ଓ୍ବାଶିଂଟନ,୩୦ା୪: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଟୁଇଟର୍ରେ ଅନ୍ଫଲୋ କରିଛନ୍ତି। କେବଳ ବ୍ୟକ୍ତିଗତ ଭାବେ ଟ୍ରମ୍ପ୍ ନୁହନ୍ତି, ବରଂ ପ୍ରେସିଡେଣ୍ଟ ଅଫ୍ ଦି ୟୁନାଇଟେଡ୍ ଷ୍ଟେଟ୍ସ (ପିଓଟିୟୁଏସ୍) ଏବଂ ଆମେରିକାର ପାଓ୍ବାର ପଏଣ୍ଟ ତଥା ତାଙ୍କ ସରକାରୀ ବାସଭବନ ହ୍ବାଇଟ୍ ହାଉସ୍ ମଧ୍ୟ ମୋଦିଙ୍କୁ ଟୁଇଟରରୁ ହଟାଇଦେଇଛି। ଏହି ଗୁରୁତ୍ୱପୂର୍ଣ୍ଣ କୂଟନୈତିକ ପଦକ୍ଷେପ ପରେ ନାନା ପ୍ରଶ୍ନ ଉଠିଛି ଓ ବିଭିନ୍ନ କଥାକୁ ନେଇ ଚର୍ଚ୍ଚା ଜୋର୍ ଧରିଛି।
ସାଧାରଣତଃ ହ୍ବାଇଟ୍ ହାଉସ୍ ଏବଂ ପିଓଟିୟୁଏସ୍ ଅନ୍ୟ କୌଣସି ରାଷ୍ଟ୍ରମୁଖ୍ୟଙ୍କୁ ଟୁଇଟରରେ ଫଲୋ କରି ନ ଥାନ୍ତି। କିଛିଦିନ ତଳେ ହ୍ବାଇଟ୍ ହାଉସ୍ର ଟୁଇଟର୍ ହ୍ୟାଣ୍ଡଲ ପ୍ରଧାନମନ୍ତ୍ରୀ ମୋଦି, ଆମେରିକାରେ ଥିବା ଭାରତୀୟ ଦୂତାବାସ ଓ ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଫଲୋ କରିଥିଲା। ହ୍ବାଇଟ୍ ହାଉସ୍କୁ ୨୨ ନିୟୁତ ୟୁଜର୍ସ ଫଲୋ କରୁଥିବାବେଳେ ବିଶ୍ୱର ଏହି କ୍ଷମତାକେନ୍ଦ୍ର ମାତ୍ର ୧୯ ଜଣଙ୍କୁ ଫଲୋ କରିଥିଲା, ଯାହାଙ୍କ ମଧ୍ୟରେ ମୋଦି ଓ କୋବିନ୍ଦ ଥିଲେ। ଏଥିଯୋଗୁ ହ୍ବାଇଟ୍ ହାଉସ୍ର ଭାରତ ପ୍ରେମକୁ ନେଇ ଇଣ୍ଟରନେଟରେ ଚର୍ଚ୍ଚା ଜୋର୍ ଧରିଥିଲା। ଏବେ ହ୍ବାଇଟ୍ ହାଉସ୍ ମାତ୍ର ୧୩ ଜଣଙ୍କୁ ଫଲୋ କରୁଛି, ଯାହାଙ୍କ ମଧ୍ୟରେ ସର୍ବାଧିକ ରହିଛି ଆମେରିକା ପ୍ରଶାସନର ବିଭିନ୍ନ ବିଭାଗ।
ପ୍ରଶ୍ନ ଉଠୁଛି ଟ୍ରମ୍ପ୍ ଓ ହ୍ବାଇଟ୍ ହାଉସ୍ କାହିଁକି ଏପରି କଲେ। ଏହାର ଉତ୍ତର ଖୋଜିବା ପାଇଁ ହେଲେ ଟିକେ ପଛକୁ ଫେରିବାକୁ ହେବ। କରୋନାରେ ସର୍ବାଧିକ କ୍ଷତିଗ୍ରସ୍ତ ହୋଇଛି ଆମେରିକା। ଏହି ମହାମାରୀରୁ ଦେଶବାସୀଙ୍କୁ ମୁକ୍ତ କରିବା ପାଇଁ ଆମେରିକାକୁ ହାଇଡ୍ରୋକ୍ସିକ୍ଲୋରୋକୁଇନ୍ (ଏଚ୍ସିକ୍ୟୁ) ବଟିକା ଦରକାର ଥିଲା। ଭାରତରେ ଶସ୍ତାରେ ଉପଲବ୍ଧ ମ୍ୟାଲେରିଆ ନିରୋଧୀ ଏହି ଔଷଧ ରପ୍ତାନି ଉପରେ ନୂଆଦିଲ୍ଲୀ ଗତ ମାର୍ଚ୍ଚ ୨୪ରେ କଟକଣା ଜାରି କରିଥିଲା। ହେଲେ ଏହି ବଟିକାରେ କରୋନା ବ୍ୟାଧି ଦୂର ହେଉଛି ମନେକରି ଆମେରିକା ପର୍ଯ୍ୟାପ୍ତ ପରିମାଣର ହାଇଡ୍ରୋକ୍ସିକ୍ଲୋରୋକୁଇନ ଆମଦାନୀ ପାଇଁ ଭାରତକୁ ବରାଦ କରିଥିଲା। ଏହାପରେ ଟ୍ରମ୍ପ୍ ଓ ହ୍ବାଇଟ୍ ହାଉସ୍ ମୋଦି ଏବଂ କୋବିନ୍ଦଙ୍କୁ ଟୁଇଟରରେ ଫଲୋ କରିଥିଲେ। ଭାରତ ପକ୍ଷରୁ ଏଚ୍ସିକ୍ୟୁ ଦିଆ ନ ଯିବାରୁ ଟ୍ରମ୍ପ୍ ଧମକ ମଧ୍ୟ ଦେଇଥିଲେ। ଟ୍ରମ୍ପ୍ଙ୍କ ଧମକର କିଛି ସମୟ ପରେ ଭାରତ ଏଚ୍ସିକ୍ୟୁ ରପ୍ତାନି ଉପରେ କଟକଣାକୁ ସାମୟିକ ଭାବେ ହଟାଇଦେଇଥିଲା। ଫଳରେ ଆମେରିକା ସମେତ ଅନ୍ୟ ରାଷ୍ଟ୍ରଗୁଡ଼ିକ ଭାରତରୁ ଏଚ୍ସିକ୍ୟୁ ନେଇ କରୋନା ଚିକିତ୍ସା କରିବାରେ ଲାଗିଲେ। ଟ୍ରମ୍ପ୍ ସେତେବେଳେ କୋଭିଡ୍-୧୯ ବିରୋଧୀ ଲଢ଼େଇରେ ଭାରତର ସହଯୋଗକୁ ଭୁଲିହେବ ନାହିଁ ବୋଲି ପ୍ରଶଂସା କରିଥିଲେ। ମୋଦି ମଧ୍ୟ ଦୁଇଦେଶକୁ ଘନିଷ୍ଠ ବନ୍ଧୁ ଭାବେ ଅଭିହିତ କରି ଖୁସି ହୋଇଯାଇଥିଲେ। ସ୍ବାର୍ଥ ସାଧନ ହେବା ପରେ ଆମେରିକା ଏବେ ଟୁଇଟରରୁ ମୋଦିଙ୍କୁ ହଟାଇଦେଇଥିବା କୁହାଯାଉଛି। ଟ୍ରମ୍ପ୍ କିମ୍ବା ହାଇଟ୍ ହାଉସ୍ ପକ୍ଷରୁ ଏନେଇ କିଛି ମନ୍ତବ୍ୟ ଆସିନାହିଁ।
