ଢେଙ୍କାନାଳ ଅଫିସ, ୧୯।୨ – ଢେଙ୍କାନାଳ ସହର କୁଞ୍ଜକାନ୍ତ ଲଳିତନଗର ଅଞ୍ଚଳରେ କ୍ରମାଗତ ଚୋରି ବୃଦ୍ଧି ସ୍ଥାନୀୟ ବାସିନ୍ଦାଙ୍କ ମଧ୍ୟରେ କୋକୁଆ ଭୟ ସୃଷ୍ଟି କରିଛି। ଘରେ କଳାକନା ବୁଲାଇ ସବୁ କିଛି ଲୁଟି ନେଉଛନ୍ତି ଦୁବୃର୍ତ୍ତ। ସହରର ଅନ୍ୟତମ ଜନଗହଳିପୂର୍ଣ୍ଣ ଅଞ୍ଚଳରେ ଏପରି ଅସାମାଜିକ କାର୍ଯ୍ୟ ଲୋକଙ୍କ ନିଦ ହଜାଇ ଦେଇଥିବାବେଳେ ଆତଙ୍କିତ ଅଞ୍ଚଳବାସୀ ମଙ୍ଗଳବାର ଏସ୍ପି ଅନୁପମା ଜେମ୍ସଙ୍କ ଫେରାଦ ହୋଇଛନ୍ତି।
ସୋମବାର ବିଳମ୍ବିତ ରାତିରେ ଜିଲା ହୋମିଓପାଥିକ୍ ମେଡିକାଲ ଅଫିସର ଡ. କାଳୀଚରଣ ପୂର୍ତ୍ତିଙ୍କ ପରିବାର ସଦସ୍ୟ ଶୋଇଥିବାବେଳେ ଗ୍ରୀଲ୍ତାଡ଼ି ଦୁର୍ବୃତ୍ତମାନେ ଘରେ ପଶିଥିଲେ। ଆଲମିରା ଭାଙ୍ଗିଦେବା ସହ ଆସବାବପତ୍ର ଏଣେତେଣେ ଫିଙ୍ଗା ଫୋପଡ଼ା କରିଥିଲେ। କାଳୀଚରଣଙ୍କ ପ୍ୟାଣ୍ଟ ପକେଟରେ ଥିବା ୩୦୦୦ ଟଙ୍କା ନେଇ ସେମାନେ ଛୁ’ ମାରିଥିଲେ। ଯିବା ପୂର୍ବରୁ ଉକ୍ତ ରୁମ୍ର କବାଟ ଭିତରପଟୁ ବନ୍ଦ କରିଦେଇଥିଲେ। ଏଥିପୂର୍ବରୁ ଲୁଟେରା ଗ୍ୟାଙ୍ଗ୍ ଅନ୍ୟ ଏକ ଘରର ଝରକା ଗ୍ରୀଲ ତାଡ଼ିବାକୁ ଉଦ୍ୟମ କରି ବିଫଳ ହୋଇଥିଲେ। ଭଡ଼ାରେ ରହୁଥିବା ଯଶୋବନ୍ତ ରାଉତଙ୍କ ଘର ଝରକା ତାଡୁଥିବା ବେଳେ ଶବ୍ଦ ଶୁଣି ପରିବାର ସଦସ୍ୟ ଉଠିପଡ଼ି ପାଟି କରିଥିଲେ। ଫଳରେ ଦୁର୍ବୃତ୍ତମାନେ ପାଚେରି ଡେଇଁ ରେଳ ଧାରଣା ଆଡ଼କୁ ପକାଇଥିଲେ। ଅଭିଯୋଗ ପରେ ଟାଉନ ଥାନା ପୋଲିସ ପହଞ୍ଚତ୍ ତଦନ୍ତ କରିଛି। ଘଟଣାସ୍ଥଳରୁ ଏକ ମୁଖା ମିଳିଛି। ମାସକ ମଧ୍ୟରେ ଉକ୍ତ ଅଞ୍ଚଳରେ ଚୋରି, ଡକାୟତି, ରାହାଜାନି ଭଳି ୮ ମାମଲା ସାମ୍ନାକୁ ଆସିଛି। ନିକଟରେ କୁଞ୍ଜକାନ୍ତ ଅଞ୍ଚଳର ଏକ ଅର୍ଥଲଗାଣକାରୀ ସଂସ୍ଥାକୁ ଟାର୍ଗେଟ କରିଥିଲେ ଲୁଟେରା ଗ୍ୟାଙ୍ଗ୍। କାର୍ଯ୍ୟାଳୟର କର୍ମଚାରୀଙ୍କୁ ମରଣାନ୍ତକ ଆକ୍ରମଣ କରି ଟଙ୍କା, ମୋବାଇଲ, ଲାପ୍ଟପ୍ ସମେତ ଅନ୍ୟ ଗୁରୁତ୍ୱପୂର୍ଣ୍ଣ ସାମଗ୍ରୀ ଲୁଟି ନେଇଥିଲେ। ଏହାକୁ ବାଦ୍ ଦେଲେ ୫ଟି ଚୋରି ଏବଂ ୨ଟି ସୁନା ଚେନ ଲୁଟ୍ ମାମଲା ରୁଜୁ ହୋଇଛି।
