ଅହମଦାବାଦ,୧୭ା୧୦: ଗୁଜରାଟର ବନାସକାନ୍ଥାରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ଜଣେ ବାପା ବିବାହ ପାଇଁ ତାଙ୍କ ୧୦ ବର୍ଷୀୟା ଝିଅଙ୍କୁ ୫୦ ହଜାର ଟଙ୍କାରେ ବିକ୍ରି କରିଦେଇଛନ୍ତି। ଉକ୍ତ ଆଦିବାସୀ ନାବାଳିକାଙ୍କୁ କିଣିଥିବା ଅସ୍ଓ୍ବାରାର ୩୫ ବର୍ଷୀୟ ଗୋବିନ୍ଦ ଠାକୁର ତାଙ୍କୁ ବିବାହ କରିଛନ୍ତି। ସବୁଠୁ ଲଜ୍ଜାକର କଥା ହେଉଛି ନାବାଳିକାଙ୍କ ସ୍ବାମୀ ତାଙ୍କ ବାପାଙ୍କଠାରୁ ବୟସରେ ବଡ଼। ବିବାହ ବେଳର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ପୋଲିସ ଝିଅକୁ ଉଦ୍ଧାର କରିଛି।
ତଳେ ଝିଅଟି ଏକ ଯାତ୍ରା ଦେଖିବାକୁ ଯାଇଥିଲା। ଗୋବିନ୍ଦ ମଧ୍ୟ ସେଠାକୁ ଯାଇଥିଲେ। ଜଗମଲ ଗମାର ନାମକ ଜଣେ ଏଜେଣ୍ଟଙ୍କ ଜରିଆରେ ଝିଅଙ୍କ ବାପା ଗୋବିନ୍ଦ ସହ ତାଙ୍କର ଭେଟ କରାଇଥିଲେ। ଗୋବିନ୍ଦ ତାଙ୍କୁ ଦେଖିବା ପରେ ୫୦,୦୦୦ ଟଙ୍କାରେ କିଣିବା ପାଇଁ ରାଜି ହୋଇଥିଲେ। ଅଗଷ୍ଟରେ ପରିବାର ଲୋକେ ଝିଅଙ୍କ ବିବାହ ଗୋବିନ୍ଦଙ୍କ ସହ କରାଇଥିଲେ। ବିବାହ ପରେ ବାପା ଝିଅଙ୍କୁ ନିଜ ଘରକୁ ଆଣିବାକୁ ଗୋବିନ୍ଦଙ୍କ ଘରକୁ ଯାଇଥିଲେ। କିନ୍ତୁ ଗୋବିନ୍ଦ ଝିଅଙ୍କୁ ଛାଡ଼ିବାକୁ ମନାକରିଦେଇଥିଲେ। ସୂତ୍ରରୁ ମିଳିଥିବା ସୂଚନାନୁସାରେ ବିକ୍ରି ପାଇଁ ଦେଢ଼ଲକ୍ଷ ଟଙ୍କା ଛିଣ୍ଡିଥିଲା। ସେଥିରୁ ଗୋବିନ୍ଦ ୫୦ ହଜାର ଦେଇଥିଲେ ଓ ଅବଶିଷ୍ଟ ୧ ଲକ୍ଷ ଟଙ୍କା ବିବାହ ପରେ ଦେବା ପାଇଁ ସ୍ଥିର ହୋଇଥିଲା। କିନ୍ତୁ ଗୋବିନ୍ଦଙ୍କୁ ହଇରାଣ କରିବା ପାଇଁ ଏଜେଣ୍ଟ ଜଗମଲ ବିବାହ ବେଳର ଭିଡିଓ ସୋସିଆଲ ମିଡିଆରେ ପୋଷ୍ଟ କରିଦେଇଥିଲେ। ଫଳରେ ଗୋବିନ୍ଦ ବାକି ଲକ୍ଷେ ଟଙ୍କା କନ୍ୟାପିତାଙ୍କୁ ଦେଇନାହାନ୍ତି। ବନାସକାନ୍ଥା ଜିଲା ହଡାଡ୍ ଥାନାର ସାମାଜିକ ନ୍ୟାୟ ବିଭାଗ ସୁରକ୍ଷା ଅଧିକାରୀ ଶିଶୁ ବିବାହ ନିରୋଧୀ ଆଇନ ବଳରେ କନ୍ୟାପିତା, ଗୋବିନ୍ଦ ଓ ଏଜେଣ୍ଟଙ୍କ ବିରୋଧରେ ମାମଲା ରୁଜୁ କରିଛନ୍ତି। ଝିଅଟିକୁ ମଙ୍ଗଳବାର କୁବେରନଗର ଅଞ୍ଚଳରେ ରହୁଥିବା ସ୍ବାମୀଙ୍କ ସମ୍ପର୍କୀୟଙ୍କ ଘରୁ ଉଦ୍ଧାର କରି ମହିଳା ସୁରକ୍ଷା ଗୃହ ‘ଓଢ଼ାବ’କୁ ପଠାଇ ଦିଆଯାଇଛି। ଏହି ଘଟଣା କେନ୍ଦ୍ର ସରକାରଙ୍କ ‘ବେଟୀ ବଚାଓ ବେଟୀ ପଢ଼ାଓ’ ଯୋଜନା ପ୍ରତି ଉପହାସ ବୋଲି କୁହାଯାଉଛି।
