ଟୋକିଓ,୧୩।୧୧(ଏଏଫ୍ପି)- ସ୍ପେନ ପାଇଁ ଅନ୍ତର୍ଜାତୀୟ ସ୍ତରରେ ସର୍ବାଧିକ ଗୋଲ କରିଥିବା ଷ୍ଟାର ଷ୍ଟ୍ରାଇକର ଡେଭିଡ୍ ଭିଲା ଆସନ୍ତା ମାସରେ ଅବସର ନେବେ। ଜାଜ୍ଜ୍ୱଲ୍ୟମୟ କ୍ୟାରିୟରରେ ସେ ଫିଫା ବିଶ୍ୱକପ୍, ୟୁରୋପିଆନ ଚାମ୍ପିୟନଶିପ ଓ ଚାମ୍ପିୟନ୍ସ ଲିଗ୍ ଜିତି ସାରିଛନ୍ତି। ୩୭ ବର୍ଷୀୟ ଭିସେଲ କୋବ ଷ୍ଟ୍ରାଇକର ଚଳିତ ଜେ ଲିଗ୍ ସିଜନ ଶେଷରେ ଅବସର ନେବେ ବୋଲି ଘୋଷଣା କରିଛନ୍ତି। ୧୯ ବର୍ଷର ଲମ୍ବା କ୍ୟାରିୟରରେ ସେ ବାର୍ସିଲୋନା, ଆଟଲେଟିକୋ ମାଡ୍ରିଡ୍ ଓ ଭାଲେନ୍ସିଆ ଭଳି କ୍ଲବ ପକ୍ଷରୁ ପ୍ରତିନିଧିତ୍ୱ କରିବା ସହ ଦେଶ ପାଇଁ ୯୮ ମ୍ୟାଚ ଖେଳିଛନ୍ତି। ମୋ ପେସାଦାର କ୍ୟାରିୟରର ଶେଷ କରିବା ପାଇଁ ନିଷ୍ପତ୍ତି ନେଇଛି। ଏଥିନେଇ ମୁଁ ଦୀର୍ଘଦିନ ହେଲା ଚିନ୍ତା କରୁଛି। ପରିବାର ଓ ବନ୍ଧୁଙ୍କ ସହ ଆଲୋଚନା ପରେ ମୁଁ ନିର୍ଣ୍ଣୟରେ ପହଞ୍ଚତ୍ଛି ବୋଲି କୋହ ଭରା କଣ୍ଠରେ ଭିଲା କହିଛନ୍ତି। ସେ ନ୍ୟୁୟର୍କର ନୂଆ ଫ୍ରାଞ୍ଚାଇଜ କୁଇନ୍ସବୋରୋ ଏଫ୍ସିରେ ଧନ ବିନିଯୋଗ କରିବେ। ୩ ଫିଫା ବିଶ୍ୱକପ୍ ଖେଳିବା ସହ ୨୦୧୦ ବିଶ୍ୱକପ୍ ଚାମ୍ପିୟନ ଦଳର ଗୁରୁତ୍ୱପୂର୍ଣ୍ଣ ଷ୍ଟ୍ରାଇକର ଥିଲେ। ତାଙ୍କ ପ୍ରତିନିଧିତ୍ୱରେ ସ୍ପେନ ୟୁରୋପିଆନ ଚାମ୍ପିୟନଶିପ ଜିତିଥିଲେ। ଅନ୍ତର୍ଜାତୀୟ ସ୍ତରରେ ସେ ୫୯ ଗୋଲ କରିଛନ୍ତି, ଯାହାକି ଏପର୍ଯ୍ୟନ୍ତ ଏକ ଜାତୀୟ ରେକର୍ଡ। ଭିସେଲ କୋବ ଦଳ ବର୍ତ୍ତମାନ ଜେ ଲିଗରେ ୩୧ ମ୍ୟାଚ୍ ପରେ ୧୦ମ ସ୍ଥାନରେ ରହିଛି। ଗତ ଥର ସମାନ ସ୍ଥାନରେ ଅଭିଯାନ ଶେଷ କରିଥିଲେ। ଭିଲା ଚଳିତ ସିଜନରେ ୨୬ ମ୍ୟାଚ୍ ଖେଳି ୧୨ ଗୋଲ ଦେଇଛନ୍ତି। କ୍ଲବ ପାଇଁ ବଳକା ୩ ଲିଗ୍ ମ୍ୟାଚ୍ ସମେତ ଏମ୍ପେରୋର କପ୍ର ସେମିଫାଇନାଲ ଓ ଫାଇନାଲରେ ଖଳିବା ନେଇ ଆଶା କରାଯାଉଛି। ଜେ ଲିଗ୍ ପ୍ରତିଯୋଗିତାର ଅନ୍ତିମ ଦିନ ତଥା ଡିସେମ୍ବର ୭ ତାରିଖରେ ବିଦାୟକାଳୀନ ଉତ୍ସବ ଅନୁଷ୍ଠିତ ହେବ।
