମ୍ପ୍ୟୁଟର ଜରିଆରେ ଓ୍ବେବ୍ସାଇଟ www.ulbodisha.gov.in ଏବଂ ଭୁବନେଶ୍ୱର ମହାନଗର ନିଗମ(ବିଏମ୍ସି)ର ଟିକସଦାତା https://citizenservices.bhubaneswar.me ମାଧ୍ୟମରେ ଟିକସ ପଇଠ କରିପାରିବେ। ଟିକସ ପଇଠ ହେବା ପରେ ତୁରନ୍ତ ଟିକସଦାତାଙ୍କୁ ମେଲ/ମେସେଜ ଜରିଆରେ ରସିଦ ମିଳିବ ବୋଲି ଜଣାପଡ଼ିଛି।
