ଭୁବନେଶ୍ୱର,୨୩।୩(ବ୍ୟୁରୋ)କରୋନା ଭୂତାଣୁର ସଂକ୍ରମଣକୁ ପ୍ରତିହତ କରିବା ନିମନ୍ତେ ଆସନ୍ତା ୨୯ତାରିଖ ପର୍ଯ୍ୟନ୍ତ ରାଜ୍ୟ ସରକାର ୫ଟି ଜିଲା ସହିତ ୮ଟି ସହରରେ ଲକ୍ଡାଉନ୍ ଘୋଷଣା କରିଛନ୍ତି। ତେବେ ଏହି ଲକ୍ଡାଉନ କ’ଣ, ତାକୁ ଅତ୍ୟନ୍ତ ସରଳ ଭାଷାରେ ବୁଝାଇଛନ୍ତି କରୋନା ଭୂତାଣୁ ସଂକ୍ରମଣ ସଚେତନତା କମିଟି ମୁଖ୍ୟ ପ୍ରବକ୍ତା ସୁବ୍ରତୋ ବାଗ୍ଚୀ। ମହାପଭୁ ଶ୍ରୀଜଗନ୍ନାଥଙ୍କ ଲୀଳାକୁ ମନେପକାଇ ସେ ଲକ୍ଡାଉନ୍ର ପୂରା ସାରକଥା ବୁଝାଇଛନ୍ତି। ବାଗ୍ଚୀ କହିଛନ୍ତି, ଇତିହାସ ଓ ମାଦଳପାଞ୍ଜୀ ଅନୁସାରେ ଭଗବାନ ୨୨ଥର ଲକ୍ଡାଉନ୍ ଅବସ୍ଥାରେ ଥିଲେ।
ଯେବେ ଅତର୍କିତ ଭାବେ ବର୍ହିଶତ୍ରୁ ଭଗବାନଙ୍କ ପ୍ରତି ବିପଦ ସୃଷ୍ଟି କରିଛନ୍ତି, ସେତେବେଳେ ସେବକମାନେ ଭଗବାନଙ୍କୁ ସ୍ଥାନାନ୍ତରିତ କରି ସମ୍ପୂର୍ଣ୍ଣ ଲକ୍ଡାଉନ କରି ରଖିଥିଲେ। ଶ୍ରୀକ୍ଷେତ୍ରରେ ୨ଥର ଓ ଗୁରୁବାଇଗଡ଼ରେ ୨ଥର, ନଇରି ହରିଶ୍ୱର ମଣ୍ଡପରେ ୨, ପାତାଳି ଭାବେ ୨, ବ୍ରହ୍ମଙ୍କୁ ୨ଥର ସ୍ଥାନାନ୍ତର କରାଯାଇଥିଲା। କରୋନା ଭୂତାଣୁ ମଧ୍ୟ ଏକ ଅଚାନକ ବର୍ହିଶତ୍ରୁ ସଦୃଶ। ଏହି ବର୍ହିଶତ୍ରୁଙ୍କୁ ରୋକିବା ପାଇଁ ନିଜକୁ ଭଗବାନଙ୍କ ଭଳି ସମ୍ପୂର୍ଣ୍ଣ ଭାବେ ଲକ୍ଡାଉନ କରି ରଖିବାକୁ ପଡ଼ିବ। ସମସ୍ତଙ୍କ ଭିତରେ ଠାକୁର ଅଛନ୍ତି। ସମସ୍ତେ ଠାକୁର ଓ ସମେସ୍ତ ନିଜର ସେବକ। ତେଣୁ ନିଜେ ନିଜକୁ ଲକ୍ଡାଉନ୍ରେ ରଖନ୍ତୁ ବୋଲି ବାଗ୍ଚୀ ପରାମର୍ଶ ଦେଇଛନ୍ତି।
ଏତେ ଦିନ କିପରି ଘର ଭିତରେ ରହିବା, ତାକୁ ନେଇ ବିଚଳିତ ହେବାର ଆବଶ୍ୟକ ନାହିଁ। ସମସ୍ତେ ମନେରଖିବା ଉଚିତ୍ ଯେ, ପ୍ରତିଥର ଠାକୁରଙ୍କ ଲକ୍ଡାଉନ୍ ସମୟ ଲମ୍ବା ଥିଲା। ଯେତେବେଳେ ପାତାଳି ଭାବେ ଠାକୁରଙ୍କ ଲକ୍ଡାଉନ୍ ହୋଇଥିଲା, ସେତେବେଳେ ସୋନପୁରର ବାଘପଲ୍ଲୀ ସୁଧାଲିପ୍ତ ମଣ୍ଡପରେ ୪୫ବର୍ଷ ଠାକୁର ରହିଥିଲେ। ଛଳିଆ ପାହାଡ଼ ଗୁମ୍ଫାରେ ଠାକୁର ୯୯ବର୍ଷ ରହିଥିଲେ। ଏହି ଦୁଇଟି ମିଶିଲେ ଠାକୁର ୧୪୪ବର୍ଷ ଠାକୁର୍ ଲକ୍ଡାଉନ୍ରେ ରହିଥିଲେ। ତେଣୁ ଭଗବାନଙ୍କ ଏହି ଲୀଳାକୁ ଆମେ ଉଦାହରଣ ଭାବେ ନେବା ତେବେ ଆମେ ଶକ୍ତିର ସହ ଏଭଳି ବିଶ୍ୱ ମହାମାରୀର ମୁକାବିଲା କରିପାରିବା ବୋଲି ବାଗ୍ଚୀ କହିଛନ୍ତି।
