ଜୟପୁର,୩।୧- ନ୍ୟୁଜିଲାଣ୍ଡ ଲେଗ୍ ସ୍ପିନର ଇଶ ସୋଧି ଆଇପିଏଲ୍ ଫ୍ରାଞ୍ଚାଇଜ ରାଜସ୍ଥାନ ରୟାଲ୍ସଙ୍କୁ ଦଳର ସ୍ପିନ୍ ବୋଲିଂ ପରାମର୍ଶଦାତା ଓ ଅପରେଶନ ଏକ୍ଜିକ୍ୟୁଟିଭ ଭାବେ ନିଯୁକ୍ତ କରାଯାଇଛି। ୨୭ ବର୍ଷୀୟ ଲେଗ୍ ସ୍ପିନର ରୟାଲ୍ସ ଦଳର ବୋଲିଂ କୋଚ୍ ସାଇରାଜ ବାହୁତୁଲେ ଓ ମୁଖ୍ୟ କାର୍ଯ୍ୟକାରୀ ଅଫିସର ଜ୍ୟାକ ଲଶ ମ୍ୟାକକ୍ରମଙ୍କ ସହ କାର୍ଯ୍ୟ କରିବେ। ଅନ୍ତର୍ଜାତୀୟ ସ୍ତରରୁ ଅବସର ନେଇ ନ ଥିବା ସ୍ପିନର ଏପର୍ଯ୍ୟନ୍ତ ଦେଶ ପାଇଁ ୪୦ ଟି୨୦ ଖେଳିସାରିଛନ୍ତି। ଗତ ଦୁଇ ସିଜନରେ ସେ ରୟାଲ୍ସ ଦଳର ସଦସ୍ୟ ଥିଲେ। ଉଭୟ ସିଜନରେ ମାତ୍ର ୯ ଉଇକେଟ ହାତେଇଥିଲେ। ସୋଧିଙ୍କୁ ନୂଆ ଭୂମିକାରେ ପାଇ ଆମେ ବହୁତ ଖୁସି। ସେ ଦ୍ୱୈତ ଭୂମିକାରେ ନଜରକୁ ଆସିବେ। ଯୁବ ପ୍ରତିଭା ଚିହ୍ନଟ ଓ ସେମାନଙ୍କ ଉନ୍ନତି ପାଇଁ ସେ କାର୍ଯ୍ୟ କରିବେ ବୋଲି ରୟାଲ୍ସ କ୍ରିକେଟ ମୁଖ୍ୟ ଜୁବିନ ବାରୁଚା କହିଛନ୍ତି। ରୟାଲ୍ସ ଦଳ ସ୍ପିନ୍ ବିଭାଗରେ ଲେଗ୍ ସ୍ପିନର ମୟଙ୍କ ମାର୍କଣ୍ଡେ, ଅଲରାଉଣ୍ଡର ଅନିରୁଦ୍ଧ ଜୋଷୀ, ଯଶସ୍ବୀ ଜୟସ୍ବାଲ ଓ ମହିପାଲ ଲୋମରୋର ରହିଛନ୍ତି।
