ପ୍ୟାରିସ୍,୧୨।୫ (ଏଏଫ୍ପି): ଜର୍ମାନୀର ଫର୍ମୁଲା-୧ ଡ୍ରାଇଭର ସେବାଷ୍ଟିଆନ ଭେଟେଲ ଚଳିତ ୨୦୨୦ ସିଜନ ପରେ ଫେରାରି ଛାଡିବେ ବୋଲି କହିଛନ୍ତି। ୪ଥର ଫର୍ମୁଲା-୧ ବିଶ୍ୱ ଚାମ୍ପିୟନ ଟାଇଟଲ ଜିତିଥିବା ଏହି ଡ୍ରାଇଭର ଫେରାରି ସହିତ ମିଳିତ ଭାବେ କାର୍ଯ୍ୟ କରିବାକୁ ଆଉ ଇଚ୍ଛା ନାହିଁ ବୋଲି ସ୍ପଷ୍ଟ କରିଛନ୍ତି।
ଭେଟେଲଙ୍କ ବଦଳ ଡ୍ରାଇଭରଙ୍କ ସମ୍ପର୍କରେ ଅବଶ୍ୟ କିଛି କୁହାଯାଇନାହିଁ। ଭେଟେଲ ୨୦୧୫ରେ ଫେରାରି ସହିତ ଜଡିତ ରହିଆସିଥିଲେ। ତେବେ ଏହାପୂର୍ବରୁ ସେ ରେଡବୁଲ୍ ତରଫରୁ ବିଭିନ୍ନ ପ୍ରତିଯୋଗିତାର ପ୍ରତିନିଧିତ୍ୱ କରିଆସୁଥିଲେ। ଫେରାରି ଛାଡିବା ଏକ ମିଳିତ ନିଷ୍ପତ୍ତି ବୋଲି ୩୨ ବର୍ଷୀୟ ଭେଟେଲ କହିଛନ୍ତି। ୨୦୨୦ ଶେଷ ହେବା ସହିତ ସ୍କୁଡେରିଆ ଫେରାରି ସହିତ ମୋର ସମ୍ପର୍କ ଶେଷ ହେବ। ଏ ନେଇ ଫେରାରି ତରଫରୁ ଜାରି କରାଯାଇଥିବା ପ୍ରେସ୍ ବିବୃତିରେ ଭେଟେଲ କହିଛନ୍ତି।
କ୍ରୀଡ଼ାରେ ଦୁଇ ପକ୍ଷ ମିଳିତ ଭାବେ ସାମଞ୍ଜସ୍ୟ ସହ କାର୍ଯ୍ୟ କରିବା ଆବଶ୍ୟକ ହୋଇଥାଏ। କିନ୍ତୁ ଏପରି ଆଉ ସମ୍ଭବ ହେଉ ନ ଥିବାରୁ ଫେରାରି ଛାଡିବାକୁ ନିଷ୍ପତ୍ତି ନେଇଛି ବୋଲି ଭେଟେଲ କହିଛନ୍ତି। ଭେଟେଲ ଫେରାରି ତରଫରୁ ପ୍ରତିନିଧିତ୍ୱ କରି ୧୪ଟି ରେସ୍ ଜିତିଛନ୍ତି। ତେବେ ଆର୍ଥିକ ସମସ୍ୟା କାରଣରୁ ଏହି ନିଷ୍ପତ୍ତି ନେଇନାହିଁ ବୋଲି ସେ ସଫେଇ ଦେଇଛନ୍ତି। ଭେଟେଲଙ୍କ ବଦଳ ଡ୍ରାଇଭର ଭାବେ ମର୍ସିଡିଜ୍ ବିଶ୍ୱ ଚାମ୍ପିୟନ ଲୁଇସ୍ ହାମିଲଟନଙ୍କୁ ଫେରାରି ସାମିଲ କରିବ ବୋଲି ଚର୍ଚ୍ଚା ହେଉଛି। ଫେରାରି ପୂର୍ବତନ ଡ୍ରାଇଭରମାନେ ମଧ୍ୟ ଏହି ଦୌଡରେ ରହିଛନ୍ତି ବୋଲି କୁହାଯାଇଛି।
ଭେଟେଲ ଓ ଆମେ ଏ ନେଇ ମିଳିତ ଭାବେ ନିଷ୍ପତ୍ତି ନେଇଛୁ ବୋଲି ଟିମ୍ ପ୍ରିନ୍ସିପାଲ ମାଟିଆ ବିନୋଟ୍ଟୋ କହିଛନ୍ତି। ଏହି ନିଷ୍ପତ୍ତି ନିହାତି କଷ୍ଟକର ଥିଲା। ଏହି ନିଷ୍ପତ୍ତି ପଛରେ କୌଣସି ନିର୍ଦ୍ଦିଷ୍ଟ କାରଣ ନାହିଁ ଓ ଏବେ ଅଲଗା ହେବାର ସମୟ ଆସି ଉପନୀତ ହୋଇଛି ବୋଲି ଉଭୟ ପକ୍ଷ ତରଫରୁ ସ୍ପଷ୍ଟ କରାଯାଇଛି। ଫେରାରି ସହିତ ୧୪ଟି ରେସ୍ ଜିତିଥିବା ଫେରାରି କ୍ୟାରିୟରରେ ମୋଟ୍ ୫୩ଟି ରେସ୍ରେ ବିଜୟୀ ହୋଇଛନ୍ତି।
