କଟକ ଅଫିସ,୧୦ା୬: କରୋନା ସଂକ୍ରମଣ ଆଶଙ୍କା ଯୋଗୁ ଚଳିତ ବର୍ଷ ରଥଯାତ୍ରା ସ୍ଥଗିତ ରଖିବାକୁ ହାଇକୋର୍ଟରେ ରୁଜୁ ଜନସ୍ବାର୍ଥ ମାମଲାର ମଙ୍ଗଳବାର ଶୁଣାଣି ହୋଇଛି। ମୁଖ୍ୟ ବିଚାରପତି ଜଷ୍ଟିସ୍ ମହମ୍ମଦ ରଫିକ୍ ଓ ବିଚାରପତି ଜଷ୍ଟିସ ବିଶ୍ୱଜିତ ମହାନ୍ତିଙ୍କୁ ନେଇ ଗଠିତ ଖଣ୍ଡପୀଠ ମାମଲାର ଶୁଣାଣି କରିଛନ୍ତି। ସରକାରଙ୍କ ପକ୍ଷରୁ ଆଡଭୋକେଟ ଜେନେରାଲ ଅଶୋକ ପରିଜା ସତ୍ୟପାଠ ଦାଖଲ କରିଥିଲେ। ରଥଯାତ୍ରା ଆୟୋଜନ ନେଇ ସରକାର ବର୍ତ୍ତମାନ ସୁଦ୍ଧା କୌଣସି ନିଷ୍ପତ୍ତି ନେଇନାହାନ୍ତି। ଆଗାମୀ ଦିନରେ କରୋନା ଭୂତାଣୁର ସ୍ଥିତିକୁ ଦେଖି ସରକାର ନିଷ୍ପତ୍ତି ନେବେ ବୋଲି ସତ୍ୟପାଠରେ ଦର୍ଶାଯାଇଛି। କୋର୍ଟ ଏହାକୁ ଗ୍ରହଣ କରି କରୋନା ସ୍ଥିତିକୁ ଦେଖି ରଥଯାତ୍ରା ସମ୍ପର୍କରେ ସରକାର ନିଷ୍ପତ୍ତି ନେବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି।
ଉଲ୍ଳେଖଯୋଗ୍ୟ, ଭାରତୀୟ ବିକାଶ ପରିଷଦର ସଭାପତି ସୁରେନ୍ଦ୍ର ପାଣିଗ୍ରାହୀ ଏହି ମାମଲା କରିଥିବା ବେଳେ ଆଇନଜୀବୀ ସରୋଜ ପାଢ଼ୀ ଯୁକ୍ତି ଉପସ୍ଥାପନ କରିଥିଲେ। ପୂର୍ବରୁ ବହୁଥର ରଥଯାତ୍ରା ବନ୍ଦ ହୋଇଛି। ଗତ ୪୨୫ ବର୍ଷ ଭିତରୁ ରଥଯାତ୍ରା ୩୨ ବର୍ଷ ବନ୍ଦ ରହିଥିଲା। ପୁରୀରେ ବର୍ତ୍ତମାନ ସୁଦ୍ଧା କରୋନା ଆକ୍ରାନ୍ତଙ୍କ ସଂଖ୍ୟା ଶହେ ଉପରେ
ରହିଛି। ଲକ୍ଡାଉନ୍ କଟକଣା ଅନୁଯାୟୀ ଜୁନ୍ ୩୦ ପର୍ଯ୍ୟନ୍ତ ଧର୍ମାନୁଷ୍ଠାନ ଓ ଧାର୍ମିକ କାର୍ଯ୍ୟକ୍ରମ ଆୟୋଜନକୁ ବାରଣ କରାଯାଇଛି। ମୁସଲିମ୍ ସଂପ୍ରଦାୟର ଇଦ୍ ଓ ମହରମ୍ ମଧ୍ୟ ବନ୍ଦ ରହିଥିଲା। ଏଭଳି ସ୍ଥଳେ ରଥଯାତ୍ରା ପାଇଁ ଅନୁମତି ଦେବା ସମାନତା ଅଧିକାର ବିରୋଧୀ ବୋଲି ସେ ଯୁକ୍ତି ଉପସ୍ଥାପନ କରିଥିଲେ। ସରକାରଙ୍କ ପକ୍ଷରୁ ଆଡଭୋକେଟ୍ ଜେନେରାଲ୍ ଅଶୋକ ପରିଜା ଯୁକ୍ତି ରଖିଥିଲେ ଯେ, ଠାକୁରଙ୍କ ରୀତିନୀତି ଅନୁଯାୟୀ ରଥଯାତ୍ରା ଆୟୋଜନ ହେବ। ଭକ୍ତଙ୍କ ଉପସ୍ଥିତି ଉପରେ କଟକଣା ରଖାଯାଇଛି। ଅନ୍ୟପକ୍ଷରେ ହସ୍ତକ୍ଷେପ ଯାଚିକା ଦାଏର କରିଥିବା ବ୍ୟକ୍ତିଙ୍କ ପକ୍ଷରୁ ରଥ ଟାଣିବା ପାଇଁ ମାତ୍ର ଦୁଇ ଶହ ଭକ୍ତଙ୍କୁ ଅନୁମତି ଦେବାକୁ ଯୁକ୍ତି ରଖାଯାଇଥିଲା। କିନ୍ତୁ କରୋନା କଟକଣା ଅନୁଯାୟୀ, ୭ ଜଣଙ୍କ ଠାରୁ ଅଧିକ ବ୍ୟକ୍ତି ଏକାଠି ହୋଇପାରିବେ ନାହିଁ। ସେହିପରି ହସ୍ତକ୍ଷେପ ଯାଚିକା ଦାଏର କରିଥିବା ଅନ୍ୟ ଏକ ପକ୍ଷ ମେଶିନରେ ରଥ ଟାଣିବା ପାଇଁ ଯୁକ୍ତି ବାଢ଼ିଥିଲେ।
