ଅନୁଗୋଳ ଅଫିସ, ୮।୬- ଦୀର୍ଘ ଦୁଇ ମାସ ପରେ ସୋମବାରଠାରୁ ଚଳଚଞ୍ଚଳ ହୋଇଛି ଅନୁଗୋଳ ରେଳ ଷ୍ଟେଶନ। କେନ୍ଦ୍ର ସରକାର କେତେକ ଟ୍ରେନ୍ ଚଳାଚଳକୁ ଅନୁମତି ଦେବା ପରେ ଆଜି ଗୋଟିଏ ଦିନରେ ମୋଟ୍ ୧୩୬ ଯାତ୍ରୀ ଏହି ଷ୍ଟେଶନ ଦେଇ ବିଭିନ୍ନ ସ୍ଥାନକୁ ଯାତ୍ରା କରିଥିବା ରେଳ ବିଭାଗ ପକ୍ଷରୁ ସୂଚନା ଦିଆଯାଇଛି।
ମାର୍ଚ୍ଚରୁ ଲାଗିଥିବା କଟକଣା କୋହଳ ହେବା ପରେ ଅନୁଗୋଳ ଷ୍ଟେଶନରେ ଗହଳି ଦେଖିବାକୁ ମିଳିଥିଲା। ଡାକବାଜି ଯନ୍ତ୍ରରେ ରେଳ ସମ୍ପର୍କିତ ବିବରଣୀ ପ୍ରଦାନ ସହ ମାସ୍କ ପିନ୍ଧିବା ଓ ସାମାଜିକ ଦୂରତା ରକ୍ଷା କରିବାକୁ ରେଳ କର୍ମଚାରୀ, ଆରପିଏଫଙ୍କ ପକ୍ଷରୁ ସଚେତନ କରାଯାଇଥିଲା। ସେହିପରି ଯାତ୍ରୀଙ୍କ ଶରୀରର ତାପମାତ୍ରା ମପାଯିବା ପରେ ଷ୍ଟେଶନ ଭିତରକୁ ଛଡ଼ାଯାଇଥିଲା। ଏହି ଷ୍ଟେଶନ ଦେଇ ସକାଳେ ସମ୍ବଲପୁର-ଖୋର୍ଦ୍ଧା, ଭୁବନେଶ୍ୱର-ବଲାଙ୍ଗୀର, ରାଉରକେଲା-ଭୁବନେଶ୍ୱର ପାସେଞ୍ଜର ଏକ୍ସପ୍ରେସ୍ ଯାଇଥିଲା। ସନ୍ଧ୍ୟାରେ ଷ୍ଟେଶନ ଦେଇ ଭୁବନେଶ୍ୱର-ରାଉରକେଲା, ବଲାଙ୍ଗୀର-ଭୁବନେଶ୍ୱର, ଖୋର୍ଦ୍ଧା-ସମ୍ବଲପୁର ଟ୍ରେନ୍ ଦେଇ ଫେରିଥିଲା। ଅନୁଗୋଳ ଷ୍ଟେଶନରୁ ମୋଟ୍ ୭୩ ଜଣ ଟ୍ରେନ୍ରେ ଚଢିଥିବା ବେଳେ ୬୩ ଜଣ ଓହ୍ଲାଇଥିଲେ। ପୂର୍ବରୁ ଟିକେଟ ଅନ୍ଲାଇନରେ କଟାଯାଇଥିବାବେଳେ କାଉଣ୍ଟରରୁ ୨୫ଟି ଟିକେଟ୍ ସୋମବାର ବିକ୍ରି ହୋଇଥିବା କର୍ତ୍ତୃପକ୍ଷ କହିଛନ୍ତି। ସେହିପରି ରାତିରେ ହୀରାଖଣ୍ଡ ଏକ୍ସପ୍ରେସ୍ ଅନୁଗୋଳ ଷ୍ଟେଶନ ଦେଇ ଯାଇଥିବା କର୍ତ୍ତୃପକ୍ଷ ସୂଚନା ଦେଇଛନ୍ତି।
