ଭୁବନେଶ୍ୱର,୨।୨(ବ୍ୟୁରୋ): ସାରା ଦେଶରେ ଜାତୀୟ ଜନସଂଖ୍ୟା ପଞ୍ଜିକା(ଏନ୍ପିଆର) ଆଧାରରେ ଜାତୀୟ ନାଗରିକ ପଞ୍ଜିକା(ଏନ୍ଆରସି) ପ୍ରସ୍ତୁତ କରାଯିବ। ଏହା ଦେଶକୁ ଧର୍ମଭିତ୍ତିରେ ପୁନର୍ବାର ଭାଗ କରିବା ପାଇଁ ଏକ ଚକ୍ରାନ୍ତ ବୋଲି ସିପିଏମ୍ ଓଡ଼ିଶା ରାଜ୍ୟ କମିଟି ପକ୍ଷରୁ କୁହାଯାଇଛି। ଏହିପରି ପଦ୍ଧତିକୁ ଦଳ ସମ୍ପୂର୍ଣ୍ଣ ଭାବେ ବିରୋଧ କରିବା ସହ କାର୍ଯ୍ୟକାରିଣୀରେ ଏହା ବିରୋଧରେ ପ୍ରସ୍ତାବ ଗୃହୀତ କରାଇଛନ୍ତି। ଗତ ଜାନୁୟାରୀ ୩୧ ତାରିଖରେ ଦଳର କାର୍ଯ୍ୟକାରିଣୀରେ ଏହି ନିଷ୍ପତ୍ତି ନିଆଯାଇଛି। ରାଜ୍ୟରେ ଶାସନ କରୁଥିବା ବିଜେଡିର ବଦଳୁଥିବା ଆଭିମୁଖ୍ୟକୁ ନେଇ ମଧ୍ୟ ସମାଲୋଚନା କରାଯାଇଛି। ଦଳ ପକ୍ଷରୁ କୁହାଯାଇଛି ଯେ, ବିଜେଡି ନାଗରିକତ୍ୱ ସଂଶୋଧନ ଆଇନ(ସିଏଏ)କୁ ସମର୍ଥନ କରିସାରିଛି। ଏହା ପରେ ଏନ୍ଆରସିକୁ ବିରୋଧ ନେଇ ମଧ୍ୟ ଘୋଷଣା କରିସାରିଛି। ହେଲେ ଏହା ପରେ ଏନ୍ପିଆର ପ୍ରକ୍ରିୟାକୁ ମଧ୍ୟ ସମର୍ଥନ କରିଛି। ତେଣୁ ବିଜେଡି ଜନଗଣଙ୍କ ସହ ଛଳନା କରୁଥିବା ସିପିଏମ୍ କହିଛି। ଓଡ଼ିଶାରେ ୨୨ ପ୍ରତିଶତ ଆଦିବାସୀ ଏବଂ ୧୬ ପ୍ରତିଶତରୁ ଅଧିକ ଦଳିତ ରହିଛନ୍ତି। ସେମାନେ ବର୍ଷ ବର୍ଷ ଧରି ପ୍ରକୃତି କୋଳରେ ରହିଆସିଛନ୍ତି, କାଗଜପତ୍ର ସେମାନେ କେଉଁଠାରୁ ଆଣିବେ। କେନ୍ଦ୍ର ସରକାରଙ୍କ ଏହି ସବୁ ନୀତି ଦ୍ୱାରା ରାଜ୍ୟର ଅବହେଳିତ ବର୍ଗ ବହୁଳଭାବେ ପ୍ରଭାବିତ ହେବେ। ବିଜେଡି କେନ୍ଦ୍ର ସରକାରଙ୍କୁ ସନ୍ତୁଷ୍ଟ କରିବା ପାଇଁ ସମସ୍ତ କାର୍ଯ୍ୟ କରୁଛି। ସିପିଏମ୍ ନେତା ଅଳି କିଶୋର ପଟ୍ଟନାୟକ କହିଛନ୍ତି ଯେ, ଓଡ଼ିଶା ସମେତ ୧୩ ରାଜ୍ୟ ଏନ୍ଆରସିକୁ ପ୍ରତ୍ୟାଖ୍ୟାନ କରିଛନ୍ତି। ୪ଟି ରାଜ୍ୟ ସିଏଏ-ଏନ୍ଆରସି-ଏନ୍ପିଆର ବିରୋଧରେ ପ୍ରସ୍ତାବ ଆଣିବା ସହ ଗୃହୀତ କରାଇଛନ୍ତି। ତେଣୁ ରାଜ୍ୟ ସରକାର ସେମାନଙ୍କଠାରୁ କିଛି ଶିକ୍ଷା ଗ୍ରହଣ କରନ୍ତୁ ବୋଲି ଅଳି କିଶୋର କହିଛନ୍ତି। ସିପିଏମ୍ ଦ୍ୱାରା ଏ ସମ୍ପର୍କରେ ବ୍ୟାପକ ଜନସଚେତନତା କରାଯିବ। ଆସନ୍ତା ୧୩ରେ ଦଳ ପକ୍ଷରୁ ରାଜ୍ୟସ୍ତରୀୟ ସମାବେଶ ଅନୁଷ୍ଠିତ ହେବ। ଏଥିରେ ସୀତାରାମ ୟେଚୁରୀ ଯୋଗଦାନ କରିବାର କାର୍ଯ୍ୟକ୍ରମ ରହିଛି। ଆସନ୍ତା ୧୫ରୁ ଶହୀଦ ଲକ୍ଷ୍ମଣ ନାୟକଙ୍କ ଫାଶୀ ଦିବସ ମାର୍ଚ୍ଚ ୨୯ ଯାଏ ଏହି ସଚେତନତା କାର୍ଯ୍ୟକ୍ରମ ଜାରି ରହିବ ବୋଲି ଜଣାପଡିଛି।
