ରାୟଗଡ଼ା ଅଫିସ,୧୮ ।୨
ରାୟଗଡ଼ା ଜିଲା ପରିଷଦ ଅଧ୍ୟକ୍ଷ ପଦ ପାଇଁ ବୁଧବାର ନିର୍ବାଚନ। ଏହା ପୂର୍ବରୁ ୩ ରାଜନୈତିକ ଦଳ ଭିତରୁ କଂଗ୍ରେସ ନିଜ ରଣନୀତି ସ୍ପଷ୍ଟ କରିସାରିଛି। କଂଗ୍ରେସ ପାଖରେ ସର୍ବାଧିକ ସଦସ୍ୟ ଥିବାରୁ ଦଳ ଅଧ୍ୟକ୍ଷ ପଦ ହାତେଇବା ଦୌଡ଼ରେ ଆଗୁଆ ରହିଛି। କିନ୍ତୁ ବିଜେଡି ଓ ଭାଜପା ଏନେଇ କଣ କରିବେ, ତାହାର ଚିତ୍ର ସ୍ପଷ୍ଟ ହୋଇନାହିଁ। ଚର୍ଚ୍ଚା ହେଉଛି, ଏହି ଦୁଇଟି ଦଳର ସଭ୍ୟମାନେ ମିଶି ସଂଖ୍ୟାଗରିଷ୍ଠତା ସହ ବୁଝାମଣା ଭିତ୍ତିରେ ଅଧ୍ୟକ୍ଷ ପଦ ନେବାକୁ ଯୋଜନା କରୁଛନ୍ତି। ଏହା କେତେ ସତ, ତାହା ବୁଧବାର ନିର୍ବାଚନୀ ଚିତ୍ର ସ୍ପଷ୍ଟ କରିବ। ଗତ ଥର ଅଧ୍ୟକ୍ଷ ପଦ ହାତେଇଥିବା କଂଗ୍ରେସ ଏଥର ମଧ୍ୟ ସେହି ଆସନରେ ନିଜ ଦଳର ସଭ୍ୟଙ୍କୁ ଆସୀନ କରିବା ପାଇଁ ପୂରା ଦମ୍ରେ ଲାଗିଛି। ଦଳୀୟ କର୍ମୀମାନେ ଏନେଇ ବେଶ୍ ଉତ୍ସାହିତ ଓ ତତ୍ପର ଅଛନ୍ତି। ୨୧ ଜଣ ଜିଲା ପରିଷଦ ସଭ୍ୟାଙ୍କ ମଧ୍ୟରୁ କଂଗ୍ରେସ ହାତରେ ୧୦ ଜଣ ସଭ୍ୟ ରହିଛନ୍ତି। ତେଣୁ ସଂଖ୍ୟା ବଳରେ କଂଗ୍ରେସ ଜିଲା ପରିଷଦ ଅଧ୍ୟକ୍ଷ ପଦ ଦୌଡ଼ରେ ଆଗୁଆ ରହିଛି। କଂଗ୍ରେସ ଦଳ ଏହି ଆସନ ପାଇଁ ଦୃଢ଼ବିଶ୍ୱାସୀ ହୋଇ ନିର୍ବାଚନ ପୂର୍ବରୁ ମିଠା ବାଣ୍ଟୁଥିବା ଦେଖିବାକୁ ମିଳିଛି। ଯଦି କେହି କଂଗ୍ରେସ ଦଳରେ ବିଭାଜନ ସୃଷ୍ଟି କରିବାକୁ ଚେଷ୍ଟା କରିବେ, ଅନ୍ୟ ଦଳରେ ମଧ୍ୟ କ୍ରସ ଭୋଟିଂ କରାଇବାର କ୍ଷମତା ଆମ ଦଳରେ ରହିଛି ବୋଲି ଜିଲା କଂଗ୍ରେସ ସଭାପତି ଦୁର୍ଗା ପ୍ରସାଦ ପଣ୍ଡା କହିଛନ୍ତି।
ଅନ୍ୟପକ୍ଷରେ ଦୁଇ ପ୍ରମୁଖ ଦଳ ବିଜେଡି ଓ ଭାଜପାର ଆଭିମୁଖ୍ୟରୁ ନିର୍ବାଚନୀ ସମ୍ପର୍କିତ କିଛି ସ୍ପଷ୍ଟ ଚିତ୍ର ମିଳୁନାହିଁ। କେନ୍ଦ୍ରର ଭାଜପା ଓ ରାଜ୍ୟ ବିଜେଡି ମଧ୍ୟରେ କେତୋଟି ବିଷୟରେ ଆପୋଷ ବୁଝାମଣା ଥିବାରୁ ଜିଲା ପରିଷଦ ଅଧ୍ୟକ୍ଷ ନିର୍ବାଚନରେ ମଧ୍ୟ ତାହା ପ୍ରତିଫଳିତ ହେବାର ସମ୍ଭାବନା ରହିଛି। ଅନ୍ୟପକ୍ଷରେ ବିଜେଡି ନେତା ତଥା ରାଜ୍ୟସଭା ସଭ୍ୟ ଏନ୍. ଭାସ୍କର ରାଓଙ୍କ ଅନୁସାରେ ଦଳୀୟ ସଭ୍ୟଙ୍କ ସଂଖ୍ୟା ଗରିଷ୍ଠତା ନାହିଁ। ୭ ଜଣ ସଭ୍ୟଙ୍କୁ ନେଇ ଜିଲା ପରିଷଦ ଅଧ୍ୟକ୍ଷ ପଦ ହାତେଇବା ଅତି କଷ୍ଟକର ବୋଲି ସେ କହିଛନ୍ତି। କିନ୍ତୁ ବିଜେଡି ରଣନୀତି ଓ ରାଜ୍ୟସଭା ସଭ୍ୟଙ୍କୁ ଜାଣିଥିବା ରାଜନୀତି ସମୀକ୍ଷକମାନେ ମତ ଦେଉଛନ୍ତି ଯେ ଏହା ରାଜନୈତିକ ଝଡ଼ ପୂର୍ବର ଏକ ନିରବତା। ରାୟଗଡ଼ା ଜିଲା ଭାଜପା ସଭାପତି ଶିବ ପଟ୍ଟନାୟକଙ୍କ ଅନୁସାରେ ଭୋଟିଂ ନିଷ୍ପତ୍ତି ପାଇଁ ଦଳୀୟ ସଭ୍ୟ ଓ ଜିଲା ସଭାପତି ରାଜଧାନୀ ଗସ୍ତ କରିଛନ୍ତି। ଭାଜପା ପାଖରେ ସଂଖ୍ୟାଗରିଷ୍ଠତା ନ ଥିବାରୁ ଦଳ କୌଣସି ପ୍ରାର୍ଥୀଙ୍କୁ ସମର୍ଥନ ନ କରି ଭୋଟ୍ଦାନରୁ ବିରତି ରହିବା ଭାଜପା ପାଇଁ ସ୍ବାଭିମାନର ବିଷୟ ହେବ ବୋଲି ସେ କହିଛନ୍ତି। ତେବେ ଏହି ଦୁଇଟି ଦଳର ନିରବତା ଭିତରେ ଅନ୍ୟ ଏକ କଥା ଗୁଞ୍ଜରିତ ହେଉଛି ଯେ, କଂଗ୍ରେସ ପାଖରେ ଅଧିକ ସଭ୍ୟ ଥିଲେ ମଧ୍ୟ ଯଦି ବିଜେଡି ଓ ଭାଜପା ମିଶିଯାଆନ୍ତି, ତେବେ ସେମାନେ ସଂଖ୍ୟାଗରିଷ୍ଠ ହୋଇ ଆପୋଷ ବୁଝାମଣାରେ ବିଜୟୀ ହେବା ସହ ଅଧ୍ୟକ୍ଷ ପଦ ହାତେଇପାରିବେ। ଉଲ୍ଲେଖଯୋଗ୍ୟ, ୨୦୧୭ରେ ରାୟଗଡ଼ା ଜିଲାର ୨୨ ଜଣ ଜିଲା ପରିଷଦ ସଭ୍ୟଙ୍କ ମଧ୍ୟରୁ ୧୧ ଜଣ କଂଗ୍ରେସ, ୭ ଜଣ ବିଜେଡି ଓ ୪ ଜଣ ଭାଜପାରେ ସଭ୍ୟ ଥିଲେ। ସେଥର କଂଗ୍ରେସର ପୁରୁଷୋତ୍ତମ ଗମାଙ୍ଗ ଜିଲା ପରିଷଦ ଅଧ୍ୟକ୍ଷ ରୂପେ ନିର୍ବାଚିତ ହୋଇଥିଲେ। ସେତେବେଳେ କଂଗ୍ରେସ ଓ ଭାଜପା ଦଳର ସଭ୍ୟ କ୍ରସ୍ ଭୋଟିଂ କରିଥିବା ଅଭିଯୋଗ ହୋଇଥିଲା।
