କାମାକ୍ଷାନଗର,୪।୧୨(ଡି.ଏନ.ଏ.)-ଡ୍ରାଇଭରଙ୍କ ସାମାନ୍ୟତମ ଭୁଲ ଯୋଗୁ ତାଙ୍କ ହାତରେ ଲାଗିଥିଲା ଟଙ୍କା, ଅଳଙ୍କାର ଭର୍ତ୍ତି ବ୍ୟାଗ୍। ଚାହିଁଥିଲେ ଏହାକୁ ରଖିଦେଇପାରନ୍ତେ ନିଜ ପାଖରେ। ହେଲେ ଏହା ତାଙ୍କୁ ପାପବୋଧ ହେଲା। ତେଣୁ ସେ ଫେରାଇଦେଲେ ସେସବୁକୁ। ସାମନ୍ୟ ଲୋଭରୁ ମଣିଷ ମଣିଷର ଜୀବନ ନେବାକୁ ପଛାଉ ନ ଥିବାବେଳେ ପାଇଥିବା ଧନକୁ ପ୍ରକୃତ ମାଲିକଙ୍କୁ ଫେରାଇ ଦେଇ ଭିନ୍ନ ଉଦାହରଣ ସୃଷ୍ଟି କରିଛନ୍ତି କାମାକ୍ଷାନଗର ଇଲେକ୍ଟ୍ରି ଛକରେ ସେଲୁନ୍ କରି ପେଟ ପୋଷୁଥିବା ଯୁବକ ସରୋଜ କୁମାର ବାରିକ ଓରଫ୍ ଲିଟୁ (୨୬)।
ସମ୍ପୂର୍ଣ୍ଣ ଘଟଣା ଏହିପରି, ସରୋଜଙ୍କ ଘର କାମାକ୍ଷାନଗର ଏନଏସି ଅଧୀନ ଆଳତୁମା ଗ୍ରାମରେ। ଜଣେ ସମ୍ପର୍କୀୟଙ୍କ ଦେହ ଅସୁସ୍ଥ ଥିବାରୁ ସୋମବାର ସେ କେନ୍ଦୁଝର ଆସୁଥିବା ଏକ ବସ୍ରେ କଟକରୁ ଔଷଧ ମଗାଇଥିଲେ। ସେହି ବସ୍ରେ କଟକରେ ରହି ନର୍ସ ଭାବେ କାମ କରୁଥିବା ଜଣେ ମହିଳା ନିଜ ଘର ଗଡ଼ପଳାଶୁଣୀକୁ ନଗଦ ୧୦ ହଜାର ଟଙ୍କା ସହ କିଛି ଅଳଙ୍କାର ପଠାଇଥିଲେ। ହେଲେ ବସ୍ର ଡ୍ରାଇଭର ଅଜାଣତରେ ମହିଳାଙ୍କ ବ୍ୟାଗକୁ ସରୋଜଙ୍କୁ ଦେଇ ଦେଇଥିଲେ। ସରୋଜ ବ୍ୟାଗ୍ ଖୋଲି ଦେଖିବା ପରେ ଘଟଣା ଜାଣି ପାରିଥିଲେ। ନର୍ସଙ୍କ ପରିବାର ଟଙ୍କା, ଗହଣା ଥିବା ବ୍ୟାଗ୍ ନ ପାଇ ୬୦ କିମି ଦୂର କାମାକ୍ଷାନଗର ଆସି ଛାନଭିନ୍ କରିଥିଲେ। କାଳେ କୌଣସି ଔଷଧ ଦୋକାନୀ ହାତରେ ଉକ୍ତ ବ୍ୟାଗ ଲାଗିଥିବ ଭାବି ସେମାନେ ପଚରାଉଚୁରା କରି ନିରାଶରେ ଘରକୁ ଫେରିଥିଲେ। ସରୋଜ ମହିଳାଙ୍କ ଭାଇ ଲିଟୁ ସିଂଙ୍କ ସହ ଯୋଗାଯୋଗ କରି ଟଙ୍କା, ଗହଣା ଭର୍ତ୍ତି ବ୍ୟାଗ୍ ଫେରାଇଥିଲେ। ହଜି ଯାଇଥିବା ବ୍ୟାଗ୍ ମିଳିବା ପରେ ଲିଟୁ ଇଲେକ୍ଟ୍ରି ଛକରେ ଥିବା ତାରିଣୀ ମନ୍ଦିରରେ ପୂଜାର୍ଚ୍ଚନା କରିଥିଲେ। ଏଥିସହ ସରୋଜଙ୍କ ସଚ୍ଚୋଟ ପଣିଆକୁ ସେ ପ୍ରଶଂସା କରିଛନ୍ତି।
