(ଅଜିତ କୁମାର ଧଳ) ଛେଣ୍ଡିପଦା, ୧୦ା୫ – ସରକାର କଟକଣା ଲଗାଇଥିବାରୁ ପୂର୍ବପରି ରାସ୍ତାରେ ଚାଲୁନି ଗାଡ଼ି। ହେଲେ ଯେଉଁ ଅଳ୍ପ କେତେଜଣ ଯାତାୟାତ କରୁଛନ୍ତି ସେମାନେ ଆମଠାରୁ ବାଡ଼ି ପରିବା କିଣି ନେଉଛନ୍ତି। ରାଜପଥ ପାର୍ଶ୍ୱରେ ଫସଲ ହୋଇଥିବା ଦେଖି ଖୁସି ହେବା ସହ ବେଶି ମୂଲାମୂଲି ବି କରୁନାହାନ୍ତି। ଅବଶ୍ୟ ଆଗ ଅପେକ୍ଷା ଟିକେ ଅଧିକ ସମୟ ରାସ୍ତା ପାର୍ଶ୍ୱରେ ବସିବାକୁ ପଡ଼ୁଛି। କିନ୍ତୁ ଲକ୍ଡାଉନ୍ ଆମ ଲାଭ କମାଇପାରିନି ବୋଲି କହିଛନ୍ତି ଅନୁଗୋଳ ଜିଲା ଛେଣ୍ଡିପଦା ବ୍ଲକ କଶିଡିହ ଗ୍ରାମର ଦମ୍ପତି ଅଇଁଠୁ ପ୍ରଧାନ ଓ ସାବିତ୍ରୀ ପ୍ରଧାନ।
ଚାଷ କରି ଚଳୁଥିବା ଏହି ଦମ୍ପତି କହିଛନ୍ତି, ବୟସ ବଢ଼ି ଯାଇଥିଲେ ବି ଆମେ କାହା ଉପରେ ନିର୍ଭରଶୀଳ ନୁହଁ। ଯାହା ଜମିବାଡ଼ି ଅଛି ସେଥିରେ ବର୍ଷ ବର୍ଷ ଧରି ଖଟି ନିଜ ପେଟ ନିଜେ ପୋଷୁଛୁ। ବିଶେଷକରି ମକା, କଦଳୀ, ପୋଟଳ, କଲରା, ଲଙ୍କା, ଅମୃତଭଣ୍ଡା, ବାଇଗଣ ଆଦି ପରିବା ଚାଷ କରୁଛୁ। ସରକାରୀ ସହାୟତାକୁ ଅପେକ୍ଷା ନ କରି ନିଜ ଉଦ୍ୟମରେ ଯେତିକି ପାରୁଛି ସେତିକି ଜମିରେ ଖଟୁଛୁ। ବଗିଚାକୁ ଲାଗି ଅନୁଗୋଳ-ଛେଣ୍ଡିପଦା ୬୩ ନମ୍ବର ରାଜ୍ୟ ରାଜପଥ ଯାଇଥିବାରୁ ଏହା ଆମ ଆୟର ପନ୍ଥାକୁ ଅଧିକ ସହଜ କରିଦେଇଛି। ବର୍ଷ ତମାମ ପରିବା ଧରି କେଉଁ ବଜାର କି ହାଟକୁ ଯିବାକୁ ପଡ଼ୁନି। ରାସ୍ତା କଡ଼େ କିଛି ସମୟ ବସିଗଲେ ସବୁତକ ବିକ୍ରି ହୋଇଯାଉଛି। ତଟକା ପରିବା ନେବାକୁ ସମସ୍ତଙ୍କର ଆଗ୍ରହ ଥିବାରୁ ବେପାର ଭଲ ହେଉଛି। ଏବେ ରାସ୍ତାରେ ଗାଡ଼ି ଚଳାଚଳ କମ୍ ଥିବାରୁ ୩/୪ ଘଣ୍ଟା ଧରି ବସିବାକୁ ପଡୁଛି। ସରକାରଙ୍କ ନିୟମ ମାନି ପରିବା ବିକ୍ରିବେଳେ ମାସ୍କ ପିନ୍ଧୁଛୁ। ଗ୍ରାହକଙ୍କୁ ଦୂରେଇ ରହିବାକୁ ମଧ୍ୟ କହୁଛୁ। ଏତେ କଡ଼ା କଟକଣା ବେଳେ ବି ଆମ ପରିଶ୍ରମର ମୂଲ ମିଳିଯାଉଥିବାରୁ ଅଧିକ ଖୁସି ଲାଗୁଛି ବୋଲି ଅଇଁଠୁ ଓ ସାବିତ୍ରୀ ପ୍ରକାଶ କରିଛନ୍ତି।
