ନୂଆଦିଲ୍ଲୀ, ୨୨ା୨: ମହାରାଷ୍ଟ୍ର ମୁଖ୍ୟମନ୍ତ୍ରୀ ତଥା ଶିବସେନା ମୁଖ୍ୟ ଉଦ୍ଧବ ଠାକ୍ରେ ଶୁକ୍ରବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସାକ୍ଷାତ କରିଛନ୍ତି। ଭାଜପା ହାତ ଛାଡ଼ି ମହାରାଷ୍ଟ୍ରରେ କଂଗ୍ରେସ, ଏନ୍ସିପି ସହ ମିଶି ଶିବସେନା ସରକାର ଗଠନ କରିବା ପରେ ମୋଦିଙ୍କ ସହ ଉଦ୍ଧବଙ୍କ ଏହା ପ୍ରଥମ ସାକ୍ଷାତ ଆଲୋଚନା। ଏହି ଅବସରରେ ପୁଅ ଆଦିତ୍ୟ ଠାକ୍ରେ ମଧ୍ୟ ମୋଦିଙ୍କୁ ଭେଟିଥିଲେ। ମହାରାଷ୍ଟ୍ରର ବିଭିନ୍ନ ପ୍ରସଙ୍ଗକୁ ନେଇ ଏହି ସାକ୍ଷାତ ଆଲୋଚନା ହୋଇଥିଲା। ଏହି ଅବସରରେ ପ୍ରଧାନମନ୍ତ୍ରୀଙ୍କ ସହ ସିଏଏ, ଏନ୍ଆର୍ସି, ଏନ୍ପିଆର୍ ନେଇ ବିସ୍ତୃତ ଆଲୋଚନା କରାଯାଇଥିବା ଉଦ୍ଧବ ପ୍ରକାଶ କରିଛନ୍ତି। ଦେଶରେ ସିଏଏ, ଏନ୍ଆର୍ସି, ଏନ୍ପିଆର୍କୁ ନେଇ ଯେଉଁ ଭୟର ବାତାବରଣ ସୃଷ୍ଟିହୋଇଛି, ସେଥିରେ କୌଣସି ସତ୍ୟତା ନାହିଁ। ଦେଶରୁ କାହାରିକୁ ବାହାର କରାଯିବ ନାହିଁ। ଆଲୋଚନା ବେଳେ ପ୍ରଧାନମନ୍ତ୍ରୀ ମୋଦି ନିର୍ଭରଯୋଗ୍ୟ ପ୍ରତିଶ୍ରୁତି ଦେଇଥିବା ଉଦ୍ଧବ ପ୍ରକାଶ କରିଛନ୍ତି। ମହାରାଷ୍ଟ୍ରରେ ମୁଖ୍ୟମନ୍ତ୍ରୀଙ୍କ ଆଭିମୁଖ୍ୟକୁ ନେଇ ମେଣ୍ଟ ଭାଗୁଆଳି ଦଳ କଂଗ୍ରେସ ଓ ଏନ୍ସିପି ଅସନ୍ତୁଷ୍ଟ ଥିବା ବେଳେ ଉଦ୍ଧବଙ୍କ ସିଏଏ, ଏନ୍ଆର୍ସି, ଏନ୍ପିଆର୍କୁ ସମର୍ଥନ ଗୋଳମାଳିଆ ପରିସ୍ଥିତି ସୃଷ୍ଟି କରିବାର ଆଶଙ୍କା ରହିଛି। ତଥାପି ରାଜ୍ୟର ‘ମହା ବିକାଶ ଅଘାଡ଼ି’ ମେଣ୍ଟ ସରକାର ପ୍ରତି କୌଣସି ବିପଦ ନ ଥିବା ଓ କ୍ଷମତାକୁ ନେଇ କିଛି ବାଦବିବାଦ ନ ଥିବା ମୁଖ୍ୟମନ୍ତ୍ରୀ ଠାକ୍ରେ ଖବରଦାତାଙ୍କ ପ୍ରଶ୍ନର ଉତ୍ତର ଦେଇ କହିଛନ୍ତି। ଆମେ ପୂର୍ଣ୍ଣ ୫ ବର୍ଷ ଶାସନ ଗାଦିରେ ରହିବୁ ବୋଲି ଦୃଢ଼ତାର ସହ ଉଦ୍ଧବ ଠାକ୍ରେ ପ୍ରକାଶ କରିଛନ୍ତି। ପ୍ରଧାନମନ୍ତ୍ରୀ ମୋଦି ମହାରାଷ୍ଟ୍ର ସରକାରକୁ ସମସ୍ତ ପ୍ରକାର ସହଯୋଗ ଯୋଗାଇ ଦେବେ ବୋଲି ପ୍ରତିଶ୍ରୁତି ଦେଇଥିବା ସେ କହିଛନ୍ତି।
ଉଦ୍ଧବ ଓ ଆଦିତ୍ୟ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଭେଟି ପ୍ରାୟ ଅଧଘଣ୍ଟା କାଳ ଆଲୋଚନା କରିଛନ୍ତି। ଗତବର୍ଷ ମହାରାଷ୍ଟ୍ରରେ ମହା ବିକାଶ ଅଘାଡ଼ି ସରକାର ଗଠନ ହେବା ପରେ ସୋନିଆଙ୍କ ସହ ଉଦ୍ଧବଙ୍କ ଏହା ପ୍ରଥମ ସାକ୍ଷାତ ଆଲୋଚନା। ଆଲୋଚନାରେ ସିଏଏ, ଏନ୍ପିଆର୍ ପ୍ରସଙ୍ଗ ସ୍ଥାନ ପାଇଥିବା ଜଣାପଡ଼ିଛି। ପ୍ରକାଶଥାଉ କି, କଂଗ୍ରେସ ପ୍ରାରମ୍ଭରୁ ସିଏଏ, ଏନ୍ପିଆର୍କୁ ବିରୋଧ କରିଆସୁଛି। ମେଣ୍ଟ ସମନ୍ବୟ କମିଟି ବୈଠକରେ ଏନେଇ କଂଗ୍ରେସ ପୁଣି ଆଲୋଚନା କରିବାକୁ ସ୍ଥିର କରିଥିବା ଜଣାପଡ଼ିଛି।
