ଯାଜପୁର ରୋଡ, ୯ା୯(ନି.ପ୍ର.)- କୋରେଇ ବ୍ଲକ ଅର୍ନ୍ତଗତ ତଳଗଡ ଗ୍ରାମ ପଞ୍ଚାୟତ ଜାତୀୟ ରାଜପଥ ୨୦ ନମ୍ବରରୁ କୋଗାଁକୁ ରାସ୍ତା ନିର୍ମାଣକୁ ଭିତ୍ତିପ୍ରସ୍ତର ହେବାର ୫ ମାସ ବିତିଛି। ହେଲେ ବର୍ତ୍ତମାନ ପର୍ଯ୍ୟନ୍ତ ଠିକାଦାର ରାସ୍ତା କାମ ପାଇଁ ମାଟି ମୁଠେ ପାକାଇ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ମୁଖ୍ୟମନ୍ତ୍ରୀ ସଡ଼କ ଯୋଜନାରେ ମାର୍ଚ୍ଚ ୨୦୧୯ରେ ୨କୋଟି ୫୦ ଲକ୍ଷ ଟଙ୍କା ଅଟକଳ ବ୍ୟୟରେ ନିର୍ମିତ ହେବାକୁ ଥିବା ରାସ୍ତାକୁ ତତ୍କାଳୀନ ବିଧାୟକ ଆକାଶ ଦାସ ନାୟକ ଭିତ୍ତିପ୍ରସ୍ତର ସ୍ଥାପନ କରିଥିଲେ। ଗ୍ରାମ ଉନ୍ନୟନ ବିଭାଗ ରାସ୍ତା ନିର୍ମାଣ ପାଇଁ ଟେଣ୍ଡରକରି ଠିକଦାର ଚୟନ କରିଥିଲା। ଏହି ରାସ୍ତାଟି ଝୁମ୍ପାଣ, କପିଳଙ୍ଗ, ଇଟାପୁର, ପିମ୍ପଲ, କୋଗାଁ ପ୍ରଭୃତି ଗ୍ରାମକୁ ସଂଯୋଗ କରୁଛି। ରାସ୍ତାଟି କାମ କରା ନ ଯିବାରୁ ଅବସ୍ଥା ଶୋଚନୀୟ ହୋଇପଡିଛି। ରାସ୍ତାରେ ଖାଲଖମା ହୋଇ ପାଣି ଜମିରହୁଛି। ଉକ୍ତ ରାସ୍ତା ଦେଇ ପିଲାମାନେ ସ୍କୁଲ, କଲେଜକୁ ଯାତାୟାତ କରିବାକୁ ବିପଦ ମଣୁଛନ୍ତି। ଏ ସମ୍ପର୍କରେ ଯାଜପୁର ରୋଡ୍ ଆରଡି ସବ୍ଡିଭିଜନ ଏସ୍ଡିଓଙ୍କୁ ଗ୍ରାମବାସୀ ଭେଟିବାକୁ ଗଲେ ଏସ୍ଡିଓଙ୍କ ଦେଖା ମୁଳୁ ନ ଥିବା କହିଛନ୍ତି। ଅପରପକ୍ଷେ ଜିଲାପାଳଙ୍କ ଜନଶୁଣାଣିରେ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳିପାରି ନ ଥିବା କହିଛନ୍ତି। ଦୁର୍ଗା ପୂଜା ପୂର୍ବରୁ ରାସ୍ତାକୁ ପ୍ରଥମେ ମରାମତି କରିବା ପାଇଁ ବରିଷ୍ଠ ବିଜେଡି ନେତା ବାବୁଲାଲ୍ ଗୁରୁ ଦାବି କରିଛନ୍ତି। ରାସ୍ତା ମରାମତି କରା ନ ଗଲେ ୨୦ ନମ୍ବର ଜାତୀୟ ରାଜପଥକୁ ଅବରୋଧ କରିବା ପାଇଁ ଗ୍ରାମବାସୀ ନିଷ୍ପତ୍ତି ନେଇଥିବା ଜଣାପଡିଛି। ଏ ସମ୍ପର୍କରେ କୋରେଇ ଆର୍ଡି କନିଷ୍ଠ ଯନ୍ତ୍ରୀ ରଞ୍ଜନ ବେହେରାଙ୍କୁ ପଚାରିବାରୁ, ଠିକାଦାର ବିଳମ୍ବରେ ରାସ୍ତା କାମ ନେଇ ଚୁକ୍ତି କରିଥିଲେ। ବର୍ଷାଦିନ ଆସିଯିବାରୁ ରାସ୍ତା କାମ ହୋଇପାରି ନ ଥିଲା। ନଭେମ୍ବରରେ କାମ ଆରମ୍ଭ ହେବ ବୋଲି କନିଷ୍ଠ ଯନ୍ତ୍ରୀ କହିଛନ୍ତି।
