ରଣପୁର,୩।୮(ସ୍ବ.ପ୍ର.): ବନ୍ୟଜନ୍ତୁ ଶିକାର ପାଇଁ ନୟାଗଡ ବନଖଣ୍ଡ ପଞ୍ଚରିଡା ରେଞ୍ଜର ପଥରଗଣ୍ଡ ପ୍ରକଳ୍ପ ନିରାପଦ ସ୍ଥାନ ପାଲଟିଛି । ରଣପୁର କ୍ଷୁଦ୍ର ଜଳସେଚନ ବିଭାଗ ଅଧୀନରେ ଥିବା ଏହି ପ୍ରକଳ୍ପ ନିକଟକୁ ବନ୍ୟଜୀବଜନ୍ତୁ ପାଣି ପିଇବାକୁ ଆସି ଶିକାର ହେଉଛନ୍ତି। ଭୋର ସମୟରେ ଆସୁଥିବା ବନ୍ୟପ୍ରାଣୀଙ୍କୁ କୁକୁର ଲଗାଇ ହତ୍ୟା କରାଯାଉଛି । ଗତ ୧ମାସ ମଧ୍ୟରେ ଏଠାରେ ୫ ବାର୍ହା ଓ ୪ କୁଟୁରା ଏପରି ୯ଟି ବନ୍ୟଜନ୍ତୁଙ୍କୁ ଶିକାର କରାଗଲାଣି ବୋଲି ଗ୍ରାମର କେତେକ ଲୋକ ନାମ ଗୋପନ ରଖି କହିଛନ୍ତି।
ଗତ ୩୧ ତାରିଖ ବୁଧବାର ଭୋର ସମୟରେ ଏକ କୁଟୁରା ପାଣି ପିଇବାକୁ ଏହି ପ୍ରକଳ୍ପକୁ ଆସିଥିବାବେଳେ କୁକୁର ପଲ ଆକ୍ରମଣ କରିଥିଲେ । କୁକୁରଙ୍କ ଆକ୍ରମଣରେ ଘାଇଲା ହୋଇ କୁଟୁରାଟି ଡମସାହିର ଏକ ଦୋକାନ ଘରେ ପଶି ଯାଇଥିଲା । କିଛି ଯୁବକ କୁଟୁରାକୁ କୁକୁର ମୁହଁରୁ ରକ୍ଷା କରି ନିଜେ ଭୋଜି କରି ଖାଇଥିବା ଅଭିଯୋଗ ହୋଇଛି।
ସୂଚନା ଅନୁସାରେ ଡମସାହିର ଶାଳ ଜଙ୍ଗଲରେ କୁଟୁରା, ବାର୍ହା ଆଦି ବନ୍ୟ ଜୀବଜନ୍ତୁ ରହୁଛନ୍ତି। କିଛି ଶିକାରୀ ନିୟମିତ ଶାଳ ଜଙ୍ଗଲରେ ଶିକାର କରି ଆସୁଛନ୍ତି । ତେବେ ପଥରଗଣ୍ଡ ପ୍ରକଳ୍ପକୁ ଜୀବଜନ୍ତୁ ପାଣି ପିଇବାକୁ ଆସୁଥିବା ଦେଖି ଶିକାରୀ ଓ ସ୍ଥାନୀୟ କେତେକ ଲୋକ ବିଭିନ୍ନ ଉପାୟରେ ଶିକାର କରୁଛନ୍ତି। କେହି କେହି ଗୁଳି କରି ହତ୍ୟା କରୁଥିବାବେଳେ ଆଉ କେହି କୁକୁର ଲଗାଇ ହତ୍ୟା କରୁଛନ୍ତି। ସେହିପରି ୯ଟି ଶିକାର ମଧ୍ୟରୁ ୭ ବନ୍ୟପ୍ରାଣୀଙ୍କୁ କୁକୁର ଲଗାଇ ହତ୍ୟା କରାଯାଇଥିବା ଜଣେ ଶିକାରୀ ନାମ ଗୋପନ ରଖି ପ୍ରକାଶ କରିଛନ୍ତି।
ସୂଚନା ଅନୁସାରେ ପଥରଗଣ୍ଡ ପ୍ରକଳ୍ପ ନିରାପଦ ସ୍ଥାନ ପାଖରେ ଗୁଳି କରି ଶିକାର କରିବା ନିରାପଦ ନୁହେଁ । ଏଠାରେ କୁକୁର ଲଗାଇ ହତ୍ୟା କଲେ କେହି ଜାଣି ପାରୁ ନାହାନ୍ତି । ଏଥିରେ ଶିକାରୀଙ୍କ ଅପେକ୍ଷା କିଛି ସ୍ଥାନୀୟ ଲୋକ ସାମିଲ ଥିବାରୁ କଥା ବାହାରକୁ ଆସିପାରୁନି। ନୟାଗଡ ଡିଏଫ୍ଓ ଧନରାଜ ଏଚଡି କୁହନ୍ତି ଗତ ୩୧ ତାରିଖରେ ଘଟିଥିବା କୁଟୁରା ହତ୍ୟାର ତଦନ୍ତ ଚାଲୁ ରହିଛି । ଗଁ। ଲୋକ ମହଁ ଖୋଲୁ ନ ଥିବାରୁ ତଦନ୍ତରେ ବାଧା ଉପୁଜିଛି । ତଥାପି ବନ ବିଭାଗ ତଦନ୍ତକୁ ତ୍ୱରାନ୍ବିତ କରି ସଫଳତା ପାଇବାକୁ ଆଶା ରଖିଛି ।
