ନୂଆଦିଲ୍ଲୀ- ୨୨।୮- ବ୍ୟାଟିଂ କିମ୍ବଦନ୍ତୀ ସଚିନ ତେନ୍ଦୁଲକର ତାଙ୍କ ଦୁଇ ଦଶନ୍ଧିରୁ ଊର୍ଦ୍ଧ୍ୱ କ୍ୟାରିୟରରେ ଅନେକ ରେକର୍ଡ ପ୍ରତିଷ୍ଠା କରିଯାଇଛନ୍ତି। ତେବେ ଲିଟିଲ ମାଷ୍ଟରଙ୍କ ଏକ ରେକର୍ଡ କ୍ରିକେଟ୍ ଜଗତରେ ସର୍ବଦା ଅତୁଟ ରହିବ ବୋଲି ପୂର୍ବତନ ଭାରତୀୟ ବିସ୍ଫୋରକ ବ୍ୟାଟ୍ସମ୍ୟାନ ବୀରେନ୍ଦ୍ର ସେହ୍ବାଗ ଦୃଢ଼ତାର ସହ କହିଛନ୍ତି। ଏକ କାର୍ଯ୍ୟକ୍ରମ ଅବସରରେ ସେହ୍ବାଗ କହିଛନ୍ତି, ଭାରତୀୟ ଦଳର ବର୍ତ୍ତମାନର ଅଧିନାୟକ ବିରାଟ କୋହଲି ଦମ୍ଦାର ପ୍ରଦର୍ଶନ ବଳରେ କ୍ରିକେଟ୍ର ସମସ୍ତ ଫର୍ମାଟ୍ରେ ମେଶିନ ଭଳି ରନ୍ ସଂଗ୍ରହ କରିଚାଲିଛନ୍ତି। ଏହି ଅବସରରେ ସଚିନଙ୍କ ଅନେକ ରେକର୍ଡ ମଧ୍ୟ କୋହଲି ଭଙ୍ଗ କରିସାରିଛନ୍ତି। ଯଦି କୋହଲି ଏହି ଧାରାରେ ବ୍ୟାଟିଂ ଜାରି ରଖନ୍ତି ତେବେ ସଚିନଙ୍କ ନାମରେ ରହିଥିବା ଦିନିକିଆ ଓ ଟେଷ୍ଟରେ ସର୍ବାଧିକ ଶତକ ରେକର୍ଡ ସହ ସର୍ବାଧିକ ରନ୍କୁ ଖୁବ୍ ଶୀଘ୍ର ଟପିଯିବେ। କିନ୍ତୁ ସଚିନଙ୍କ ଗୋଟିଏ ରେକର୍ଡକୁ କୋହଲିଙ୍କ ସହ କେହି ମଧ୍ୟ ଭଙ୍ଗ କରିପାରିବେ ନାହିଁ’ ବୋଲି ନଜଫଗଡ଼ର ନଓ୍ବାବ ଭାବେ ପରିଚିତ ସେହ୍ବାଗ କହିଛନ୍ତି। ‘ଏହା ହେଉଛି ସଚିନଙ୍କ ନାମରେ ରହିଥିବା ସର୍ବାଧିକ ୨୦୦ ଟେଷ୍ଟ ମ୍ୟାଚ୍ ଖେଳିବାର ରେକର୍ଡ। ମୁଁ ଭାବୁଛି କେହି ଜଣେ ୨୦୦ରୁ ଊର୍ଦ୍ଧ୍ୱ ଟେଷ୍ଟ ଖେଳି ସଚିନଙ୍କ ଏହି ରେକର୍ଡକୁ ଭାଙ୍ଗିପାରିବ’ ବୋଲି ଏହି କାର୍ଯ୍ୟକ୍ରମ ଅବସରରେ ୪୦ ବର୍ଷୀୟ ସେହ୍ବାଗ ପ୍ରକାଶ କରିଛନ୍ତି। ଏଠାରେ ଉଲ୍ଲେଖଯୋଗ୍ୟ, ୨୦୦ ଟେଷ୍ଟରୁ ସଚିନ ୫୧ ଶତକ ସହାୟତାରେ ୧୫୯୨୧ ରନ୍ ଏବଂ ୪୬୩ ଦିନିକିଆରେ ୪୯ ଶତକ ସହ ୧୮୪୨୬ ରନ୍ କରିଛନ୍ତି। ଅପରପକ୍ଷରେ କୋହଲି ୭୭ ଟେଷ୍ଟରୁ ୨୫ ଶତକ ସହାୟତାରେ ୬୬୧୩ ରନ ଏବଂ ୨୩୯ ଦିନିକିଆରୁ ୪୩ ଶତକ ବଳରେ ୧୧୫୨୦ ରନ କରିଛନ୍ତି।
