ଭବାନୀପାଟଣା,୩୧।୧(ଡି.ଏନ୍.ଏ.): ୟୁନାଇଟେଡ୍ ଫୋରମ୍ ଅଫ୍ ବ୍ୟାଙ୍କ ୟୁନିୟନ ପକ୍ଷରୁ ଜାନୁୟାରୀ ୩୧ ଶୁକ୍ରବାର ଓ ଫେବୃୟାରୀ ୧ ଶନିବାର ସମସ୍ତ ବ୍ୟାଙ୍କ ବନ୍ଦ ଡାକରା ଦିଆଯାଇଛି। ସପ୍ତାହକୁ ୫ ଦିନ ବ୍ୟାଙ୍କିଙ୍ଗ୍ ବ୍ୟବସ୍ଥା ପ୍ରଚଳନ, ଦରମାର ପୁନଃ ନିର୍ଦ୍ଧାରଣ, ସମାନ କାମକୁ ସମାନ ଦରମା, ଅବସରକାଳୀନ ସହାୟତାରୁ ଆୟକର ବ୍ୟବସ୍ଥାକୁ ବାଦ୍ ଦେବା ଆଦି ୧୨ ଦଫା ଦାବିରେ ଫୋରମ ଅଫ୍ ବ୍ୟାଙ୍କ ୟୁନିୟନ ପକ୍ଷରୁ ଏହି ଧର୍ମଘଟ ହୋଇଛି। ସକାଳୁ କଳାହାଣ୍ଡି ରିଜିଅନ ଏସ୍ବିଆଇ ଅଫିସର ଆସୋସିଏଶନର ସଭାପତି ତ୍ରିନାଥ ସୁନା, ରିଜିଓନାଲ ସେକ୍ରେଟାରି ଏସ୍ବିଆଇ ଷ୍ଟାଫ୍ ଆସୋସିଏଶନ ଭୁବନେଶ୍ୱର ମଣ୍ଡଳ ନିମାଇଁ ଚରଣ ପାଣି, ରିଜିଓନାଲ ସେକ୍ରେଟାରି ଏସ୍ବିଆଇ ଓଏ ଶଶିଭୂଷଣ ପଣ୍ଡା ଓ ଜୋନାଲ ସେକ୍ରେଟାରି ଏସ୍ବିଆଇ ଏସ୍ଏ କଳାହାଣ୍ଡି ରିଜିଅନ ଶ୍ୟାମ ଥନାପତିଙ୍କ ସହ ବିଭିନ୍ନ ବ୍ୟାଙ୍କ ସଂଗଠନର କର୍ମଚାରୀ ପ୍ରମୁଖ ଭବାନୀପାଟଣା ଏସ୍ବିଆଇ ମୁଖ୍ୟ ଶାଖା ସମ୍ମୁଖରେ ଧାରଣାରେ ବସିରହିଥିବା ଦେଖିବାକୁ ମିଳିଛି।
ତେବେ ଆସନ୍ତା ୨ ତାରିଖ ରବିବାର ଛୁଟିଦିନ ପଡ଼ୁଥିବାରୁ ସ୍ବାଭାବିକ ଭାବେ ବ୍ୟାଙ୍କ ବନ୍ଦ ରହିବ। ଲଗାତର ୩ ଦିନ ବ୍ୟାଙ୍କ ଛୁଟି ରହୁଥିବା ବେଳେ ଲୋକେ ସଞ୍ଚୟ ଜମାଖାତାରୁ ଟଙ୍କା ଉଠାଣ ଓ ଜମା କରିବା ନେଇ ହନ୍ତସନ୍ତ ହେବା ଆଲୋଚନାର ବିଷୟ ପାଲଟିଛି।
