ଭବାନୀପାଟଣା,୮।୩(ଡି.ଏନ୍.ଏ.): ରାଜ୍ୟ ବିଜେଡି ପକ୍ଷରୁ ଘୋଷିତ ପ୍ରାର୍ଥୀ ତାଲିକାରେ କଳାହାଣ୍ଡି ଜିଲାର ଭବାନୀପାଟଣା ନିବାସୀ ସୁଜିତ୍ କୁମାରଙ୍କ ନାମ ପ୍ରକାଶ ପାଇବା ପରେ ସହର ସମେତ ସମଗ୍ର ଜିଲାରେ ଖୁସିର ଲହରି ଖେଳିଖଯାଇଛି। ଏନେଇ ସୁଜିତ୍ କୁମାରଙ୍କୁ ଓ ତାଙ୍କ ପରିବାରଙ୍କ ନିକଟକୁ ଶୁଭେଚ୍ଛା ଓ ଅଭିନନ୍ଦନର ସୁଅ ଛୁଟିବାରେ ଲାଗିଛି। ବିଜେଡି ପକ୍ଷରୁ ତାଙ୍କୁ ପ୍ରାର୍ଥୀ ଭାବେ ଚୟନ କରାଯିବା ପରେ ଖୁସିରେ ବିଭୋର ହୋଇ ସେ କହିଛନ୍ତି, ଏହା ମୋ’ ପାଇଁ ଏକ ସର୍ପ୍ରାଇଜ୍। ମୁଖ୍ୟମନ୍ତ୍ରୀ ମୋତେ ଯେଉଁ ଆଶା ଓ ଭରସାରେ ନେଇଛନ୍ତି ନିଶ୍ଚିନ୍ତ ଭାବରେ ଭଲକାମ କରି ସେହି ଭରସାକୁ ଅତୁଟ ରଖିବି। ଶିକ୍ଷା, ଗମନାଗମନ, ଆଦିବାସୀ ଅଞ୍ଚଳର ବିକାଶ କରିବା ସହିତ ସମଗ୍ର ଅଞ୍ଚଳର ବିକାଶ ପ୍ରତି ଗୁରୁତ୍ୱ ଦେବି ବୋଲି କହିଛନ୍ତି।
