ବାରିପଦା ଅଫିସ,୧୦।୮- ଓଡ଼ିିଶା ମେଡିକାଲ କର୍ମଚାରୀ ସଂଘ ମୟୂରଭଞ୍ଜ ଜିଲା ଶାଖାର ଏକ ସାଧାରଣ ବୈଠକ ସଂଘର ଉପସଭାପତି ଶ୍ୟାମସୁନ୍ଦର ଦେଓଙ୍କ ସଭାପତିତ୍ୱରେ ଅନୁଷ୍ଠିତ ହୋଇଯାଇଛି। ବୈଠକରେ ସ୍ଥାନୀୟ ପଣ୍ଡିତ ରଘୁନାଥ ମୁର୍ମୁ ମେଡିକାଲ କଲେଜ ଓ ହସ୍ପିଟାଲରେ ଡାକ୍ତର, ଫାର୍ମସିଷ୍ଟ, ନର୍ସ, ରେଡିଓଗ୍ରାଫର, ମହିଳା ସ୍ବାସ୍ଥ୍ୟକର୍ମୀ, ପୁରୁଷ ସ୍ବାସ୍ଥ୍ୟକର୍ମୀ ପଦବୀ ପାଇଁ ନୂତନ ନିଯୁକ୍ତି କରାଯାଉଥିବା ବେଳେ ୪ର୍ଥ ଶ୍ରେଣୀ କର୍ମଚାରୀ ନିଯୁକ୍ତି କରାଯାଉ ନ ଥିବାରୁ ଉଦବେଗ ପ୍ରକାଶ ପାଇଥିଲା। ସରକାର ତୁରନ୍ତ ଏହି ମେଡିକାଲ କଲେଜ ପାଇଁ ୫୦୦ଟି ୪ର୍ଥ ଶ୍ରେଣୀ କର୍ମଚାରୀ ନିଯୁକ୍ତି କରାଯିବା ନେଇ ଦାବି କରାଯାଇଥିଲା। ସେହିପରି ମେଡିକାଲ କଲେଜର ୪୬ଟି ଆଟେଣ୍ଡାଣ୍ଟ ପଦବୀ ପୂରଣ କରିବା ପାଇଁ ସଂଘ ପକ୍ଷରୁ ଦାବିପତ୍ର ପ୍ରଦାନ କରାଯାଇଥିଲେ ମଧ୍ୟ ଏଥିପ୍ରତି ଗୁରୁତ୍ୱ ଦିଆଯାଉ ନ ଥିବା ସଂଘ ଅଭିଯୋଗ କରିଛି। କେତେକ ୪ର୍ଥ ଶ୍ରେଣୀ କର୍ମଚାରୀ ୬ ବର୍ଷରୁ ଅଧିକ ସମୟ କାର୍ଯ୍ୟ କରିଥିଲେ ମଧ୍ୟ ସେମାନଙ୍କୁ ନିୟମିତ କରାଯାଉ ନ ଥିବାରୁ ବୈଠକରେ ଅସନ୍ତୋଷ ପ୍ରକାଶ ପାଇଥିଲା। ଏହା ସହିତ ୪ର୍ଥ ଶ୍ରେଣୀ କର୍ମଚାରୀମାନଙ୍କର ପିସି ବସାଇ ପଦୋନ୍ନତି ସହିତ ସେମାନଙ୍କ ଲାଗି ବାସଗୃହ ଏବଂ ଡ୍ୟୁଟି ରୁମର ବ୍ୟବସ୍ଥା କରାଯିବା ସକାଶେ ମଧ୍ୟ ସଂଘ ପକ୍ଷରୁ ଦାବି କରାଯାଇଛି। ଉପରୋକ୍ତ ସମସ୍ତ ଦାବି ସମ୍ପର୍କରେ ଗତ ୨୩ ଜୁଲାଇରେ ଜିଲା ମୁଖ୍ୟ ଚିକିତ୍ସା ଅଧିକାରୀଙ୍କୁ ଅବଗତ କରାଯାଇଥିଲେ ମଧ୍ୟ ପୂରଣ କରାଯାଇନାହିଁ। ଆସନ୍ତା ୩ ଦିନ ମଧ୍ୟରେ ଦାବି ପୂରଣ ନ ହେଲେ ଜିଲା ମୁଖ୍ୟ ଚିକିତ୍ସା ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯିବ ବୋଲି ସଂଘ ନିଷ୍ପତ୍ତି ନେଇଛି। ବୈଠକରେ ରାଜ୍ୟ ସଂଘର ସଭାପତି ଦିଲୀପ କୁମାର ମିଶ୍ର, କୋଷାଧ୍ୟକ୍ଷ ସୁବୋଧ କୁମାର ଜେନା, ସୁନ୍ଦର ମୋହନ ପାଢ଼ୀ, କୃଷ୍ଣଚନ୍ଦ୍ର ଦାସ, ଚିନ୍ତାମଣି ଦାସ, ରାମକୃଷ୍ଣ ତୁଙ୍ଗ, ଗଣେଶ୍ୱର ସିଂ, ଗତିକୃଷ୍ଣ ପଲେଇ, ମହେନ୍ଦ୍ର ପଲେଇ, ସନ୍ତୋଷ କୁମାର ନାୟକ, ବିଶ୍ୱଶଙ୍କର କଲିଆ, ପ୍ରମୋଦ କୁମାର ଦାସବାବୁ, ଅଜନ୍ତା ସାଠିଆ, କାହ୍ନୁଚରଣ ସେଠୀ, ଲୁଧିମଣି ଦେଇ, ସୁଜାତା ମହାନ୍ତ, ବିଜୟ ଲକ୍ଷ୍ମୀ ମହାନ୍ତ, ସୁଚିତ୍ରା ମହାକୁଡ ଓ ମମତା ସାହୁ ପ୍ରମୁଖ ଉପସ୍ଥିତ ଥିଲେ।
