ବେଲପଡ଼ା ୨୫।୪(ଡି.ଏନ.ଏ.): ଗୃହପାଲିତ ପଶୁ ପାଲନ କରି ଗରିବ୍ ହିତାଧିକାରୀମାନେ କେନ୍ଥେଇ ଦୁଇପଏସା ରୁଜଗାର କରି ନିଜର ଗୁଡ଼େ ଠିଆ ହେବେ ସରକାର ସେଥିରଲାଗି ଗାଈ ଗୁହାଲ ଯୋଜନା କରିଛନ୍। ହେଲେ ଗାଁଗଁଲିରେ ରହୁଥିବାର ଅନେକ୍ ହକ୍ଦାର ହିତାଧିକାରୀ ଯୋଜନାରୁ ବଁଚିତ ହେଉଥିଲାବେଲେ ଅନେକ କୁଜିନେତା, ଥିଲାବାଲା ବିଭାଗୀୟ ଅଧ୍କାରୀମାନକୁ ଲଁାଚ୍ଖୁଁଚ୍ ଦେଇ ଯୋଜନା ହାତଉଥିବାର ଅଭିଯୋଗ ହେଉଛେ। ଯେନ୍ଥିରଲାଗି ସରକାରକଁର ଇ ମହତ୍ ଉଦେଶ ବାଟବନା ହେଉଛେ। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବଲାଙ୍ଗୀର ଜିଲା ବେଲପଡ଼ା ବ୍ଲକ ପର୍ଲିମାଲ ପଁଚେତ୍ ପର୍ଲିମାଲ ଗାଁରେ। ଇ ଗାଁର ପରମାନନ୍ଦ ପୋଢ଼ ଗାଈ ଗୁହାଲ ଲାଗି ପଁଚେତ୍ କତୁରପକ୍ଷକୁଁ ଜନେଇ ନିରାଶ ହେଲା ଉତାରୁ ଗଲା ୨୨ ତାରିଖ ବେଲପଡ଼ା ବିଡିଓ ଆର ତହସିଲଦାରକୁଁ ଗୁହାରି କରବାକେ ଆସିଥିଲେ। ହେଲେ କେହେନ୍ସି କାରନ୍ରୁ ଅଧ୍କାରୀମାନକର ଭେଟ ନାଇଁପାଇ କରି ଘଟନା ବାବ୍ଦେ ଥାନୀୟ ଧରିତ୍ରୀ ପରତିନିଧିକୁଁ ଜନେଇଥିଲେ।
ପରମାନନ୍ଦକଁର ଅଭିଯୋଗ ହିସାବେ, ଗଲା ବଛ୍ରେ ହେଲା ସରକାରୀ ଯୋଜନାରେ ଗାଈ ଗୁହାଲ ଲାଗି ପର୍ଲିମାଲ ପଁଚେତ୍ରେ ଆବେଦନ କରିଛନ୍। ସେ ଇ ବାବ୍ଦେ ସରପଁଚ୍ ଆର ପଁଚେତ୍ ନିର୍ବାହୀ ଅଧ୍କାରୀକୁଁ ବାରବାର ଗୁହାରି କରି ନିରାଶ ହେଇଛନ୍। ଏନ୍ତା କି ଝନେ ଅଧ୍କାରୀକୁଁ ଗୁହାଲ ଲାଗି ୨୦ ହଜାର ଟଁକା ଲଁ।ଚ୍ ଦେବାକେ ପଡ଼ବା ବଲି ଜାନ୍ଲା ଉତାରୁ ସେ ଭାଂଗି ପଡ଼ିଛନ୍। ପରମାନନ୍ଦ ବ୍ଲକର ଭିନେ ଭିନେ ଅଧ୍କାରୀକୁଁ ଭେଟି ଗୁହାଲ ଲାଗି କାର୍ଯ୍ୟାଦେଶ ଦେବାକେ ଗୁହାରି କରିଥିଲେ। ହେଲେ ଅଧ୍କାରୀମାନେ ସରପଁଚ୍ ଆର ନିର୍ବାହୀ ଅଧ୍କାରୀକୁଁ ଘଟନା ବାବ୍ଦେ କହିଥିବାର କହି ତାହାକୁ ପରତିଶୁରତି ଦେଇଥିଲେ। ହେଲେ ଅଧ୍କାରୀମାନେ ଦେଇଥିବାର ପରତିଶୁରତି ଆଏଜ୍ତକ୍ ପୂରନ୍ ନାଇଁ ହେଇପାରି। ପରମାନନ୍ଦକଁର ୩୦ଟା ଦେଶୀ ଗାଈ ଅଛନ୍। ସେ ୧୦ ଲିଟରରୁ ଅଧ୍କା କ୍ଷୀର ପାଉଛନ୍। ଗାଈକୁ ଗୁହାଲଟା ସାନ୍ ପଡ଼ୁଥିଲାବେଲେ ଅଧା ଭାଂଗିରୁଜି ଯାଇଛେ। ଗଲା ୨ ବଛର ହେଲା ଟଁକା ପଏସା ଅଭାବୁ ସେ ଗୁହାଲଟା ବି ସାଜି ନାଇଁପାରବାର। ଯେନ୍ଥିରଲାଗି ସେ ଗାଈଗୋରୁକର ଦେଖ୍ଭାଲ, ଯତନ୍ ବି ଠିକ୍ ହିସାବେ କରି ନାଇଁ ପାରୁଥିବାର କହିଛନ୍। ଇଆଡ଼େ ଯେନ୍ମାନକର ଗାଈଗୋରୁ, ଛେଲମେଢ଼ି ନାଁଇଁନ ସେମାନେ ଇ ଯୋଜନାରେ ସାମିଲ ହେଉଥିବାର ସେ ଅଭିଯୋଗ କରିଛନ୍। ଇ ବାବ୍ଦେ ପର୍ଲିମାଲ ପଁଚେତ୍ ନିର୍ବାହୀ ଅଧ୍କାରୀକୁଁ ମତାମତ ଲାଗି ଯୋଗାଯୋଗ କରାଯାଇଥିଲେ ବି ମତାମତ ନାଇଁ ମିଲିପାରି। ସେନ୍ତା ପର୍ଲିମାଲ ସରପଁଚ୍ ସୁଷମା ବେହେରାକୁଁ ପଚରାଲାରୁ ପରମାନନ୍ଦ ଗୁହାଲ ଲାଗି ଆବେଦନ କରିଛନ୍। ହେଲେ ତାକର ଆଗରୁ ବହୁତ ହିତାଧିକାରୀ ଆବେଦନ କରିଛନ୍। ହକ୍ଦାର ହିତାଧିକାରୀକୁଁ ଯୋଜନାରେ ସାମିଲ କରାଯାଉଛେ। ପଁଚେତ୍ରେ କେହି ଗୁହାଲ ଲାଗି ଟଁକା ଦାବି ନାଇଁକରବାର। ଇ ଅଭିଯୋଗଟା ପୂରାପୂରି ମିଛ୍ ଆଏ। ବହୁତ୍ ଜଲଦି ତାହାକୁ କାର୍ଯ୍ୟାଦେଶ ଦିଆଯିବା ବଲି ସେ କହିଥିଲେ।
