ବାଲେଶ୍ୱର ଅଫିସ,୨।୬- ବାଲେଶ୍ୱର ଜିଲାରେ ଘରୋଇ ଅର୍ଥଲଗାଣ ସଂସ୍ଥାଗୁଡ଼ିକ ବିଭିନ୍ନ ସ୍ବୟଂ ସହାୟକ ଗୋଷ୍ଠୀ ମାଧ୍ୟମରେ ଦୀର୍ଘଦିନ ଧରି ଋଣ ପ୍ରଦାନ କରି ଆସୁଛନ୍ତି। ଉକ୍ତ ଋଣକୁ ନେଇ ସ୍ବୟଂ ସହାୟକ ଗୋଷ୍ଠୀର ମହିଳାମାନେ ବିଭିନ୍ନ ପ୍ରକାର ବ୍ୟବସାୟ କରି ନିଜ ପରିବାରର ଆର୍ଥିକ ସହାୟତା କରୁଛନ୍ତି। ମୁଖ୍ୟତଃ ତାଲାବନ୍ଦ ଓ ‘ଅମ୍ଫନ’ ମହାବାତ୍ୟାରେ ମହିଳାମାନଙ୍କର ବ୍ୟବସାୟ ତଥା କାମଧନ୍ଦା ପ୍ରଭାବିତ ହେବା ଫଳରେ ଋଣ ନେଇଥିବାର ମାସିକ କିସ୍ତି ସଂସ୍ଥାକୁ ଫେରାଇବା ପାଇଁ ସକ୍ଷମ ନ ହେବାରୁ ଘରୋଇ ଅର୍ଥଲଗାଣ ସଂସ୍ଥାଗୁଡ଼ିକର କର୍ମକର୍ତ୍ତା ସ୍ବୟଂ ସହାୟକ ଗୋଷ୍ଠୀର ସଦସ୍ୟାଙ୍କ ଉପରେ ଚାପ ପ୍ରୟୋଗ କରି ଜୁଲମ୍ କରୁଥିବାର ‘ପ୍ରୟାସ ପରିବାର’ ସଂସ୍ଥା ତତ୍ତ୍ୱାବଧାନରେ ମଙ୍ଗଳବାର ବହୁ ମହିଳା ଏକତ୍ରିତ ହୋଇ ଅଭିଯୋଗ କରିବା ସହ ଉକ୍ତ ଋଣ ଛାଡ଼ କରିବା ପାଇଁ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କ ନିକଟରେ ଲିଖିତ ଦାବି କରିଛନ୍ତି। ସଂସ୍ଥାର ମୁଖ୍ୟ ରୋଜି ପଟ୍ଟନାୟକ, ଊର୍ମିଳା ଦାସ, ଜୟନ୍ତୀ ଦତ୍ତ, ରୁପା ଗିରି, ପୁଷ୍ପଲତା ପଣ୍ଡା, ଗୀତା ପାତ୍ର, ଝୁନାରାଣୀ ଖୁଣ୍ଟିଆ, ଅନିତା ମାଝି, ସାବିତ୍ରୀ ପାତ୍ର, ମମତା ସାହୁ ପ୍ରମୁଖ ବହୁ ମହିଳା ଉପସ୍ଥିତ ଥିଲେ।
