ଶାରଳା ରିଅଲକନ୍‌ର ୧୩.୯୭ କୋଟିର ସମ୍ପତ୍ତି ବାଜ୍ୟାପ୍ତି ନିର୍ଦ୍ଦେଶ
7:13 amNovember 22, 2022 / 07

ଭୁବନେଶ୍ୱର,୨୨ା୧୧(ବ୍ୟୁରୋ): ବାସୋପଯୋଗୀ ଜମି ଦେବା ଆଳରେ ଶାରଳା ରିଅଲକନ୍‌ ପ୍ରାଇଭେଟ୍‌ ଲିଃ ଜମାକାରୀଙ୍କ ୧୭ କୋଟି ଟଙ୍କା ଠକିବା ମାମଲା କଟକ ଓପିଆଇଡି କୋର୍ଟରେ ବିଚାରାଧୀନ ରହିଛି। ସୋମବାର ଏହାର ଶୁଣାଣି କରି କୋର୍ଟ ଜବତ ୧୩.୯୭ କୋଟିରୁ ଊର୍ଦ୍ଧ୍ୱ ସ୍ଥାବର ଓ ଅସ୍ଥାବର ସମ୍ପତ୍ତି ବାଜ୍ୟାପ୍ତି କରିବାକୁ କଟକ ଏଡିଏମ୍‌ଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ସମ୍ପତ୍ତିରେ ରହିଛି ୧୩.୮୧ କୋଟିର ୯୫ ଏକର ଜମି, ୧୩.୧୦ ଲକ୍ଷର ଫ୍ରିଜ୍‌ ବ୍ୟାଙ୍କ ଜମା, ୩.୨୫ କୋଟିର ନଗଦ ଟଙ୍କା ଏବଂ ୪ଟି ଚାରିଚକିଆ ଗାଡ଼ି। ତେବେ ଅସ୍ଥାବର ସମ୍ପତ୍ତିକୁ ନିଲାମ କରି ବିକ୍ରି ଟଙ୍କା ସହ ବ୍ୟାଙ୍କ ଜମାକୁ ମିଶାଇ ମୋଟ ଟଙ୍କାକୁ ଜମାକାରୀଙ୍କୁ ଫେରାଇବାକୁ କୋର୍ଟ କହିଛନ୍ତି।
ସୂଚନା ଅନୁଯାୟୀ, ଭୁବନେଶ୍ୱର ଓ ଏହାର ଆଖପାଖରେ ଜମି ଦେବାକୁ କହି ୨୦୧୦ରୁ ୨୦୧୩ ମସିହା ମଧ୍ୟରେ ୨୩୮ଜଣ ଜମାକାରୀଙ୍କଠାରୁ କମ୍ପାନୀର ପରିଚାଳନା ନିର୍ଦ୍ଦେଶକ ତଥା ଅଭିଯୁକ୍ତ ଗୟାଧର ଜେନା ଏବଂ ନିର୍ଦ୍ଦେଶକମାନେ ପ୍ରାୟ ୧୭ କୋଟି ଟଙ୍କା ଠକି ନେଇଥିଲେ। ଉକ୍ତ ଟଙ୍କାରେ ସେମାନେ ବିପୁଳ ସମ୍ପତ୍ତି ଠୁଳ କରିଥିଲେ। ଏନେଇ ଅଭିଯୋଗ ହେବା ପରେ କ୍ରାଇମ୍‌ବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ) ୨୦୧୫ ମାର୍ଚ୍ଚ ୧୫ରେ ଏକ ମାମଲା (ନଂ.୯/୧୫) ରୁଜୁ କରି ତଦନ୍ତ ଆରମ୍ଭ କରିଥିଲା। ସେହି ବର୍ଷ ଇଓଡବ୍ଲ୍ୟୁ ଗୟାଧର ଓ ୨ ନିର୍ଦ୍ଦେଶକଙ୍କୁ ଗିରଫ କରିଥିଲା। ଏପରିକି ନିର୍ଦ୍ଦେଶକ ଥିବା ଗୟାଧରଙ୍କ ସ୍ତ୍ରୀ ପଙ୍କଜିନୀ ମଧ୍ୟ ଗିରଫ ହୋଇଥିଲେ। ଇଓଡବ୍ଲ୍ୟୁ ତଦନ୍ତ କରି ଚାର୍ଜଶିଟ୍‌ ଦାଖଲ କରିବା ସହ ଠକେଇ ଟଙ୍କାରେ ହୋଇଥିବା ସମସ୍ତ ସମ୍ପତ୍ତିକୁ ଚିହ୍ନଟ କରିବା ପରେ ତାହାକୁ ବାଜ୍ୟାପ୍ତି କରିବାକୁ ପ୍ରସ୍ତାବ ଦେଇଥିଲା। ଅର୍ଥ ବିଭାଗ ୨୦୧୬ ଅକ୍ଟୋବରରେ ଏହାକୁ ବାଜ୍ୟାପ୍ତି କରିବାକୁ ଏକ ଅର୍ଡର ଦେଇଥିଲା। ଏଥିସହ କଟକ ଓପିଆଇଡି କୋର୍ଟରେ ମାମଲାର ବିଚାର ଚାଲିଥିଲା।