ଭୁବନେଶ୍ୱର,୨୯।୧ (ବ୍ୟୁରୋ):ସରକାର ପଲିଥିନ ଓ ପ୍ଲାଷ୍ଟିକ୍ ବ୍ୟବହାର ଉପରେ କଟକଣା ଲଗାଇବା ସହ ଏହାର ଉପତ୍ାଦନକୁ ନିୟନ୍ତ୍ରିତ କରିବାରେ ପଦକ୍ଷେପ ନେଉଛନ୍ତି। ହେଲେ କେତେକ ପଲିଥିନ୍ ଫ୍ୟାକ୍ଟ୍ରି ବା କାରଖାନାରେ ଏବେ ବି ବେଆଇନ କାରବାର କରୁଥିବାର ଭୁବନେଶ୍ୱର ମହାନଗର ନିଗମ (ବିଏମ୍ସି) ନଜରକୁ ଆସିଛି। ଏଥିପାଇଁ ସେଗୁଡ଼ିକୁ ନିୟମିତ ଭାବେ ଯାଞ୍ଚ କରିବା ସହ ପଲିଥିନ ୫୦ ମାଇକ୍ରୋନ୍ ତଳକୁ ରହିଛି କି ନାହିଁ, ଫ୍ୟାକ୍ଟ୍ରିର ଲାଇସେନ୍ସ, ପ୍ରଦୂଷଣ ବୋର୍ଡରୁ ପ୍ରମାଣପତ୍ର ମିଳିଛି କି ନାହିଁ ଆଦି ଯାଞ୍ଚ କରୁଛନ୍ତି। ଏ ନେଇ ମଙ୍ଗଳବାର ସ୍ଥାନୀୟ ମଞ୍ଚେଶ୍ୱର ଶିଳ୍ପାଞ୍ଚଳରେ ବିଏମ୍ସି, ବିଡିଏ, ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ଓ ପୋଲିସ ବିଭାଗର ସମନ୍ବୟରେ ଗଢାଯାଇଥିବା ସ୍ବତନ୍ତ୍ର ସ୍କ୍ବାଡ ୪ଟି ପଲିଥିନ୍ କାରଖାନା ଉପରେ ଚଢ଼ାଉ କରିଥିବା ବିଏମ୍ସି ପକ୍ଷରୁ ଜଣାପଡ଼ିଛି।
ସୂଚନାନୁଯାୟୀ, ମଞ୍ଚେଶ୍ୱର ଶିଳ୍ପାଞ୍ଚଳରେ ବେଆଇନ ଭାବେ ପଲିଥିନ ଫ୍ୟାକ୍ଟ୍ରି କାର୍ଯ୍ୟକ୍ଷମ ଥିବା ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀ ଜାଣିବାକୁ ପାଇଥିଲେ। ଏହାକୁ ଯାଞ୍ଚ ପାଇଁ ଅତିରିକ୍ତ କମିଶନର ଅବନିକାନ୍ତ ପଟ୍ଟନାୟକଙ୍କୁ କମିଶନର ନିର୍ଦ୍ଦେଶ ଦେଇଥିଲେ। ଏହିକ୍ରମେ ଉତ୍ତର ଜୋନର ଜୋନାଲ ଡେପୁଟି କମିଶନର ପ୍ରମୋଦ କୁମାର ପୃଷ୍ଟିଙ୍କ ନେତୃତ୍ୱରେ ପୂର୍ବାହ୍ନରେ ୨ଟି ଓ ଅପରାହ୍ନରେ ୨ଟି କାରଖାନା ଉପରେ ସ୍କ୍ବାଡ ଯାଞ୍ଚ କରିଥିଲେ। ପୂର୍ବାହ୍ନରେ ଯାଞ୍ଚ ହୋଇଥିବା ୨ଫ୍ୟାକ୍ଟ୍ରି ପଲିକେମ୍ ଇଣ୍ଡିଆ ଏବଂ ନନ୍ଦିମେଟାଲ୍ ରୋଲିଂ ମିଲ୍ସରେ ଉଭୟ ୫୦ ମାଇକ୍ରୋନ୍ରୁ ଅଧିକ ଏବଂ କମ୍ ଉତ୍ପାଦନ ହେଉଥିବା ଜଣାପଡ଼ିଥିଲା। ରାଜ୍ୟ ପ୍ରଦୂଷଣ ବୋର୍ଡରୁ ଆସିଥିବା ଅଭିଜ୍ଞଙ୍କ ଦ୍ୱାରା ନିର୍ଦ୍ଧାରିତ ଯନ୍ତ୍ର ସାହାଯ୍ୟରେ କାରଖାନାରେ ମହଜୁଦ ଥିବା ପ୍ରସ୍ତୁତ ସାମଗ୍ରୀକୁ ପରୀକ୍ଷା କରାଯାଇ କେଉଁଗୁଡ଼ିକ ୫୦ମାଇକ୍ରୋନ୍ରୁ କମ୍ ତାହା ଚିହ୍ନଟ ହୋଇଥିଲା। ସମ୍ପୃକ୍ତ କାରଖାନାଦ୍ୱୟ ପ୍ରାୟ ଦଶ ବର୍ଷରୁ ଊର୍ଦ୍ଧ୍ୱ ସମୟ ଧରି ଚାଲୁ ରହିଥିବାବେଳେ ଏହାର ଟ୍ରେଡ୍ ଲାଇସେନ୍ସ, ରାଜ୍ୟ ପ୍ରଦୂଷଣ ବୋର୍ଡରୁ କୌଣସି ପ୍ରକାର ପଞ୍ଜୀକରଣ ନ ଥିବା ଜଣାପଡ଼ିଥିଲା। ଫ୍ୟାକ୍ଟ୍ରି ଦୁଇଟି କେବଳ ଜିଲା ଶିଳ୍ପକେନ୍ଦ୍ରରେ ପଞ୍ଜୀକୃତ ହୋଇ ନିଜର ବ୍ୟବସାୟ ଚଳାଇଥିବା ନଜରକୁ ଆସିଛି।
ଉଲ୍ଲେଖଯୋଗ୍ୟ, ପଲିକେମ୍ ଇଣ୍ଡିଆର ପଞ୍ଜୀକରଣ ୧୫ ବର୍ଷରୁ ଊର୍ଦ୍ଧ୍ୱ ସମୟ ପୂର୍ବରୁ ପୁରୀ ଜିଲା ଡିଆଇସି ଅଧୀନରେ ହୋଇଥିବାବେଳେ ନନ୍ଦିମେଟାଲ୍ ରୋଲିଂ ମିଲ୍ସର ପଞ୍ଜୀକରଣ ପ୍ରାୟ ଦଶ ବର୍ଷ ପୂର୍ବରୁ ଭୁବନେଶ୍ୱର ଡିଆଇସି ଅଧୀନରେ ଥିଲା। ଏପରିକି ଦୁଇଟିଯାକ ସଂସ୍ଥାର କାରବାର ଉଭୟ ବେସରକାରୀ ଏବଂ ସରକାରୀ ଅନୁଷ୍ଠାନ ସହ ଚାଲୁରହିଛି। ବେଆଇ଼ନ୍ ଭାବେ କମ୍ ମାନର ପଲିଥିନ୍ ପ୍ରସ୍ତୁତି ତଥା ପଲିଥିନ୍ ଜବତ ଓ ସ୍ଥାନାନ୍ତର ଇତ୍ୟାଦି ନିମନ୍ତେ ପଲିକେମ୍ ଇଣ୍ଡିଆକୁ ୩୦ ହଜାର ଏବଂ ନନ୍ଦିମେଟାଲ୍ ରୋଲିଂ ମିଲ୍ସକୁ ୨୦ ହଜାର ଟଙ୍କା ଜରିମାନା କରାଯାଇଛି। ଦୁଇଟି ଯାକ ଫ୍ୟାକ୍ଟ୍ରିରୁ ୫୦ ମାଇକ୍ରୋନ୍ ତଳକୁ ଥିବା ପଲିଥିନର ୨୫ ବ୍ୟାଗ୍ ଲେଖାଏ ଜବତ ହୋଇଛି। ସେହିପରି ଅପରାହ୍ନରେ ଅନ୍ୟ ଦୁଇଟି ପଲିଥିନ କାରାଖାନା ପ୍ରିୟାଂଶୁ ପଲିମର୍ ଏବଂ ନୀଳାଚଳ ପ୍ୟାକେଜ୍ରେ ସ୍କ୍ବାଡ ଚଢ଼ାଉ କରିଥିଲା। ହେଲେ ୫୦ ମାଇକ୍ରୋନ୍ ତଳକୁ କୌଣସି ପଲିଥିନ କିମ୍ବା ପ୍ଲାଷ୍ଟିକ୍ ନ ଥିବାର ପରିଲିକ୍ଷିତ ହୋଇଥିଲା।
