ପାଟପୁର,୨୨ା୫- ସାନଖେମୁଣ୍ଡି ବ୍ଲକ ପଟିଗୁଡା ପଞ୍ଚାୟତ ବରମୁଣ୍ଡୁଳି ଗ୍ରାମରେ ୩ ବର୍ଷ ହେଲା ପାନୀୟଜଳ ପ୍ରକଳ୍ପ ଅଚଳ ହୋଇ ପଡିଛି। ଫଳରେ ଗ୍ରାମବାସୀ ପାଣି ପାଇଁ ଡହଳ ବିକଳ ହେଉଛନ୍ତି। ପୋଖରୀ ଓ ଭଙ୍ଗା ନଳକୂପରୁ ପାଣି ସଂଗ୍ରହ କରି ବ୍ୟବହାର କରୁଛନ୍ତି। ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ ପକ୍ଷରୁ ୨୦୦ ପରିବାରରୁ ଉର୍ଦ୍ଧ୍ୱ ଜନସଂଖ୍ୟା ବିଶିଷ୍ଟ ଏହି ଗ୍ରାମରେ ୩ ବର୍ଷ ତଳେ ୪୦ ହଜାର ଲିଟର ବିଶିଷ୍ଟ ଏକ ପାଣି ଟାଙ୍କି ନିର୍ମାଣ ହୋଇଥିଲା। ଉଦ୍ଘାଟନର ପ୍ରାୟ ୧୦ ଦିନ ପରେ ପାଇପ ଫାଟିଯିବା ସହ ପମ୍ପ ଅଚଳ ହୋଇଯାଇଥିଲା। ଏହାକୁ ସଜାଡିବାକୁ ଆଉ ସମ୍ପୃକ୍ତ ବିଭାଗୀୟ କର୍ତ୍ତୃପକ୍ଷ ଦୃଷ୍ଟି ଦେଲେନାହିଁ। ଗୁରୁବାର ଗ୍ରାମର ମନୋଜ କୁମାର ବିଷୋୟୀ, ଅଜିତ କୁମାର ବେହେରା, ରାମହରି ଗୌଡ଼, ବାବୁଲା ଗୌଡ଼, ସୁନୀଲ ବେହେରା ପ୍ରମୁଖ ସାନଖେମୁଣ୍ଡି ବ୍ଲକରେ ପହଞ୍ଚତ୍ ଗ୍ରାମ୍ୟଜଳ ଯୋଗାଣ ଓ ପରିମଳ ବିଭାଗର କନିଷ୍ଠ ଯନ୍ତ୍ରୀ ଉପମା ଘଡ଼ାଇଙ୍କୁ ଏକ ସ୍ମାରକପତ୍ର ପ୍ରଦାନ କରିଛନ୍ତି। ତୁରନ୍ତ ଅଚଳ ପାନୀୟଜଳ ପ୍ରକଳ୍ପ ସଜାଡି ଗ୍ରାମରେ ଜଳ ଯୋଗାଣ ପାଇଁ ପ୍ରଶାସନ ପଦକ୍ଷେପ ନନେଲେ ଗ୍ରାମବାସୀ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବେ ବୋଲି କହିଛନ୍ତି। ଉପରିସ୍ଥ ଅଧିକାରୀଙ୍କ ସହ ଆଲୋଚନା କରି ମାସେ ମଧ୍ୟରେ ଏହାର ସମାଧାନ କରାଯିବ ବୋଲି ଯନ୍ତ୍ରୀ ଘଡାଇ କହିଥିଲେ।
