ଶ୍ରୀନଗର,୨୫-୧୦:ଜମ୍ମୁ-କଶ୍ମୀରର ଶୋପିଆନ ଜିଲାରେ ୨ ଜଣ ଟ୍ରକ୍ ଡ୍ରାଇଭରଙ୍କୁ ଆତଙ୍କବାଦୀ ଗୁଳିକରି ହତ୍ୟା କରିଛନ୍ତି। ସେମାନେ ଗୁରୁବାର ସନ୍ଧ୍ୟାରେ ସେଓ ଆଣିବାକୁ ଟ୍ରକ୍ ନେଇ ଯାଇଥିଲାବେଳେ ଆତଙ୍କବାଦୀମାନେ ସେମାନଙ୍କୁ ଗୁଳି କରିବା ସହ ଟ୍ରକ୍କୁ ଜାଳିଦେଇଥିଲେ। ଅନ୍ୟ ଜଣେ ଡ୍ରାଇଭର ଆକ୍ରମଣରେ ଆହତ ହୋଇଛନ୍ତି। କଶ୍ମୀର ଉପତ୍ୟକାରେ ୩ ଦିନରେ ଆତଙ୍କବାଦୀଙ୍କର ଏହା ତୃତୀୟ ଆକ୍ରମଣ। ପୂର୍ବରୁ ସେମାନେ ରାଜସ୍ଥାନର ଜଣେ ଶ୍ରମିକ ଓ ଟ୍ରକ୍ ଡ୍ରାଇଭରଙ୍କୁ ହତ୍ୟା କରିଥିଲେ। ଟ୍ରକ୍ ଡ୍ରାଇଭରମାନେ ସୂଚନା ନ ଦେଇ ଉପତ୍ୟକାର ଆଭ୍ୟନ୍ତରୀଣ ଅଞ୍ଚଳରେ ପ୍ରବେଶ କରୁଥିବାରୁ ଆକ୍ରମଣର ସମ୍ମୁଖୀନ ହେଉଛନ୍ତି ବୋଲି ଜଣେ ପୋଲିସ ଅଧିକାରୀ କହିଛନ୍ତି। ମୃତ ଡ୍ରାଇଭରଙ୍କ ମଧ୍ୟରୁ ଜଣକ ଘର ରାଜସ୍ଥାନର ଅଲଓ୍ବରରେ ଓ ତାଙ୍କ ନାମ ମହମ୍ମଦ ଇଲିୟାସ ବୋଲି ଜଣାପଡିଛି। ଆହତ ଡ୍ରାଇଭର ଘର ପଞ୍ଜାବର ହୋଶିଆରପୁରରେ ତାଙ୍କୁ ଶ୍ରୀନଗରର ଏକ ହସ୍ପିଟାଲରେ ଭର୍ତ୍ତି କରାଯାଇଛି।
