କଟକ ଅଫିସ,୧୭।୧୧: ଓଜନ ମାପ ବିଭାଗ(ଲିଗାଲ ମେଟ୍ରୋଲୋଜି)ର ବରିଷ୍ଠ ଇନ୍ସପେକ୍ଟର ବିଶ୍ରାନ୍ତ କୁମାର ସେଠୀଙ୍କୁ ଭିଜିଲାନ୍ସ ଶନିବାର ଗିରଫ କରିଛି। ସେଠୀ ଗତ ଶୁକ୍ରବାର ୧ଲକ୍ଷ ୭୧ହଜାର ୭୦ଟଙ୍କା ଧରି ଯାଉଥିବା ବେଳେ ଭିଜିଲାନ୍ସ ସେଲ୍ ପକ୍ଷରୁ ତାଙ୍କୁ ପାରାଦୀପ ମଧୁବନ ନିକଟରେ ଥିବା ତାଙ୍କ ଅଫିସ ସମ୍ମୁଖରେ ଅଟକାଯାଇଥିଲା। ଏହା ପରେ ଭିଜିଲାନ୍ସ ଅଧିକାରୀମାନେ ତାଙ୍କ ନିକଟରୁ ଉକ୍ତ ଟଙ୍କା ଜବତ କରିଥିଲେ। ଜବତ ଟଙ୍କା ଉତ୍ସ ସମ୍ପର୍କରେ ସେଠୀ କୌଣସି ସନ୍ତୋଷଜନକ ଉତ୍ତର ଭିଜିଲାନ୍ସ ଅଧିକାରୀଙ୍କୁ ଦେଇପାରି ନ ଥିଲେ। ତଦନ୍ତରୁ ଭିଜିଲାନ୍ସ ଜାଣିପାରିଥିଲା ଯେ, ଇନ୍ସପେକ୍ଟର ସେଠୀ ଉକ୍ତ ଟଙ୍କା ପେଟ୍ରୋଲ, ଡିଜେଲ ପମ୍ପ ମାଲିକ ଓ ତେଲ ଟ୍ୟାଙ୍କର ଆଦିରୁ ଲାଞ୍ଚ ଆକାରରେ ଆଦାୟ କରିଥିଲେ। ଏ ସମ୍ପର୍କରେ ଭିଜିଲାନ୍ସ ସେଲ୍ ଥାନାରେ ଏକ ମାମଲା (ନଂ.୧୯/୨୦୧୯) ରୁଜୁ କରାଯାଇ ସେଠୀଙ୍କୁ ଗିରଫ କରାଯାଇଥିଲା। ସୂଚନାଥାଉ କି, ଗିରଫ ସେଠୀ ପାରାଦୀପଠାରେ ଓଜନ ମାପ ବିଭାଗରେ ବରିଷ୍ଠ ଇନ୍ସପେକ୍ଟରଭାବେ କାମ କରୁଥିବା ବେଳେ ଜଗତ୍ସିଂହପୁର ଜିଲା ଓଜନ ମାପ ବିଭାଗ କାର୍ଯ୍ୟାଳୟରେ ସହକାରୀ ନିୟନ୍ତ୍ରକଭାବେ କାର୍ଯ୍ୟ କରୁଛନ୍ତି।
