ଆଙ୍କାରା: ଗୋଟିଏ ଜାତିର ଇତିହାସ ବଖାଣେ ପୁରାତନ ସ୍ମାରକୀ। ଏହାକୁ ସଂରକ୍ଷଣ କରିବା ଅର୍ଥ ପରପିଢ଼ି ପାଖରେ ସମୃଦ୍ଧ ଇତିହାସକୁ ସୁରକ୍ଷିତ ଭାବେ ପହଞ୍ଚାଇବା। ଏପରି ମହତ୍ ଉଦ୍ଦେଶ୍ୟ ରଖି ତୁର୍କୀ ସରକାର ଦେଶର ଐତିହ୍ୟସମ୍ପନ୍ନ କୀର୍ତ୍ତିରାଜିକୁ ସୁରକ୍ଷା ଦେବାକୁ ଆଗେଇ ଆସିଛନ୍ତି। ଏହି ପରିପ୍ରେକ୍ଷୀରେ ୬୦୯ ବର୍ଷ ପୁରୁଣା ‘ଇର-ରିକ୍ଜ’ ମସ୍ଜିଦକୁ ମୂଳ ସ୍ଥାନରୁ ୪କିମି ଦୂର ସ୍ଥାନାନ୍ତର କରି ଭିନ୍ନ ଉଦାହରଣ ସୃଷ୍ଟି କରିଛି ସେଠାକାର ପ୍ରଶାସନ।
ହାସନକେଏଫ୍ କଲଚର ପାର୍କ ପାଇଁ ଇଲୁସ୍ ଡ୍ୟାମ୍ ନିର୍ମାଣ କରାଯାଉଛି। ଡ୍ୟାମ ନିର୍ମାଣ ସମ୍ପୂର୍ଣ୍ଣ ହେଲେ ସହର ସମେତ ଉକ୍ତ ମସ୍ଜିଦ ବୁଡ଼ିଯିବ। ଏଥିପୂର୍ବରୁ ମସ୍ଜିଦ୍କୁ ସୁରକ୍ଷା ଦେବାକୁ ଯୋଜନା କରାଯାଇଥିଲା। ସେଲ୍ଫ ପ୍ରପଲ୍ଡ ମୋଡ୍ୟୁଲ୍ ଟ୍ରାନ୍ସପୋର୍ଟ ସହାୟତାରେ ମସ୍ଜିଦ୍କୁ ଦୀର୍ଘ ୪କିମି ଦୂରକୁ ନିଆଯାଇଛି। ଟାଇଗ୍ରିସ୍ ନଦୀତଟ ଏହାର ନୂଆ ଠିକଣା ପାଲଟିଛି।
ସୂଚନାଯୋଗ୍ୟ, ତୁର୍କୀର ପୁରୁଣା ମସ୍ଜିଦ୍ ମଧ୍ୟରୁ ‘ଇର-ରିକ୍ଜ’ ଗୋଟିଏ। ଆବୁ ଅଲ୍ ମେଫାହିରଙ୍କ ଦ୍ୱାରା ୧୪୦୯ରେ ଏହାକୁ ନିର୍ମାଣ କରାଯାଇଥିଲା। ଏହାର ଓଜନ ପ୍ରାୟ ୧୭୦୦ ଟନ୍। ତୁର୍କୀରେ ପୁରାତନ ସ୍ମାରକୀ, କୀର୍ତ୍ତିରାଜିର ସଂରକ୍ଷଣ ପାଇଁ ଅତ୍ୟାଧୁନିକ ଉପାୟ ଅବଲମ୍ବନ କରାଯାଉଛି। ଏହି ମସ୍ଜିଦ୍କୁ ବାଦ୍ଦେଲେ ୧୨ ପୁରୁଣା ଅଟ୍ଟାଳିକାକୁ ମଧ୍ୟ ସମାନ ଉପାୟରେ ସୁରକ୍ଷିତ ଜାଗାକୁ ସ୍ଥାନାନ୍ତର କରାଯାଇଛି।
