ସୁନ୍ଦରଗଡ଼,୨୯।୧ (ଡି.ଏନ୍.ଏ) -ସ୍ଥାନୀୟ ଭବାନୀ ଭବନ ପଡିଆରେ ଚାଲିଥିବା ଜିଲା ସାଂସ୍କୃତିକ ମହୋତ୍ସବ ଯତରା -୨୦୨୦ର ଦ୍ୱିତୀୟ ସନ୍ଧ୍ୟାରେ ମୁକ୍ତାକାଶ ରଙ୍ଗମଞ୍ଚରେ ରାଜ୍ୟ ତଥା ରାଜ୍ୟ ବାହାରର କଳାକାର ଓ ସାଂସ୍କୃତିକ ଦଳ ଦ୍ୱାରା ପାରମ୍ପରିକ ବିଭିନ୍ନ ଲୋକନୃତ୍ୟ ଓ ଲୋକସଙ୍ଗୀତରେ ବିଭୋର ହୋଇଥିଲେ ଦର୍ଶକ। ସୁନ୍ଦରଗଡ ସ୍ବତନ୍ତ୍ର ବିକାଶ ପରିଷଦର ଅଧ୍ୟକ୍ଷ ବିନୟ ଟପ୍ପୋ ମୁଖ୍ୟ ଅତିଥି ଭାବେ ଯୋଗଦେଇ ଦ୍ୱିତୀୟ ସନ୍ଧ୍ୟାର କାର୍ଯ୍ୟକ୍ରମକୁ ଉଦ୍ଘାଟନ କରିଥିଲେ। ଜିଲା ପ୍ରଶାସନ ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମ ଆୟୋଜନକୁ ପ୍ରଶଂସା କରିବା ସହ ଆଦିବାସୀ କଳାସଂସ୍କୃତି ସମୃଦ୍ଧ ସୁନ୍ଦରଗଡବାସୀ ନିଜର କଳାନୈପୁଣତାକୁ ପ୍ରତିପାଦିତ କରି ପାରିବା ସହ ଅନ୍ୟ ଜିଲା ତଥା ରାଜ୍ୟର ପାରମ୍ପାରିକ ଲୋକନୃତ୍ୟ ସହିତ ପରିଚିତ ହେବାର ଏହି ମହୋତ୍ସବ ଅପୂର୍ବ ସୁଯୋଗ ସୃଷ୍ଟି କରିଛି ବୋଲି କହିଥିଲେ। ରାଜ୍ୟ ସରକାରଙ୍କ ପକ୍ଷରୁ ସ୍ବତନ୍ତ୍ର ବିକାଶ ପରିଷଦ ଜରିଆରେ ହଜିଯାଉଥିବା ଆଦିବାସୀ କଳାସଂସ୍କୃତି ର ସୁରକ୍ଷା ପାଇଁ ବିଭିନ୍ନ କାର୍ଯ୍ୟକ୍ରମ କରାଯାଉଥିବା କହିଥିଲେ। ଅତିରିକ୍ତ ଜିଲାପାଳ ନୃସିଂହ ଚରଣ ସ୍ବାଇଁ ଏହି ସମାରୋହରେ ସଭାପତିତ୍ୱ କରିଥିଲେ। ରାଉରକେଲା ତ୍ରିବେଣୀ କଳାପରିଷଦ ଓ ସୁନ୍ଦରଗଡ ଧରଣୀଧର କଳାକାରମାନଙ୍କ ଦ୍ୱାରା ଓଡିଶୀ, ଲାଠିକଟାର ସାନ୍ତାଳୀ ନୃତ୍ୟ, ବାମରା ସରଗମ କଳାପରିଷଦ ଓ ରାଉରକେଲା କୋଶଳ ଦର୍ପଣ ଅନୁଷ୍ଠାନର ପଦ୍ମିନୀ ପାଣିଗ୍ରାହୀ ଓ ସାଥୀ କଳାକାରଙ୍କ ଦ୍ୱାରା ସମ୍ବଲପୁରୀ, ପୁରୀ ଓ୍ବାରିୟର ମାଲଖମ୍ବ ଏକାଡେମୀର ମାଲଖମ୍ବ କଳା କୌଶଳ, ପିପିଲି ମା’ ବୀଣକେଶରୀ ନୃତ୍ୟ ମଞ୍ଜରୀ ଅନୁଷ୍ଠାନର କଳାକାରମାନଙ୍କ ଦ୍ୱାରା ପଲ୍ଲୀନୃତ୍ୟ, ରାଜସ୍ଥାନର କଳାକାରଙ୍କ ଦ୍ୱାରା ଭବାଇ ନୃତ୍ୟ ଓ ବୌଦ ନଚନିଆ କଳା ପରିଷଦର କଳାକାରଙ୍କ ଦ୍ୱାରା ପରିବେଷିତ ଲୋକନୃତ୍ୟ ଏହି ସନ୍ଧ୍ୟାର ମୁଖ୍ୟ ଆକର୍ଷଣ ଥିଲା। ସେହିପରି ରାଜଗାଙ୍ଗପୁରର ବାଲୁକା ଶିଳ୍ପୀ ରାଜୁ ସାହୁଙ୍କ ଦ୍ୱାରା ଏହି ପଡିଆରେ ବେଟୀ ବଚାଓ, ବେଟୀ ପଢାଓ ବାର୍ତ୍ତାକୁ ନେଇ ବାଲୁକା ଶିଳ୍ପକଳା ଓ ଜିଲା ଶିଶୁସୁରକ୍ଷା ବିଭାଗ ପକ୍ଷରୁ କନ୍ୟା ସନ୍ତାନ ସମ୍ପର୍କୀତ ଏକ ସଚେତନତା ଶୋଭା ଅନୁଷ୍ଠିତ ହୋଇଥିଲା। ଜିଲା ଶିଶୁ ସୁରକ୍ଷା ଅଧିକାରୀ ଶ୍ରୀବନ୍ତ ଜେନା କନ୍ୟାସନ୍ତାନର ସୁରକ୍ଷା ସମ୍ପର୍କୀତ ବକ୍ତବ୍ୟ ରଖିଥିଲେ। ଅଞ୍ଜନ ପ୍ରଧାନ ଓ ଶ୍ରୀପଦା ଷଡଙ୍ଗୀ କାର୍ଯ୍ୟକ୍ରମକୁ ସଂଯୋଜନା କରିଥିଲେ। ଆସନ୍ତା ୩୧ ପର୍ଯ୍ୟନ୍ତ ହେବାକୁ ଥିବା ଏହି ମହୋତ୍ସବରେ ପ୍ରତ୍ୟହ ସକାଳ ୧୦ଟାରୁ ରାତି ୧୦ଟା ପର୍ଯ୍ୟନ୍ତ ଜିଲା ଉନ୍ନୟନ ପ୍ରଦର୍ଶନୀ, ପୁସ୍ତକ ମେଳା, ପଲ୍ଲୀଶ୍ରୀ ମେଳା, ଖାଦ୍ୟ ମେଳା, ଚିତ୍ର କଳା କର୍ମଶାଳା ଓ ପ୍ରଦର୍ଶନୀରେ ବେଶ ଜନସମାଗମ ହେଉଛି। ବୁଧବାର ସ୍ଥାନୀୟ ପ୍ରଗତି ମଣ୍ଡପଠାରେ ଏହି ଅବସରରେ ପୂର୍ବାହ୍ନ ୧୦ଟାରେ ସୁନ୍ଦରଗଡର ଐତିହ୍ୟ, କଳା ସଂସ୍କୃତି ଭାଷା ସାହିତ୍ୟ ସମ୍ପର୍କୀତ ଏକ ସାହିତ୍ୟ ଆଲୋଚନାଚକ୍ର ଓ କବିତା ପାଠୋତ୍ସବ ଅନୁଷ୍ଠିତ ହେବ।
