ଛତିଆ,୪ା୬(ଡି.ଏନ.ଏ.)- ବୈରୀ ଥାନା ଅନ୍ତର୍ଗତ ସମିଆଁ ପଞ୍ଚାୟତର ନାବାଳିକା ଅପହରଣ ଘଟଣାକୁ ଦୁଇ ମାସ ବିତିଯାଇଥିଲେ ମଧ୍ୟ ଅଦ୍ୟାବଧି ପୋଲିସ ଅପହରଣକାରୀଙ୍କୁ ଗିରଫ କରିବାରେ ସଫଳ ହୋଇନାହିଁ। ତେବେ ତୁରନ୍ତ ଅପହରଣକାରୀଙ୍କୁ ଗିରଫ ଓ ତଦନ୍ତ ଅଧିକାରୀଙ୍କୁ ପରିବର୍ତ୍ତନ ଦାବିରେ ମଙ୍ଗଳବାର ପରିବାର ଲୋକେ ବୈରୀ ଥାନା ସମ୍ମୁଖରେ ଧାରଣା ଦେଇଥିଲେ। ଥାନାଧିକାରୀ ନିରଞ୍ଜନ ଶବର ପହଞ୍ଚି ପରିବାର ଲୋକଙ୍କ ସହ ଉକ୍ତ ଦାବି ବିଷୟରେ ଆଲୋଚନା କରିଥିଲେ। ଖୁବ୍ଶୀଘ୍ର ଅଭିଯୁକ୍ତଙ୍କୁ ଗିରଫ କରାଯିବା ସହ ନିଜେ ଥାନାଧିକାରୀ ଶବର ତଦନ୍ତଭାର ନେବେ ବୋଲି ପରିବାର ଲୋକଙ୍କୁ ପ୍ରତିଶ୍ରୁତି ଦେବା ପରେ ଅନଶନ ପ୍ରତ୍ୟାହାର କରିଥିଲେ।
ପ୍ରକାଶ ଯେ, ଗତ ଏପ୍ରିଲ ୬ ତାରିଖରେ ସମିଆଁ ପଞ୍ଚାୟତର ଜଣେ ନାବାଳିକା ସ୍କୁଲରୁ ଫେରିବାବେଳେ ନିଖୋଜ ହୋଇଯାଇଥିଲେ। ସମିଆଁ ପଞ୍ଚାୟତ ଅନ୍ତର୍ଗତ ରାଇଝର ଗ୍ରାମର ଧୀର ବେହେରା ନାବାଳିକାଙ୍କୁ ଅପହରଣ କରିଥିବା ଖବରପାଇ ପରିବାର ଲୋକେ ୮ ତାରିଖରେ ବୈରୀ ଥାନାରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତିକରି ପୋଲିସ ଏକ ମାମଲା (ନଂ. ୫୪/୧୯) ରୁଜୁ କରିଥିଲା। ଧୀରଙ୍କ ନାମରେ ଅଭିଯୋଗ ହେବାରୁ ତାଙ୍କର ବଡ଼ ଭାଇ କ୍ଷୀର ନାବାଳିକାଙ୍କ ପରିବାର ଲୋକଙ୍କୁ ଗାଳିଗୁଲଜ କରିବା ସହ ଧମକ ଦେଇଥିବା ନେଇ ନାବାଳିକାଙ୍କ ମା’ ଥାନାରେ ଅନ୍ୟ ଏକ ଅଭିଯୋଗ କରିଥିଲେ। ଏହି ଘଟଣାର ତଦନ୍ତ ଦାୟିତ୍ୱ ଏଏସ୍ଆଇ ଗିରିଶ ମହାନ୍ତିଙ୍କୁ ଦିଆଯାଇଥିଲା। ହେଲେ ୨ ମାସ ବିତିଯାଇଥିଲେ ମଧ୍ୟ ପୋଲିସ ନାବାଳିକାଙ୍କୁ ଉଦ୍ଧାର ନ କରିବା ଓ ଅପହରଣକାରୀଙ୍କୁ ଗିରଫ ନ କରିବାରୁ ପରିବାର ଲୋକେ ଥାନା ସମ୍ମୁଖରେ ଧାରଣା ଦେଇଥିଲେ। ଏ ସମ୍ପର୍କରେ ବୈରୀ ଥାନାଧିକାରୀ ନିରଞ୍ଜନ ଶବରଙ୍କୁ ପଚାରିବାରୁ, ସେମାନେ ୪ ସ୍ଥାନରେ ଚଢ଼ାଉ କରିଥିଲେ ମଧ୍ୟ ସନ୍ଧାନ ପାଇ ନ ଥିଲେ। ଏପରିକି ଅପହରଣକାରୀଙ୍କ ମୋବାଇଲ ଟ୍ରାକିଂ କରି ବାଙ୍ଗାଲୋରରେ ଥିବା ଜାଣିବା ପରେ ଏକ ପୋଲିସ୍ ଟିମ୍ ସେଠାକୁ ଯାଇଥିଲା। ମାତ୍ର ପୋଲିସ୍ ପହଞ୍ଚତ୍ବା ପୂର୍ବରୁ ସେମାନେ ଉକ୍ତ ସ୍ଥାନ ଛାଡି ପଳାଇଯାଇଥିଲେ। ପରେ ସେମାନେ ସୁରଟରେ ଥିବା ଜଣାପଡିଛି। ଯାଜପୁର ଆରକ୍ଷୀ ଅଧୀକ୍ଷକଙ୍କ ସହ ଆଲୋଚନା କରି ଖୁବ୍ଶୀଘ୍ର ଏକ ପୋଲିସ୍ ଟିମ୍ ସୁରଟ ପଠାଯିବା ପାଇଁ ବ୍ୟବସ୍ଥା କରାଯିବ ବୋଲି କହିଥିଲେ।
