ପାଟନା,୨।୫: ରାଜସ୍ଥାନର କୋଟାରେ କୋଚିଂ ପାଇଁ ଯାଇଥିବା ବିହାରର ଛାତ୍ରୀଛାତ୍ରଙ୍କ ଘରକୁ ଫେରିବା ଇଛା ଶେଷରେ ପୂରଣ ହୋଇଛି। ମେ’ ୩ରୁ ୬ ମଧ୍ୟରେ କୋଟାରେ ଥିବା ବିହାରର ସମସ୍ତ ଛାତ୍ରୀଛାତ୍ରଙ୍କୁ ଘରକୁ ପଠାଯିବ। ଏନେଇ କୋଟାର ଜିଲା ପ୍ରଶାସନ ସମସ୍ତ ଛାତ୍ରୀଛାତ୍ର ଓ ଅଭିଭାବକଙ୍କୁ ମୋବାଇଲରେ ମେସେଜ୍ ପଠାଇ ସୂଚନା ଦେଇଛନ୍ତି। ସୂଚନାଯୋଗ୍ୟ, ବିହାର ଓ ରାଜସ୍ଥାନ ୨ ରାଜ୍ୟର ଆପୋଷ ବୁଝାମଣା ଓ ସମନ୍ବୟରେ କୋଟା ଓ ଜୟପୁରରୁ ବିହାର ଅଭିମୁଖେ ଶୁକ୍ରବାର ରାତିରୁ ଏକ ସ୍ବତନ୍ତ୍ର ଟ୍ରେନ୍ର ଚଳାଚଳ ଆରମ୍ଭ ହୋଇଛି। ଏହାଦ୍ୱାରା ଫସିରହିଥିବା ଲୋକ ସୁବିଧାପୂର୍ବକ ନିଜ ରାଜ୍ୟକୁ ଫେରିପାରିବେ। ଅପରପକ୍ଷେ ବିହାର ମୁଖ୍ୟମନ୍ତ୍ରୀ ନୀତିଶ କୁମାର ଅନ୍ୟ ରାଜ୍ୟରେ ଫସିଥିବା ଲୋକଙ୍କ ଫେରିବା ଲାଗି ସ୍ବତନ୍ତ୍ର ଟ୍ରେନ୍ ଚଳାଚଳ କରାଇଥିବାରୁ କେନ୍ଦ୍ରସରକାଙ୍କୁ ଧନ୍ୟବାଦ ଜଣାଇଛନ୍ତି। ସେହିପରି ଲକ୍ଡାଉନ୍ ଭିତରେ ଅନ୍ୟ ରାଜ୍ୟରୁ ବଡ଼ ସଂଖ୍ୟାରେ ଲୋକ ଫେରିବା ସମ୍ଭାବନା ରହିଛି। ତେଣୁ ମୁଖ୍ୟମନ୍ତ୍ରୀ ସମସ୍ତ ଫେରନ୍ତାଙ୍କ ପାଇଁ ୨୧ ଦିନିଆ କ୍ୱାରାଣ୍ଟାଇନ୍ରେ ରହିବାର ବ୍ୟବସ୍ଥା କରାଇଛନ୍ତି। ଏହି ସମୟରେ ସେମାନଙ୍କର ଯାଞ୍ଚ, ଖାଇବା ପିଇବା ଓ ଚିକିତ୍ସାର ସମସ୍ତ ସୁବିଧା କରାଇବାକୁ ଅଧିକାରୀଙ୍କୁ ନୀତିଶ ନିର୍ଦ୍ଦେଶ ଦେଇଛନ୍ତି।
