ନୟାଗଡ଼ ଅଫିସ,୧୫ା୧୨: ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟରେ ଶୁକ୍ରବାର ସନ୍ଧ୍ୟାରେ ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଥିଲା। ବିଦ୍ୟୁତ୍ କଟିଯାଇଥିବା ବେଳେ ଜଣେ ଡାକ୍ତର ମୋବାଇଲ୍ ଟର୍ଚ୍ଚରେ ରୋଗୀମାନଙ୍କ ସ୍ବାସ୍ଥ୍ୟ ପରୀକ୍ଷା କରିଥିଲେ। ଜଣକ ପରେ ଜଣେ ୭ ଜଣ ରୋଗୀଙ୍କୁ ଦେଖି ସେମାନଙ୍କ ପାଇଁ ମେଡିସିନ୍ ମଧ୍ୟ ଲେଖିଥିଲେ। ଜିଲା ମୁଖ୍ୟ ଚିକିତ୍ସାଳୟର ଏଭଳି ଘଟଣା ଜିଲା ସ୍ବାସ୍ଥ୍ୟ ସମିତିର କାର୍ଯ୍ୟଦକ୍ଷତା ପ୍ରତି ଅଙ୍ଗୁଳି ନିର୍ଦ୍ଦେଶ କରୁଛି।
ମିଳିଥିବା ସୂଚନା ଅନୁସାରେ ଶୁକ୍ରବାର ସନ୍ଧ୍ୟା ୭ଟା ୩୦ ମିନିଟରେ ଡାକ୍ତର ରାଉଣ୍ଡରେ ବାହାରିଥିଲେ। ପ୍ରଥମେ ସେ ମେଡିସିନ ୱାର୍ଡ଼ର ଦୁଇଟି କୋଠରି ବୁଲିବା ପରେ ୩ ନମ୍ବର କୋଠରିକୁ ଯାଇଥିଲେ। ସେହି ସମୟରେ ହଠାତ୍ ବିଦ୍ୟୁତ୍ କଟିଯାଇଥିଲା। ୫ ମିନିଟ ବିତିବା ପରେ ମଧ୍ୟ ଲାଇନ୍ ଆସି ନ ଥିଲା। ଫଳରେ ସେଠାରେ ଥିବା ଜଣେ ବ୍ୟକ୍ତି ମୋବାଇଲ୍ରେ ଟର୍ଚ୍ଚ ଲାଇଟ ପକାଇବାରୁ ଡାକ୍ତର ରୋଗୀଙ୍କୁ ଦେଖିଥିଲେ। ଏହା ପରେ ୱାର୍ଡ଼ରେ ଥିବା ଦିଦି ଜଣକ ଲାଇନମ୍ୟାନ୍ଙ୍କୁ ଫୋନ୍ କରି କହିବା ପରେ ବିଦ୍ୟୁତ୍ ଯୋଗାଣ ହୋଇଥିଲା। ହେଲେ ଜେନେରେଟର ଦ୍ୱାରା ଲାଇନ୍ ସଂଯୋଗ କରାଯାଇଥିଲେ ମଧ୍ୟ ୫ ମିନିଟ ପରେ ପୁନର୍ବାର କଟିଯାଇଥିଲା। ଏଭଳି ପ୍ରାୟ ଅଧଘଣ୍ଟା କାଳ ବିଦ୍ୟୁତ୍ର ଲୁଚକାଳି ଖେଳ ଦେଖିବାକୁ ମିଳିଥିଲା। ଡାକ୍ତର ଅପେକ୍ଷା ନ କରି ଜଣକ ପରେ ଜଣେ ମେଡ଼ିସିନ୍ ୱାର୍ଡ଼ରେ ଥିବା ୭ ଜଣ ରୋଗୀଙ୍କୁ ମୋବାଇଲ୍ ଲାଇଟ୍ରେ ଦେଖିଥିଲେ। ସେମାନଙ୍କ ପାଇଁ ଔଷଧ ମଧ୍ୟ ଲେଖିଥିଲେ। ପୂର୍ବରୁ ୨୭ ସେପ୍ଟେମ୍ବର ୨୦୧୮ରେ ବିଦ୍ୟୁତ୍ କଟିଯାଇଥିବା ବେଳେ ଜଣେ ମହିଳା ରୋଗୀଙ୍କୁ ଡାକ୍ତର ଟର୍ଚ୍ଚ ଲାଇଟରେ ଚିକିତ୍ସା କରିଥିଲେ।
