ରଣପୁର,୨୬।୮(ସ୍ବ.ପ୍ର.): ରଣପୁରସ୍ଥିତ ମା’ ମଣିନାଗଙ୍କ ପାନ୍ଥନିବାସରେ ରଣପୁର ବିଧାୟକ ତଥା ଜିଲା ଯୋଜନା କମିଟିର ଅଧ୍ୟକ୍ଷ ସତ୍ୟନାରାୟଣ ପ୍ରଧାନଙ୍କ ତତ୍ତ୍ୱାବଧାନରେ ରବିବାର ଏକ ଖବରଦାତା ସମ୍ମିଳନୀ ଅନୁଷ୍ଠିତ ହୋଇଥିଲା । ଏଥିରେ ଉପସ୍ଥିତ ରଣପୁର ବ୍ଲକ ଅଞ୍ଚଳର ଗଣମାଧ୍ୟମ ପ୍ରତିନିଧିଙ୍କଠାରୁ ବିଧାୟକ ସ୍ଥାନୀୟ ଅଞ୍ଚଳର ବିଭିନ୍ନ ସମସ୍ୟା ସମ୍ପର୍କରେ ଅବଗତ ହୋଇଥିଲେ। ଖବରଦାତାଙ୍କ ବିଭିନ୍ନ ପ୍ରଶ୍ନର ଉତ୍ତର ରଖି ବିଧାୟକ ରଣପୁରର ବିକାଶ ପାଇଁ ପଦକ୍ଷେପ ନେବେ ବୋଲି କହିଥିଲେ। ଏଥିସହ ପ୍ରତିନିଧିମାନେ ଯାହା ପଚାରିଛନ୍ତି ତାହା ତାଙ୍କ ପାଇଁ ପରାମର୍ଶ ଥିଲା ବୋଲି ବିଧାୟକ କହିବା ସହ ଉପରୋକ୍ତ ପରାମର୍ଶଗୁଡିକର ଠିକଣା ସମୟରେ ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେଇଛନ୍ତିି ।
ବ୍ଲକ ଅଞ୍ଚଳରେ ଜଳସେଚନର ସୁବିଧା ନାହିଁ । ଯେଉଁଠି ରହିଛି ତାହା କାମରେ ଲାଗୁନି । ଭେଟବର ଡ୍ୟାମ ପୁନରୁଦ୍ଧାର ନ ହେବାରୁ ଚାଷୀ ଉପକୃତ ହେଉ ନାହାନ୍ତି। ମରୁଡି ସମୟରେ ବନ୍ଧରେ ପାଣି ରହୁ ନ ଥିବାରୁ ଜମିରେ ଜଳ ମାଡୁନି । ଭେଟବର ଡ୍ୟାମକୁ ବାଣପୁରର ଶାଳିଆ ଡ୍ୟାମ ସହ ସଂଯୋଗ କରାଇଲେ ଚାଷୀ ଉପକୃତ ହୋଇପାରନ୍ତେ ବୋଲି ଖବରଦାତାମାନେ ଦାବି ଉପସ୍ଥାପନ କରିଥିଲେ। ସେହିପରି ରଣପୁର ସହରରେ ସ୍ଥାନୀୟ ବାସିନ୍ଦା ସହରର ସର୍ବନିମ୍ନ ସୁବିଧା ପାଉ ନାହାନ୍ତି । ବିଦ୍ୟୁତ୍ ସମସ୍ୟା ଲାଗି ରହୁଛି । ଡ୍ରେନରେ ବର୍ଷାଜଳ ନ ଯାଇ ରାସ୍ତାରେ ଭାସୁଛି । ରଣପୁର ବଜାରରେ ପନିପରିବା ମାକେର୍ଟ ନାହିଁ । ରାସ୍ତା ଜାମ ହୋଇ ସବୁବେଳେ ଟ୍ରାଫିକ ସମସ୍ୟା ସୃଷ୍ଟି ହେଉଛି ବୋଲି ଖବରଦାତାମାନେ ବିଧାୟକଙ୍କ ଦୃଷ୍ଟି ଆକର୍ଷଣ କରିଥିଲେ। ସେହିପରି ସ୍ବାସ୍ଥ୍ୟସେବା ବିପର୍ଯ୍ୟସ୍ତ ହୋଇପଡିଛି। ୩ଜଣ ଡାକ୍ତର ନିଯୁକ୍ତି ପାଇଥିବାବେଳେ ପ୍ରତ୍ୟହ ଜଣେ ଆସୁଛନ୍ତି। ଶିଶୁ, ସ୍ତ୍ରୀ ରୋଗ ବିଶେଷଜ୍ଞ, ମେଡିକାଲ ଅଫିସର ପଦବୀ ଖାଲି ପଡିଛି। ଡାକ୍ତରଖାନା ସଫେଇ ହେଉନି । ରଣପୁର ସହରରେ ସର୍ବସାଧାରଣଙ୍କ ଉଦ୍ଦେଶ୍ୟରେ ଗୋଷ୍ଠୀ ପାଇଖାନା ଓ ପରିସ୍ରାଗାର ନାହିଁ ବୋଲି ସେମାନେ ଅଭିଯୋଗ କରିଥିଲେ। ଏମଜିଏନଆରଇଜିଏସ୍ରେ କୋଟି କୋଟି ଟଙ୍କା ଖର୍ଚ୍ଚ ହେଉଛି। ହେଲେ ରଣପୁର ଅଞ୍ଚଳର ପୋଖରୀ ପୁନରୁଦ୍ଧାର ହୋଇପାରୁନି । ସେହିପରି ବସଷ୍ଟାଣ୍ଡ ନାହିଁ ବୋଲି ଖବରଦାତାମାନେ କହିଥିଲେ। ବିଧାୟକ ସମସ୍ତ ସମସ୍ୟା ସମାଧାନ ପାଇଁ ଖୁବ୍ଶୀଘ୍ର ଚେଷ୍ଟା କରିବେ ବୋଲି ପ୍ରତିଶ୍ରୁତି ଦେଇଥିଲେ। ଅନ୍ୟପକ୍ଷେ ଏଥିରେ ବିଧାୟକ ସତ୍ୟନାରାୟଣ ପ୍ରଧାନଙ୍କ ସମେତ ରଣପୁର ଥାନା ଅଧିକାରୀ ରଶ୍ମି ରଞ୍ଜନ ଦାଶ, ଅବସରପ୍ରାପ୍ତ ପ୍ରାଣୀ ଚିକିତ୍ସକ ଡାକ୍ତର ସୁକାନ୍ତ ଲେଙ୍କାଙ୍କୁ ସମ୍ବର୍ଦ୍ଧିତ କରାଯାଇଥିଲା। ଏହି ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ରଣପୁର ବ୍ଲକର ପୂର୍ବତନ ବ୍ଲକ ଚେୟାରମ୍ୟାନ ପ୍ରଭାତ ଦଳବେହେରା,ବରିଷ୍ଠ ଖବରଦାତା ଆଚାର୍ଯ୍ୟ ବିଶ୍ୱରଞ୍ଜନ ପ୍ରମୁଖ ଉପସ୍ଥିତ ଥିଲେ।
