କଟକ ଅଫିସ,୩୧।୧: ପ୍ରାଚୀନ ସହର କଟକରେ ରହିଛି ଅନେକ ପୁରାତନ ଶିକ୍ଷାନୁଷ୍ଠାନ। ଏପରି କି ୧୦୦ବର୍ଷରୁ ଊର୍ଦ୍ଧ୍ୱ ସ୍କୁଲ ଏଠାରେ ସ୍ଥାପିତ ହୋଇଛି। ଭାରତର ସ୍ବାଧୀନତା ସଂଗ୍ରାମରେ ଏହି ଶିକ୍ଷାନୁଷ୍ଠାନଗୁଡିକର ବହୁ ଗୁରୁତ୍ୱପୂର୍ଣ୍ଣ ଭୂମିକା ରହିଥିଲା। ଅନେକ ସଂଗ୍ରାମୀ ଏଠାରେ ଶିକ୍ଷାଲାଭ କରି ସ୍ବାଧୀନାତା ସଂଗ୍ରାମରେ ଝାସ ଦେଇଥିଲେ। ଏଭଳି ଏକ ସ୍କୁଲ ହେଉଛି ପ୍ୟାରୀମୋହନ ଏକାଡେମୀ। ୧୮୭୫ରେ ସ୍ଥାପିତ ହୋଇଥିବା ଏହି ସ୍କୁଲରେ ରହିଛି ଅନେକ ସମସ୍ୟା। ଏହାକୁ ନେଇ ଛାତ୍ରୀଛାତ୍ର ଓ ଅଭିଭାବକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ପ୍ୟାରୀମୋହନ ଏକାଡେମୀରେ ଏବେ ୪ର୍ଥରୁ ୧୦ମ ଶ୍ରେଣୀ ପର୍ଯ୍ୟନ୍ତ ପାଠପଢ଼ା ହେଉଥିବା ବେଳେ ଛାତ୍ରୀଛାତ୍ର ସଂଖ୍ୟା ୭୮୫। ହେଲେ ସେମାନଙ୍କୁ ପଢାଇବା ପାଇଁ ଅଛନ୍ତି ୨୮ ଜଣ ଶିକ୍ଷୟିତ୍ରୀଶିକ୍ଷକ। ଛାତ୍ରୀଛାତ୍ରଙ୍କ ସଂଖ୍ୟା ତୁଳନାରେ ଆବଶ୍ୟକ ସଂଖ୍ୟକ ଶିକ୍ଷକ ନ ଥିବାରୁ ଠିକ୍ ଭାବେ ପାଠପଢା ହୋଇପାରୁନାହିଁ। ଗତ ୨ବର୍ଷ ହେବ ଏଭଳି ସମସ୍ୟା ଲାଗି ରହିଥିଲେ ମଧ୍ୟ ଏହାର ପ୍ରତିକାର ବ୍ୟବସ୍ଥା କରାଯାଉନାହିଁ। ସେହିପରି ଏହି ଏକାଡେମୀର କୋଠାଗୁଡିକ ପୁରାତନ ହୋଇଥିବାରୁ ବର୍ଷା ହେଲେ ପାଣି ଗଳୁଛି। ବିଶେଷକରି ବର୍ଷାଦିନରେ ପରୀକ୍ଷାଗାରରେ ପାଣି ଜମି ରହୁଛି ବୋଲି ଜଣେ ଛାତ୍ର କହିଛନ୍ତି। ଏକାଡେମୀ ପରିସରରେ ଥିବା ଅଡିଟୋରିୟମର ପୁନରୁଦ୍ଧାର ପାଇଁ ଯୋଜନା ହୋଇଛି। ହେଲେ ଏହି ଯୋଜନା କାଗଜପତ୍ରରେ ଅଟକି ରହିଛି ବୋଲି ଅଭିଯୋଗ ହୋଇଛି। ଏକାଡେମୀ ଖେଳପଡିଆରେ ଅଧିକାଂଶ ସମୟ ନର୍ଦ୍ଦମାପାଣି ଜମି ରହୁଛି। ଏଥିଯୋଗୁ କୌଣସି କ୍ରୀଡା ପ୍ରତିଯୋଗିତା ହୋଇପାରୁନାହିଁ। ଏହାଛଡା ଏଠାରେ ଶୌଚାଳୟ, ଶ୍ରେଣୀଗୃହ, ହଷ୍ଟେଲ ଭଳି ଅନେକ ଅସୁବିଧା ରହିଛି। ଏ ସମ୍ପର୍କରେ ଏକାଡେମୀ ପକ୍ଷରୁ ସରକାର ଓ ଜିଲା ପ୍ରଶାସନକୁ ଅବଗତ କରାଯାଇଛି। ଏହାର କୌଣସି ସମାଧାନ କରାଯାଉ ନ ଥିବାରୁ ଛାତ୍ରୀଛାତ୍ରଙ୍କ ସମେତ ଅଭିଭାବକଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ଏ ସମ୍ପର୍କରେ ଏକାଡେମୀର ପ୍ରଧାନଶିକ୍ଷକ ଧିରେନ୍ଦ୍ର ନାଥ ନାୟକ କୁହନ୍ତି, ସମସ୍ୟା ଦୂରକରିବା ନିହାତି ଆବଶ୍ୟକ। ଶହେବର୍ଷରୁ ଅଧିକ ପୁରୁଣା ସ୍କୁଲ ପ୍ରତି ଜିଲା ପ୍ରଶାସନ ବିଶେଷ ଦୃଷ୍ଟିଦେବା ଉଚିତ୍।
